Sports

ધોનીએ પાકના પૂર્વ કેપ્ટન ઈન્જામામ ઉલ હક વિશે કરી એવી વાત કે લોકો હસી પડ્યાં

Advertisement

મુંબઈ: ભૂતપૂર્વ ભારતીય કેપ્ટન એમએસ ધોની (MS Dhoni) રમતમાંથી લાંબા વિરામનો આનંદ માણી રહ્યા છે. મહેન્દ્ર સિંહ ધોનીએ તાજેતરમાં એક કાર્યક્રમમાં હાજરી આપી હતી જ્યાં તેમણે સફળતાના મંત્ર અને મહેનતના મહત્વ વિશે વાત કરી હતી. ધોનીએ લોકોને તેની વિચારવાની પ્રક્રિયા વિશે પણ જણાવ્યું, જેના કારણે તે એક મહાન ક્રિકેટર અને મહાન કેપ્ટન બની શક્યો. એક ઈવેન્ટમાં એમએસ ધોનીને કેટલાંક ખૂબ જ રમુજી સવાલ પૂછ્વામાં આવ્યા હતા. ધોનીને પૂછવામાં આવ્યું છે કે જો તેમને પાકિસ્તાનના પૂર્વ કેપ્ટન ઈન્ઝમામ ઉલ હક (Inzmam Ul Haq) સાથે રન લેવા માટે દોડવું પડે તો તે શું કરશે? તેના જવાબમાં ધોનીએ કહ્યું કે જ્યારે તે ઈન્ઝમામ ઉલ હક સાથે રન કરશે તો તે ચોક્કસપણે પોતાની સ્પીડ ધીમી કરશે.

હક સાથે દોડતી વખતે સ્પીડ ઓછી કરવી પડે છેઃ ધોની
એમએસ ધોનીએ કહ્યું, ‘જો હું ઈંજી ભાઈ સાથે દોડું તો મારે મારી સ્પીડ ઓછી કરવી જરૂરી છે. જો હું મારી સ્પીડ ઓછી નહીં કરું, તો હું 100% રન આઉટ થઈ જઈશ. ધોનીની આ વાત સાંભળીને લોકો જોરથી હસી પડ્યા. નોંધપાત્ર વાત એ છે કે પાકિસ્તાનના પૂર્વ કેપ્ટનની વિકેટ વચ્ચેની દોડ એટલી સારી ન હતી.

જ્યારે ધોનીએ માત્ર એક મિનિટની ટીમ મીટિંગ પૂરી કરી હતી
ધોનીએ તેની કારકિર્દીની સૌથી ટૂંકી ટીમ મીટિંગને પણ યાદ કરી અને કહ્યું કે ચેન્નાઈ સુપર કિંગ્સ સાથે તેની મુલાકાત IPL દરમિયાન 1 મિનિટ સુધી ચાલી હતી. કોઈપણ રીતે, ધોની તેની ટીમ મીટિંગ ટૂંકી રાખે છે, પછી તે CSK હોય કે ટીમ ઈન્ડિયા. ધોનીએ કહ્યું કે તે મેદાન પર તાજગી અનુભવવા માટે મેચના દિવસોમાં સવારે ઉઠવાનું પસંદ કરે છે. ધોનીએ કહ્યું, ‘અમારી સૌથી ટૂંકી ટીમ મીટિંગ CSKમાં થઈ હતી અને તે માત્ર 1 મિનિટની હતી. તમે કહેશો કે કેવી રીતે ટીમ મીટિંગ માત્ર એક મિનિટની હશે. સાંજે 5.30 કલાકે બેઠક નક્કી કરવામાં આવી હતી. બધા ખેલાડીઓ અને સપોર્ટ સ્ટાફ સાંજે 5:28 વાગ્યે એકઠા થયા હતા. પછી અમે કહ્યું કે બધા આવો અને મીટિંગ શરૂ કરો. અને 5.29 કલાકે મિટીંગ પૂરી થઈ હતી, એટલે કે એક મિનિટની બેઠક હતી.

એમએસ ધોની IPL 2023માં પણ જોવા મળશે
એમએસ ધોનીએ 15 ઓગસ્ટ 2020ના રોજ આંતરરાષ્ટ્રીય ક્રિકેટમાંથી નિવૃત્તિ લીધી હતી. ધોનીએ તેની છેલ્લી આંતરરાષ્ટ્રીય મેચ 2019 વર્લ્ડ કપમાં ન્યૂઝીલેન્ડ સામે રમી હતી. 41 વર્ષીય એમએસ ધોનીએ 350 ODI, 98 T20 આંતરરાષ્ટ્રીય અને 90 ટેસ્ટ મેચમાં 17266 રન બનાવ્યા છે. આ દરમિયાન તેણે 108 અડધી સદી અને 16 સદી ફટકારી હતી. ધોનીની કપ્તાનીમાં ટીમ ઈન્ડિયા ત્રણ આઈસીસી ટાઈટલ જીતવામાં સફળ રહી હતી. આ સાથે જ તેણે CSKને IPLમાં ચાર વખત ચેમ્પિયન બનાવ્યું છે. ધોની આઈપીએલ 2023માં રમવાની પુષ્ટિ કરી ચૂક્યો છે અને તે ચેન્નાઈ સુપર કિંગ્સનું નેતૃત્વ પણ કરશે.

Most Popular

To Top