બાંગ્લાદેશમાં લઘુમતી સમુદાયો પર વધી રહેલા અત્યાચારો અને ધાર્મિક ભેદભાવનો મુદ્દો ફરી એકવાર ગરમાયો છે. પાટનગર ઢાકાના નેશનલ પ્રેસ ક્લબની બહાર શુક્રવારે મોટી સંખ્યામાં લઘુમતી સમુદાયના લોકોએ એકત્રિત થઈને ઉગ્ર વિરોધ પ્રદર્શન કર્યું હતું. આ આક્રોશ હરિદાસ ચંદ્ર તારણી દાસ નામના હિન્દુ વ્યક્તિની મની લોન્ડરિંગના કથિત આરોપો હેઠળ કરાયેલી ધરપકડ સામે હતો. બાંગ્લાદેશ હિન્દુ-બૌદ્ધ-ખ્રિસ્તી એકતા પરિષદ દ્વારા આયોજિત આ દેખાવોમાં નેતાઓએ આક્ષેપ કર્યો છે કે, ગાયબાંધા જિલ્લામાં પ્રભુ શ્રીરામની 81 ફૂટ ઊંચી ભવ્ય પ્રતિમા બનાવવાના પ્રયાસોના કારણે જ તેમને ટાર્ગેટ કરીને જેલમાં ધકેલી દેવાયા છે.
ધરપકડનો વિરોધ અને લઘુમતી નેતાઓની ગંભીર ચિંતા
આંદોલનકારીઓએ હરિદાસની તાત્કાલિક મુક્તિની માંગ કરી છે અને સરકાર પર લઘુમતીઓને હેરાન કરવાનો આરોપ લગાવ્યો છે.
- એકતા પરિષદના જનરલ સેક્રેટરી મનિન્દ્ર કુમાર નાથે ન્યૂઝ એજન્સી ANI સાથે વાત કરતા જણાવ્યું કે, સરકાર દ્વારા 2 થી 3 દિવસ પહેલા હરિદાસની ધરપકડ એ માત્ર એક બહાનું છે. પલાશબારીમાં ભગવાન રામની મૂર્તિ સ્થાપિત કરવા બદલ તેમની સામે આ કિન્નાખોરી રાખવામાં આવી છે જેને લઘુમતી સમાજ ક્યારેય સ્વીકારશે નહીં.
- નેતાઓએ દાવો કર્યો છે કે બાંગ્લાદેશમાં છેલ્લા 2 વર્ષથી બિન-મુસ્લિમ વસ્તી સતત હિંસા અને ડરના ઓથાર હેઠળ જીવી રહી છે.
- આંકડાઓ અનુસાર, છેલ્લા 1 વર્ષમાં દેશભરમાં લઘુમતીઓ વિરુદ્ધ હિંસાની આશરે 3000 ઘટનાઓ બની છે, જેમાં હિન્દુ મંદિરો પર હુમલા અને 66 લોકોની નિર્મમ હત્યાઓ શામેલ છે.
- ગયા મહિને ગાયબાંધા જિલ્લામાં કટ્ટરપંથીઓ દ્વારા ભગવાન રામના ચિત્રની તોડફોડ અને અપમાન કરવામાં આવ્યું હતું, જેની સામે ભારે હોબાળો થયો હતો. આ ઘટના બાદ વાતાવરણ સુધરવાને બદલે રામ ભક્તોને જ જેલમાં પૂરવામાં આવી રહ્યા છે.
વચગાળાની સરકારને અલ્ટીમેટમ અને ભારતનું વલણ
એકતા પરિષદના વરિષ્ઠ નેતા સુબ્રતો ચૌધરીએ દેશની વચગાળાની સરકારને આકરા શબ્દોમાં ચેતવણી આપી છે. તેમણે કહ્યું કે જ્યારે દેશમાં શાંતિ અને સાંપ્રદાયિક સદભાવનું વાતાવરણ બની રહ્યું છે, ત્યારે આવા વિવાદાસ્પદ પગલાં ભરીને સરકારને કોણ બદનામ કરવા માંગે છે તે શોધવું જરૂરી છે. તેમણે સરકારને અલ્ટીમેટમ આપતા કહ્યું કે જો હરિદાસને તુરંત મુક્ત કરવામાં નહીં આવે, તો આવનારા દિવસોમાં દેશના તમામ હિન્દુ, બૌદ્ધ અને ખ્રિસ્તી સમુદાયના લોકો રસ્તા પર ઉતરીને સંયુક્ત રીતે મોટું આંદોલન છેડશે.
આ સમગ્ર વિવાદ વચ્ચે પડોશી દેશ ભારત પણ ચિંતિત છે. ગત 23 જૂને નવી દિલ્હીમાં વિદેશ મંત્રાલયના પ્રવક્તા રણધીર જયસ્વાલે બાંગ્લાદેશ સરકારને કટ્ટરપંથી તત્વો પર લગામ કસવા અને ત્યાં વસતા લઘુમતીઓની સુરક્ષાની ખાતરી આપવા સત્તાવાર રીતે અપીલ કરી હતી. ભારત સરકારે પણ દેવી-દેવતાઓની મૂર્તિઓના અપમાનની ઘટનાઓને ગંભીરતાથી લીધી છે.
