અમેરિકી ગુપ્તચર માહિતી મુજબ, નાટો શિખર સંમેલન દરમિયાન અમેરિકાના રાષ્ટ્રપતિ ડોનાલ્ડ ટ્રમ્પની સુરક્ષા સામે ગંભીર ખતરો ઊભો થયો હતો. ધ ન્યૂયોર્ક ટાઈમ્સના અહેવાલ અનુસાર, ઈરાન સાથે જોડાયેલા ઓપરેટિવ્સને અંકારામાં ટ્રમ્પના ચોક્કસ ઠેકાણા અને તેઓ જે માળે રોકાયા હતા તેની પણ જાણ હોવાની માહિતી અમેરિકી ગુપ્તચર એજન્સીઓને મળી હતી. આ માહિતી બાદ અમેરિકી સિક્રેટ સર્વિસ અને વરિષ્ઠ અધિકારીઓએ ટ્રમ્પને તુર્કીમાંથી સુરક્ષિત રીતે બહાર કાઢવા માટે ગુપ્ત ડિકોય ઓપરેશન હાથ ધર્યું હતું.
ટ્રમ્પના વિમાનને મિસાઈલથી નિશાન બનાવવાનો ભય
આ મામલાથી વાકેફ 2 અમેરિકી અધિકારીઓના જણાવ્યા અનુસાર, ટ્રમ્પ સામેના ખતરાને વિશ્વસનીય અને ચોક્કસ નિશાન ધરાવતા ખતરા તરીકે જોવામાં આવ્યો હતો. ગુપ્તચર માહિતીમાં એવી આશંકા વ્યક્ત કરવામાં આવી હતી કે રાષ્ટ્રપતિને લઈ જતું વિમાન સરફેસ-ટુ-એર મિસાઈલનું નિશાન બની શકે છે. એટલું જ નહીં, નાટો સંમેલન સ્થળની આસપાસ એક વ્યક્તિ શોલ્ડર-ફાયરડ મિસાઈલ સાથે જોવા મળ્યો હોવાની માહિતી પણ સામે આવી હતી. આ પરિસ્થિતિને ધ્યાનમાં રાખીને ટ્રમ્પની તુર્કીથી રવાનગી માટે સામાન્ય પ્રક્રિયાથી અલગ વ્યવસ્થા કરવામાં આવી.
એર ફોર્સ વન બન્યું ડિકોય
8 જુલાઈએ ટ્રમ્પ અંકારાથી અમેરિકા પરત ફરવાના હતા. તે દિવસે તેમણે જૂના મોડલના એર ફોર્સ વનથી ઉડાન ભરવાની ઈચ્છા જાહેર કરી હતી. ટ્રમ્પને આ વિમાનમાં સવાર થતા કેમેરામાં પણ કેદ કરવામાં આવ્યા હતા. પરંતુ આ સમગ્ર દૃશ્ય વાસ્તવિક રવાનગીનો ભાગ નહોતું. અહેવાલ મુજબ, ટ્રમ્પને એર ફોર્સ વનમાંથી એક નાના લશ્કરી વિમાનમાં ગુપ્ત રીતે ખસેડવામાં આવ્યા હતા. આ માટે એરપોર્ટ પર કેટરિંગ કન્ટેનરનો ઉપયોગ કરવામાં આવ્યો હતો.
બીજી તરફ, જૂનું એર ફોર્સ વન ટ્રમ્પના બદલે વ્હાઈટ હાઉસના અધિકારીઓ, સુરક્ષા કર્મચારીઓ અને પત્રકારોને લઈને રવાના થયું. આ રીતે તે ડિકોય વિમાન તરીકે ઉપયોગમાં લેવાયું.
બ્રિટનમાં પણ બદલાયું વિમાન
ગુપ્ત રીતે તુર્કીમાંથી બહાર નીકળ્યા બાદ ટ્રમ્પે બ્રિટનમાં નિર્ધારિત રોકાણ કર્યું. ત્યાં તેમણે અગાઉના એક વિમાનમાં ફરીથી ગુપ્ત રીતે સવાર થયા હતા. ત્યારબાદ તેઓ અંતે કતાર દ્વારા આપવામાં આવેલા બોઈંગ 747-8 વિમાનમાં પરત ફર્યા હતા. ટ્રમ્પની આ સમગ્ર ગુપ્ત રવાનગીની વિગતો ઘણા અઠવાડિયા સુધી જાહેર કરવામાં આવી નહોતી.
ટ્રમ્પે 13 ઓગસ્ટે કરી પુષ્ટિ
13 ઓગસ્ટે ટ્રમ્પે પોતે જ વિમાન બદલવાની વાતની પુષ્ટિ કરી હતી. તેમણે જણાવ્યું હતું કે સિક્રેટ સર્વિસ અને લશ્કરી અધિકારીઓની સલાહ બાદ તેમણે અલગ વિમાનનો ઉપયોગ કર્યો હતો. ટ્રમ્પે સુરક્ષા ખતરો હોવાની વાત પણ સ્વીકારી હતી. જોકે, તેમણે તેની વિગત જાહેર કરી નહોતી અને કહ્યું હતું કે તેમને ઘણી વખત વિવિધ પ્રકારની ધમકીઓ મળતી રહે છે.
અમેરિકી રાષ્ટ્રપતિઓ માટે ગુપ્ત મુસાફરી નવી નથી
જોખમી વિસ્તારોની મુલાકાત દરમિયાન અમેરિકી રાષ્ટ્રપતિઓ માટે ગુપ્ત મુસાફરી અને ડિકોય વ્યવસ્થાનો અગાઉ પણ ઉપયોગ થયો છે. 2023માં રાષ્ટ્રપતિ જો બાઈડને યુક્રેનના કીવની ગુપ્ત મુલાકાત લીધી હતી. તેઓ પહેલા પોલેન્ડ પહોંચ્યા હતા અને ત્યારબાદ ગુપ્ત રીતે રાત્રીની ટ્રેન મારફતે યુક્રેન ગયા હતા.
2019માં ટ્રમ્પે પણ થેન્ક્સગિવિંગ દરમિયાન અફઘાનિસ્તાનની ગુપ્ત મુલાકાત લીધી હતી. તે સમયે તેમની મુસાફરીને એવી રીતે ગોઠવવામાં આવી હતી કે તેઓ ફ્લોરિડાના માર-એ-લાગો એસ્ટેટમાં જ હોવાનો ભાસ રહે. ટ્રમ્પની તાજેતરની તુર્કી મુલાકાતમાં અપનાવવામાં આવેલી આ ગુપ્ત સુરક્ષા વ્યવસ્થા હવે અમેરિકી રાષ્ટ્રપતિની સુરક્ષા અને વિદેશી ગુપ્તચર ખતરાને લઈને ચર્ચાનું કેન્દ્ર બની છે.
