ભારતમાં કોરિયન ડ્રામા અને K-કન્ટેન્ટના વધતા ક્રેઝને ધ્યાનમાં રાખીને પ્રાઇમ વીડિયો ઇન્ડિયાએ દક્ષિણ કોરિયાની અગ્રણી એન્ટરટેઇનમેન્ટ કંપની CJ ENM સાથે બહુવર્ષીય ડિસ્ટ્રિબ્યુશન ડીલ કરી છે. આ ભાગીદારી હેઠળ આગામી 2 વર્ષમાં ભારતમાં 100થી વધુ કોરિયન શો અને ડ્રામા ઉપલબ્ધ થશે. તેમાં 26 નવા ટાઇટલ ઉપરાંત CJ ENMની લોકપ્રિય કન્ટેન્ટ લાઇબ્રેરીના અનેક હિટ શો પણ સામેલ કરવામાં આવશે. આ ડીલ પ્રાઇમ વીડિયો અને CJ ENM વચ્ચે પહેલેથી જ અમલમાં રહેલી વૈશ્વિક ભાગીદારીનું વિસ્તૃત સ્વરૂપ છે.
ભારતમાં રિલીઝ થનારા તમામ નવા કોરિયન શો અંગ્રેજી સબટાઇટલ્સ સાથે ઉપલબ્ધ રહેશે. ઉપરાંત દર્શકોને હિન્દી, તમિલ અને તેલુગુ ભાષામાં ડબિંગનો વિકલ્પ પણ મળશે, જેથી વધુ લોકો પોતાની પસંદગીની ભાષામાં K-ડ્રામાનો આનંદ લઈ શકશે.
ભારતીય દર્શકો માટે ખાસ તૈયાર કરાયું K-કન્ટેન્ટનું મોટું કલેક્શન
પ્રાઇમ વીડિયો ઇન્ડિયામાં SVOD બિઝનેસની ડિરેક્ટર અને હેડ શિલાંગી મુખર્જીએ જણાવ્યું કે ભારતમાં કોરિયન કન્ટેન્ટની લોકપ્રિયતા સતત વધી રહી છે. રસપ્રદ વાર્તાઓ, વિવિધ જૉનર અને યાદગાર પાત્રોના કારણે K-કન્ટેન્ટે ભારતીય દર્શકોમાં મજબૂત સ્થાન બનાવ્યું છે. CJ ENM સાથેની આ નવી ભાગીદારી દ્વારા કોરિયાની શ્રેષ્ઠ અને નવીન વાર્તાઓ હવે વધુ સરળતાથી ભારતીય દર્શકો સુધી પહોંચશે.
આ લોકપ્રિય K-ડ્રામા પણ થશે ઉપલબ્ધ
આ નવી લાઇનઅપની શરૂઆત Yumi’s Cells Season 3થી થશે. આ સિરીઝ અગાઉ અમેરિકા, બ્રાઝિલ, ફ્રાન્સ અને UAE સહિત 81 દેશોમાં સ્ટ્રીમિંગ ચાર્ટમાં ટોચ પર રહી ચૂકી છે. તે ઉપરાંત Filing for Love, The Legend of Kitchen Soldier અને My Bias, My Boss જેવા વૈશ્વિક હિટ શો પણ પ્રાઇમ વીડિયો પર આવશે. CJ ENMની લાઇબ્રેરીમાંથી Dear X, Law in the City, Study Group, My Dearest Nemesis, Search: WWW તેમજ Yumi’s Cellsના પ્રથમ અને બીજા સીઝન પણ ભારતીય દર્શકો માટે ઉપલબ્ધ કરાશે.
આ તમામ શોમાં કિમ યુ-જુંગ, લી જોંગ-સુક, પાર્ક જી-હૂન અને ચા વૂ-મિન જેવા લોકપ્રિય કોરિયન કલાકારો જોવા મળશે. ડ્રામા, થ્રિલર, રોમાન્સ, ફેન્ટસી અને એક્શન જેવા વિવિધ જૉનરના શો આ કલેક્શનનો ભાગ બનશે.
ભારતમાં K-કન્ટેન્ટની વધતી લોકપ્રિયતા પર ભાર
પ્રાઇમ વીડિયો ઇન્ડિયાના ડિરેક્ટર અને કન્ટેન્ટ લાઇસન્સિંગ હેડ મનીષ મેઘાણીએ જણાવ્યું કે ભારતીય દર્શકોમાં કોરિયન કન્ટેન્ટની માંગ ઝડપથી વધી રહી છે. CJ ENM પાસે Legend of the Blue Sea, Prison Playbook, Mother અને A Practical Guide to Love જેવા અનેક લોકપ્રિય ટાઇટલ્સ છે, જે આગામી 2 વર્ષમાં પ્રાઇમ વીડિયો પર રિલીઝ થશે.
CJ ENMના પ્લેટફોર્મ ડિવિઝનના એક્ઝિક્યુટિવ વાઇસ પ્રેસિડેન્ટ જંગહો સિયોએ કહ્યું કે ભારત દુનિયાના સૌથી ઝડપથી વિકસતા એન્ટરટેઇનમેન્ટ બજારોમાંનું એક છે. પ્રાઇમ વીડિયો સાથેની આ ભાગીદારી દ્વારા કોરિયન વાર્તાઓ લાખો નવા ભારતીય દર્શકો સુધી પહોંચશે અને બંને કંપનીઓ વચ્ચેનો સહયોગ વધુ મજબૂત બનશે.
આ સમગ્ર કન્ટેન્ટ પ્રાઇમ વીડિયો સભ્યોને તેમની પ્રાઇમ સભ્યતા હેઠળ કોઈ વધારાની ફી વગર ઉપલબ્ધ રહેશે.
