કેન્દ્રીય સંરક્ષણ મંત્રી રાજનાથ સિંહ 9 અને 10 સપ્ટેમ્બરે શ્રીલંકાની સત્તાવાર મુલાકાતે જશે. આ મુલાકાત દરમિયાન ભારત અને શ્રીલંકા વચ્ચે સંરક્ષણ સહયોગ વધુ મજબૂત કરવા ઉપરાંત હિંદ મહાસાગર વિસ્તારમાં દરિયાઈ સુરક્ષા અંગે મહત્વની ચર્ચા થવાની છે. રાજનાથ સિંહ શ્રીલંકાના રાષ્ટ્રપતિ અનુરા કુમારા દિસાનાયકે, વડાપ્રધાન હરિની અમરસૂર્યા અને સંરક્ષણ મંત્રાલયના સચિવ એર વાઇસ માર્શલ (નિવૃત્ત) સંપથ થુયાકોંથા સાથે મુલાકાત કરે તેવી શક્યતા છે.
સંરક્ષણ કરારની પણ સમીક્ષા થશે
રાજનાથ સિંહની મુલાકાત દરમિયાન ભારત અને શ્રીલંકા વચ્ચે થયેલા સંરક્ષણ સહયોગ કરારના અમલની પણ સમીક્ષા કરવામાં આવશે. આ કરાર એપ્રિલ 2025માં વડાપ્રધાન નરેન્દ્ર મોદીની શ્રીલંકા મુલાકાત દરમિયાન થયો હતો. બંને દેશો વચ્ચે સંરક્ષણ ક્ષેત્રમાં સહયોગ માટે આ પ્રથમ વ્યાપક કરાર છે અને તે 5 વર્ષ માટે અમલમાં છે. તેના હેઠળ બંને દેશો વચ્ચે સૈન્ય સહયોગ માટે એક માળખું તૈયાર કરવામાં આવ્યું છે.
દરિયાઈ સુરક્ષા પર ખાસ ધ્યાન
હિંદ મહાસાગરમાં શ્રીલંકાનું ભૌગોલિક સ્થાન ખૂબ મહત્વનું છે. આ કારણે ભારત માટે શ્રીલંકા સાથે દરિયાઈ સુરક્ષા અને નૌકાદળનો સહયોગ વધારવો મહત્વનો છે. રાજનાથ સિંહની મુલાકાતમાં બંને દેશો વચ્ચે સંયુક્ત સૈન્ય કવાયત વધારવા, સૈનિકોની તાલીમ મજબૂત કરવા અને માનવતાવાદી મદદ તથા આપત્તિ સમયે સાથે મળીને કામગીરી કરવા જેવા મુદ્દાઓ પર પણ ચર્ચા થવાની છે. બંને દેશોની નૌકાદળની મુલાકાતો અને સંરક્ષણ ઉદ્યોગમાં સહયોગ વધારવાની શક્યતાઓ પણ ચર્ચાનો ભાગ બની શકે છે.
ભારત-શ્રીલંકા સંરક્ષણ સંબંધો વધુ મજબૂત બનશે
રાજનાથ સિંહની આ મુલાકાત એવા સમયે થઈ રહી છે જ્યારે ભારત હિંદ મહાસાગર વિસ્તારમાં પોતાના પડોશી દેશો સાથે સુરક્ષા સહયોગ વધુ મજબૂત કરી રહ્યું છે. શ્રીલંકા સાથે સંયુક્ત કામગીરી, સૈનિક તાલીમ અને પ્રાદેશિક સુરક્ષા જેવા મુદ્દાઓ પર પહેલેથી ચર્ચા ચાલી રહી છે. આ મુલાકાતથી બંને દેશોની સેનાઓ વચ્ચે સીધો સહયોગ અને તાલમેલ વધુ મજબૂત થવાની અપેક્ષા છે.
આ મુલાકાત પહેલાં પણ રાજનાથ સિંહનો શ્રીલંકા પ્રવાસ નક્કી થયો હતો. સપ્ટેમ્બર 2023માં તેમની શ્રીલંકા મુલાકાત થવાની હતી, પરંતુ બાદમાં તે રદ કરવામાં આવી હતી. હવે 2026માં યોજાનારી આ મુલાકાતને બંને દેશો વચ્ચેના સંરક્ષણ સંબંધોને નવી દિશા આપવા માટે મહત્વપૂર્ણ માનવામાં આવી રહી છે.
