નવી દિલ્હી: દુનિયાના ટોપ-10 અરબપતિઓની યાદીમાં (World’s Top 10 Billionaires List) મોટો ફેરફાર થયો છે અને લાંબા સમયથી નંબર-1 અમીર વ્યક્તિના પદ પર રહેલા ઈલોન મસ્કને (Elon Musk) મોટો ઝટકો લાગ્યો છે. હવે આ તાજ મસ્ક પાસેથી છીનવી લેવામાં આવ્યો છે અને એમેઝોનના (Amazon) સ્થાપક જેફ બેઝોસ (Jeff Bezos) વિશ્વના સૌથી અમીર વ્યક્તિ બની ગયા છે. જેફ બેઝોસે $200 બિલિયન ક્લબમાં પ્રવેશ કરીને આ અદ્ભુત કામ કર્યું છે.
અબજોપતિ જેફ બેઝોસની સંપત્તિમાં છેલ્લા કેટલાક સમયથી સતત વધારો થઈ રહ્યો છે અને હવે તેની મોટી અસર દેખાઈ રહી છે. પહેલા તેમણે વિશ્વના બીજા સૌથી અમીર ફ્રેન્ચ બિઝનેસમેન બર્નાર્ડ આર્નોલ્ટને પાછળ છોડી દીધા હતા ત્યાર બાદ સોમવારે તા. 4 માર્ચના રોજ તેમણે એલોન મસ્કને હરાવીને વિશ્વના સૌથી ધનિક વ્યક્તિની ખુરશી પર કબજો કર્યો છે. જો આપણે બ્લૂમબર્ગ બિલિયોનેર્સ ઈન્ડેક્સ પર નજર કરીએ તો જેફ બેઝોસની નેટવર્થ વધીને 200 બિલિયન ડોલર થઈ ગઈ છે અને આ ક્લબમાં તેમની એન્ટ્રી સાથે તેઓ વિશ્વના સૌથી અમીર વ્યક્તિ બની ગયા છે.
60 વર્ષીય એમેઝોનના સ્થાપક જેફ બેઝોસે નંબર વનની ખુરશી કબજે કરી લીધી હોવા છતાં વર્ષ 2021 પછી તેમને પ્રથમ વખત આ ખિતાબ મળ્યો છે. જોકે, જેફ બેઝોસ અને ઈલોન મસ્કની સંપત્તિમાં તફાવત ઘણો ઓછો છે. બેઝોસ 200 બિલિયન ડૉલરની સંપત્તિ સાથે સૌથી અમીર છે, જ્યારે એલોન મસ્કની નેટવર્થમાં ભારે ઘટાડા પછી પણ 198 બિલિયન ડૉલર છે. છેલ્લા 24 કલાકમાં તેમની સંપત્તિમાં જોરદાર ઘટાડો થયો છે. જો કે, જો આપણે બે અબજપતિઓની સંપત્તિમાં તફાવત વિશે વાત કરીએ તો તે માત્ર 2 અબજ ડોલર છે.
મસ્કના પાછળ રહેવાનું આ મોટું કારણ છે
સોમવારે મસ્કની ઈલેક્ટ્રિક કાર કંપની ટેસ્લાના શેરની કિંમતમાં તીવ્ર ઘટાડો થયો હતો. તેની કિંમત 7.2 ટકા ઘટીને 188.14 ડોલર થઈ હતી. તેનાથી કંપનીની નેટવર્થ તેમજ ઈલોન મસ્કની નેટવર્થ પર અસર પડી હતી. ઈલન મસ્કની નેટવર્થ માત્ર 24 કલાકમાં 17.6 બિલિયન ડોલર (લગભગ રૂ. 1.45 લાખ કરોડ) ઘટી છે. મસ્ક છેલ્લા 9 મહિનાથી સતત વિશ્વના નંબર-1 સૌથી અમીર વ્યક્તિ બન્યા હતા.
વિશ્વના ટોપ-10 અબજોપતિની યાદી
જો આપણે ટોપ-10 બિલિયોનેર્સની યાદીમાં સામેલ અન્ય અબજોપતિઓ પર નજર કરીએ તો, બર્નાર્ડ આર્નોલ્ટ $197 બિલિયન સાથે ત્રીજા સૌથી ધનિક વ્યક્તિ છે. ફેસબુકના માર્ક ઝકરબર્ગ $179 બિલિયન સાથે ચોથા સ્થાને છે, જ્યારે બિલ ગેટ્સ $150 બિલિયન સાથે પાંચમા સ્થાને છે. સ્ટીવ બાલ્મર $143 બિલિયનની નેટવર્થ સાથે છઠ્ઠા સૌથી ધનાઢ્ય વ્યક્તિ છે અને વોરેન બફે $133 બિલિયનની નેટવર્થ સાથે સાતમા સૌથી ધનિક વ્યક્તિ છે. પછીનો નંબર લેરી એલિસનનો છે, જે 129 બિલિયન ડોલર સાથે આઠમાં નંબરે છે. લેરી પેજ $122 બિલિયન સાથે વિશ્વના નવમા સૌથી ધનિક વ્યક્તિ છે, જ્યારે સર્ગેઈ બ્રિનનું નામ $116 બિલિયન સાથે યાદીમાં 10મા સ્થાને આવે છે.
અંબાણી-અદાણીની નેટવર્થમાં વધારો
વિશ્વના ટોચના અબજોપતિઓમાં સામેલ ભારતીય અમીરોની સ્થિતિમાં સતત સુધારો થઈ રહ્યો છે. જ્યારે રિલાયન્સ ઈન્ડસ્ટ્રીઝના ચેરમેન મુકેશ અંબાણી 11મા ક્રમે છે, જ્યારે અદાણી ગ્રુપના ચેરમેન ગૌતમ અદાણી 12માં ક્રમે છે. સંપત્તિની વાત કરીએ તો, મુકેશ અંબાણીની નેટવર્થ $1.24 બિલિયન વધીને $115 બિલિયન થઈ ગઈ છે. ગૌતમ અદાણીની નેટવર્થ $69.8 મિલિયનના વધારા સાથે $104 બિલિયન પર પહોંચી ગઈ છે.
