મહારાષ્ટ્રના ફૂડ એન્ડ ડ્રગ એડમિનિસ્ટ્રેશને ખાદ્ય સુરક્ષા અને સ્વચ્છતાના નિયમોના ગંભીર ઉલ્લંઘન સામે મોટી કાર્યવાહી કરી છે. રાજ્યમાં ચાલેલા ખાસ તપાસ અભિયાન દરમિયાન જાણીતી ફૂડ ચેન ડોમિનોઝ પિઝ્ઝાના 4 આઉટલેટ્સના ફૂડ બિઝનેસ લાઇસન્સ તાત્કાલિક અસરથી સસ્પેન્ડ કરવામાં આવ્યા છે. તેમાંથી 3 આઉટલેટ મુંબઈમાં અને 1 સતારા જિલ્લાના કરાડમાં આવેલું છે.
આ આઉટલેટ્સનું સંચાલન જ્યુબિલન્ટ ફૂડવર્ક્સ લિમિટેડ દ્વારા કરવામાં આવે છે. તપાસમાં કિચનની ગંદકી, જીવાતોનો ઉપદ્રવ, ખાદ્ય પદાર્થોના અયોગ્ય સંગ્રહ અને તાપમાન નિયંત્રણમાં ગંભીર ખામીઓ મળી હતી.
કિચનમાં ગંદકીથી લઈને જીવાતો સુધીની ખામીઓ
FDAની તપાસમાં ફૂડ સેફ્ટી એન્ડ સ્ટાન્ડર્ડ્સ રેગ્યુલેશન, 2011ની શેડ્યૂલ-4 હેઠળના સ્વચ્છતા અને સંચાલનના નિયમોનું ઉલ્લંઘન સામે આવ્યું હતું. તપાસમાં ખાસ કરીને કાચા અને તૈયાર ખોરાકને અલગ રાખવાની વ્યવસ્થા, ફ્રોઝન ફૂડના તાપમાનની દેખરેખ, પેસ્ટ કંટ્રોલ, સફાઈ અને ખાદ્ય સામગ્રીની તારીખો અંગે ગંભીર બેદરકારી મળી હતી.
વિલે પાર્લે વેસ્ટના આઉટલેટમાં અનેક ખામીઓ
મુંબઈના વિલે પાર્લે વેસ્ટ સ્થિત ડોમિનોઝ પિઝ્ઝામાં FDAને અનેક ગંભીર ખામીઓ મળી હતી.
- FSSAIનું ફરજિયાત લાઇસન્સ યોગ્ય રીતે દર્શાવવામાં આવ્યું નહોતું
- પીવાના પાણીની તપાસના રેકોર્ડ ઉપલબ્ધ નહોતા
- કર્મચારીઓની સ્વચ્છતા સુવિધાઓ અંગેના દસ્તાવેજો નહોતા
- કિચનનો પાછળનો દરવાજો, ફ્લોર અને ચિલિંગ રૂમને તાત્કાલિક મરામતની જરૂર હતી
- ફ્રોઝન અને અન્ય ખાદ્ય પદાર્થોના તાપમાનનું યોગ્ય નિયંત્રણ નહોતું
- કાચા અને રાંધેલા ખોરાકને અલગ રાખવાની વ્યવસ્થા નહોતી
બોરીવલી વેસ્ટમાં માત્ર 54% કમ્પ્લાયન્સ સ્કોર
બોરીવલી વેસ્ટના ડોમિનોઝ પિઝ્ઝા આઉટલેટને તપાસ દરમિયાન માત્ર 54%નો કમ્પ્લાયન્સ સ્કોર મળ્યો હતો. FDAની ટીમે અહીં ફૂડ સ્ટોરેજ, તાપમાનની સતત દેખરેખ, નિયમિત ફૂડ ટેસ્ટિંગ, સામાન્ય સ્વચ્છતા અને પેસ્ટ કંટ્રોલમાં ગંભીર બેદરકારી નોંધાવી હતી.
ઘાટકોપરમાં કિચનમાં જીવાતો ફરતી મળી
R City Mall, ઘાટકોપર વેસ્ટના ડોમિનોઝ પિઝ્ઝા આઉટલેટમાં સફાઈ માટે કોઈ યોગ્ય શેડ્યૂલ જાળવવામાં આવતો નહોતો. તપાસ દરમિયાન કિચન અને સ્ટોરેજ વિસ્તારમાં જીવાતો જોવા મળી હતી, જ્યારે પેસ્ટ કંટ્રોલના રેકોર્ડ પણ અધૂરા હતા. આ ઉપરાંત ફર્સ્ટ-ઇન-ફર્સ્ટ-આઉટ (FIFO) અને ફર્સ્ટ-એક્સપાયર્ડ-ફર્સ્ટ-આઉટ (FEFO) પદ્ધતિનું પણ પાલન થતું નહોતું. આવી બેદરકારીથી જૂના અથવા એક્સપાયર થયેલા કાચા માલના ઉપયોગનું જોખમ વધી શકે છે.
મલકાપુરમાં સ્કોર માત્ર 47%
સતારા જિલ્લાના કરાડ વિભાગના મલકાપુર સ્થિત ડોમિનોઝ પિઝ્ઝાને સ્વચ્છતા અને ખાદ્ય સુરક્ષાના ઓડિટમાં માત્ર 47%નો કમ્પ્લાયન્સ સ્કોર મળ્યો હતો. તપાસ દરમિયાન પિઝ્ઝામાં ઉપયોગમાં લેવાતા સોસ, ચિલી ફ્લેક્સ અને ઓરેગાનો જેવા સામાનના પેકેટ પર પેકિંગ અને એક્સપાયરી તારીખ નોંધાયેલી નહોતી.
104 ચેન રેસ્ટોરાંની તપાસ, 5 લાઇસન્સ સસ્પેન્ડ
આ કાર્યવાહી FDA કમિશનર તુકારામ મુંડેના નેતૃત્વમાં 10 જુલાઈથી 11 ઓગસ્ટ 2026 દરમિયાન ચલાવવામાં આવેલા રાજ્યવ્યાપી ખાસ અભિયાનનો ભાગ હતી. આ દરમિયાન કુલ 104 મોટા ચેન રેસ્ટોરાંની તપાસ કરવામાં આવી હતી. આ અભિયાનમાં ડોમિનોઝ પિઝ્ઝા ઉપરાંત KFC, પિઝ્ઝા હટ, મેકડોનાલ્ડ્સ, સબવે, બર્ગર કિંગ, સ્ટારબક્સ અને મોંગિનીસ જેવી જાણીતી ફૂડ ચેનનો પણ સમાવેશ થયો હતો.
તપાસ બાદ:
- 2 ફૂડ બિઝનેસને તાત્કાલિક બંધ કરવાનો આદેશ અપાયો
- 95 આઉટલેટ્સને સુધારા માટે કાયદાકીય નોટિસ અપાઈ
- કુલ 5 ફૂડ બિઝનેસના લાઇસન્સ સસ્પેન્ડ કરાયા
- તેમાં ડોમિનોઝ પિઝ્ઝાના 4 આઉટલેટ્સનો સમાવેશ થાય છે
પિઝ્ઝા હટ પર પણ લાઇસન્સ સસ્પેન્ડ
સતારાના કરાડમાં સેફાયર ફૂડ્સ ઈન્ડિયા લિમિટેડ દ્વારા સંચાલિત પિઝ્ઝા હટના આઉટલેટ સામે પણ કાર્યવાહી થઈ છે. અહીં શાકાહારી અને માંસાહારી પિઝ્ઝા માટે અલગ ઓવન અને પેનનો ઉપયોગ થતો નહોતો. આ ઉપરાંત સોસ અને મસાલાના પેકેટ પર મેન્યુફેક્ચરિંગ અને એક્સપાયરી તારીખ પણ નહોતી.
મુંબઈમાં 3,137 ફૂડ બિઝનેસની તપાસ
FDAએ 25 મે થી 31 જુલાઈ દરમિયાન માત્ર મુંબઈમાં 3,137 હોટલ, રેસ્ટોરાં, ભોજનાલય અને અન્ય ફૂડ બિઝનેસની તપાસ કરી હતી. આ દરમિયાન 764 સુધારા નોટિસ આપવામાં આવી અને 165 ફૂડ બિઝનેસના લાઇસન્સ સસ્પેન્ડ કરાયા હતા. આ જ સમયગાળામાં આરોગ્ય માટે હાનિકારક અને હલકી ગુણવત્તાવાળા આશરે 28.66 લાખ કિલોગ્રામ ખાદ્ય પદાર્થ જપ્ત અથવા નષ્ટ કરવામાં આવ્યા હતા. તેની બજાર કિંમત આશરે ₹55.72 કરોડ હતી.
ભાંડુપના 2 ઢાબા પર પણ કાર્યવાહી
મુંબઈના ભાંડુપ વિસ્તારમાં ગુલશન દા પંજાબી ઢાબા અને મુંબઈ મેટ્રો ઢાબાના લાઇસન્સ પણ સસ્પેન્ડ કરવામાં આવ્યા છે. અહીં દૂષિત પાણીનો ઉપયોગ, યોગ્ય વેન્ટિલેશનનો અભાવ અને પેસ્ટ કંટ્રોલની અછત જેવી ખામીઓ મળી હતી. FDA દ્વારા રાજ્યભરમાં હલકી ગુણવત્તાવાળું દૂધ, ડેરી ઉત્પાદનો, ખુલ્લું ખાદ્ય તેલ અને પ્રતિબંધિત ગુટખા-પાન મસાલા સામે પણ કાર્યવાહી ચાલુ છે.
મોટા બ્રાન્ડ્સની ફૂડ સેફ્ટી પર સવાલ
સામાન્ય રીતે ગ્રાહકો મોટા આંતરરાષ્ટ્રીય અને રાષ્ટ્રીય બ્રાન્ડ્સ પર વધુ વિશ્વાસ રાખે છે. પરંતુ જાણીતી ફૂડ ચેનના આઉટલેટ્સમાં જીવાતો, ગંદકી, તાપમાન નિયંત્રણની ખામી અને એક્સપાયરી તારીખ ન હોવા જેવી બાબતો સામે આવતાં કોર્પોરેટ ફૂડ સેફ્ટી સિસ્ટમ સામે સવાલ ઊભા થયા છે.
FDAનું સ્પષ્ટ વલણ છે કે જ્યાં સુધી સંબંધિત ડોમિનોઝ પિઝ્ઝાના આઉટલેટ્સ શેડ્યૂલ-4ની તમામ જરૂરી શરતો પૂરી નહીં કરે અને ફરી તપાસમાં ક્લીન ચિટ નહીં મેળવે, ત્યાં સુધી તેમનું વ્યાવસાયિક સંચાલન બંધ રહેશે.
