પાકિસ્તાનમાંથી ભારત આવીને શ્રી હેમકુંટ સાહિબના દર્શન કરવા નીકળેલા 104 શીખ તીર્થયાત્રીઓને પાકિસ્તાની અધિકારીઓએ ફ્લાઈટમાં બેસવા દીધા ન હોવાનો મામલો સામે આવ્યો છે. શ્રદ્ધાળુઓ પાસે ભારતના માન્ય વિઝા હોવા છતાં તેમને મુસાફરી કરવાની મંજૂરી આપવામાં આવી નહોતી. આ ઘટનાને કારણે ફૈસલાબાદ આંતરરાષ્ટ્રીય એરપોર્ટ પર તીર્થયાત્રીઓ અટવાઈ ગયા હતા.
એરપોર્ટ પર NOC માંગવામાં આવ્યું
મળતી માહિતી મુજબ, શીખ તીર્થયાત્રીઓનો જથ્થો હેમકુંટ સાહિબની યાત્રા માટે ભારત આવવાનો હતો. તેઓ ફૈસલાબાદ એરપોર્ટ પહોંચ્યા ત્યારે પાકિસ્તાની અધિકારીઓએ તેમને ફ્લાઈટમાં સવાર થવાથી રોક્યા હતા. અધિકારીઓએ યાત્રીઓ પાસેથી NOC એટલે કે ‘નો ઓબ્જેક્શન સર્ટિફિકેટ’ માંગ્યું હતું. જોકે, યાત્રીઓનું કહેવું હતું કે તેમની યાત્રા માટે આવું પ્રમાણપત્ર જરૂરી હોવાની તેમને કોઈ માહિતી આપવામાં આવી નહોતી. તેના કારણે એરપોર્ટ પર સ્થિતિ ગૂંચવાઈ ગઈ હતી અને યાત્રીઓ ત્યાં જ અટવાઈ ગયા હતા.
શ્રદ્ધાળુઓ પાસે પહેલેથી માન્ય વિઝા હતા
આ મામલામાં સૌથી મોટો સવાલ એ છે કે યાત્રીઓ પાસે ભારત આવવા માટે માન્ય વિઝા હોવા છતાં તેમને મુસાફરી કરવાની મંજૂરી કેમ આપવામાં આવી નહીં. અહેવાલો મુજબ, યાત્રીઓ ધાર્મિક યાત્રા માટે ભારત આવવાના હતા અને તેમની પાસે જરૂરી ભારતીય વિઝા હતા. તેમ છતાં એરપોર્ટ પર વધારાની મંજૂરી માંગવામાં આવતા તેમની યાત્રા અટકી ગઈ.
હેમકુંટ સાહિબની યાત્રા માટે નીકળ્યા હતા
હેમકુંટ સાહિબ ઉત્તરાખંડમાં આવેલું શીખ ધર્મનું મહત્વનું તીર્થસ્થળ છે. દર વર્ષે દેશ-વિદેશમાંથી મોટી સંખ્યામાં શ્રદ્ધાળુઓ અહીં દર્શન માટે આવે છે. પાકિસ્તાનમાં રહેતા શીખ સમુદાય માટે પણ ભારતના ઐતિહાસિક ગુરુદ્વારા અને ધાર્મિક સ્થળોની યાત્રા ખાસ મહત્વ ધરાવે છે. બંને દેશો વચ્ચે ધાર્મિક યાત્રાઓ માટે લાંબા સમયથી અલગ વ્યવસ્થા અને કરારો રહ્યા છે.
થોડા દિવસ પહેલાં પણ સામે આવ્યો હતો આવો મામલો
આ ઘટના પહેલા પણ પાકિસ્તાની શીખ તીર્થયાત્રીઓને હેમકુંટ સાહિબ જવા માટે જમીન માર્ગે ભારત આવવાની મંજૂરી ન મળ્યાનો મામલો સામે આવ્યો હતો. વાઘા-અટારી સરહદ મારફતે ભારત આવવાની મંજૂરી ન મળતા પૂર્વ રાજ્યસભા સાંસદ અને પદ્મ ભૂષણથી સન્માનિત તરલોચન સિંહે પાકિસ્તાનના હાઈ કમિશનરને પત્ર લખીને નિર્ણય પર પુનર્વિચાર કરવાની અપીલ કરી હતી. તેમણે ધાર્મિક યાત્રાના મહત્વને ધ્યાનમાં રાખીને શ્રદ્ધાળુઓને જમીન માર્ગે ભારત આવવા દેવાની માંગ કરી હતી.
ભારત-પાકિસ્તાન વચ્ચે તણાવની અસર ધાર્મિક યાત્રા પર
ભારત અને પાકિસ્તાન વચ્ચેના સંબંધોમાં છેલ્લા કેટલાક સમયથી તણાવ રહ્યો છે. તેની અસર બંને દેશોના લોકોની અવરજવર અને ધાર્મિક યાત્રાઓ પર પણ જોવા મળી રહી છે. હવે માન્ય ભારતીય વિઝા ધરાવતા 104 શીખ શ્રદ્ધાળુઓને ફ્લાઈટમાં બેસવા ન દેવાની ઘટના સામે આવતા ફરી એક વખત બંને દેશો વચ્ચે ધાર્મિક યાત્રા માટેની વ્યવસ્થા અને નિયમોને લઈને સવાલ ઊભા થયા છે.
આ મામલે સૌથી મહત્વની વાત એ છે કે યાત્રીઓ પાસે વિઝા હોવા છતાં એરપોર્ટ પર તેમને અટકાવવામાં આવ્યા અને NOCની માંગ કરવામાં આવી. તેના કારણે તેમની હેમકુંટ સાહિબ યાત્રા હાલ અટકી ગઈ છે.
