ઈરાકની ધરતીનો ઉપયોગ કરીને ઈરાનને પછાડવાની તૈયારી, મધ્ય-પૂર્વમાં મહાયુદ્ધના એંધાણ
મધ્ય-પૂર્વ (Middle East) માં તણાવ હવે ચરમસીમાએ પહોંચી ગયો છે. ઈઝરાયેલ અને ઈરાન વચ્ચે ચાલી રહેલા ‘શેડો વોર’ હવે ખુલ્લા જંગમાં પરિવર્તિત થવાના આરે છે. તાજેતરના ગુપ્તચર અહેવાલો અને આંતરરાષ્ટ્રીય મીડિયા રિપોર્ટ્સ અનુસાર, ઈઝરાયેલ હવે ઈરાન પર વળતો પ્રહાર કરવા માટે એક અત્યંત ગુપ્ત અને ખતરનાક પ્લાન પર કામ કરી રહ્યું છે. આ પ્લાન મુજબ, ઈઝરાયેલ ઈરાન પર હુમલો કરવા માટે ઈરાકની ધરતી અને તેની સરહદોનો ઉપયોગ કરી શકે છે.
ઈરાકની ધરતી કેમ બની ઈઝરાયેલ માટે મહત્વની?
ઈઝરાયેલ અને ઈરાન વચ્ચે સીધી સરહદ નથી. તેમની વચ્ચે જોર્ડન અને ઈરાક જેવા દેશો આવેલા છે. ઈરાન સુધી પહોંચવા માટે ઈઝરાયેલી ફાઈટર જેટ્સ અથવા મિસાઈલોએ લાંબુ અંતર કાપવું પડે છે. સૂત્રોના જણાવ્યા અનુસાર, ઈઝરાયેલ ઈરાકની અંદર સક્રિય રહેલા કેટલાક જૂથો અથવા ઈરાકના પશ્ચિમી ભાગોનો ઉપયોગ કરીને ઈરાનના પરમાણુ મથકો અને લશ્કરી અડ્ડાઓને નિશાન બનાવવાની રણનીતિ ઘડી રહ્યું છે. જો ઈઝરાયેલ ઈરાકની ધરતી પરથી ડ્રોન અથવા શોર્ટ-રેન્જ મિસાઈલ છોડવામાં સફળ રહે છે, તો ઈરાન માટે તેને રોકવું લગભગ અશક્ય બની જશે.
ઈરાક સરકારની મુશ્કેલી અને ઈરાનનું વલણ
ઈરાક સરકાર હાલમાં બે પથ્થર વચ્ચે દબાયેલી છે. એકબાજુ ઈરાકની અંદર ઈરાન સમર્થિત અનેક સશસ્ત્ર સંગઠનો (Militias) સક્રિય છે, તો બીજી તરફ અમેરિકાના સૈનિકો પણ ઈરાકમાં હાજર છે. ઈઝરાયેલ જો ઈરાકની ધરતીનો ઉપયોગ કરે છે, તો ઈરાન સીધું જ ઈરાક પર હુમલો કરી શકે છે. ઈરાને પહેલેથી જ ચેતવણી આપી દીધી છે કે જો કોઈ પાડોશી દેશ ઈઝરાયેલને તેના વિરુદ્ધ હવાઈ માર્ગ અથવા ધરતીનો ઉપયોગ કરવા દેશે, તો તેને પણ ઈરાનના ક્રોધનો સામનો કરવો પડશે.
ઈઝરાયેલના ટાર્ગેટ પર શું છે?
ઈઝરાયેલના આ સીક્રેટ મિશનના કેન્દ્રમાં ઈરાનના નીચે મુજબના ઠેકાણાઓ હોઈ શકે છે:
નતાન્ઝ અને ફોર્દો: ઈરાનના અત્યંત સુરક્ષિત પરમાણુ મથકો.
મિશાઈલ લોન્ચ પેડ્સ: જ્યાંથી ઈરાને તાજેતરમાં ઈઝરાયેલ પર હુમલા કર્યા હતા.
રિવોલ્યુશનરી ગાર્ડ્સ (IRGC) ના હેડક્વાર્ટર: ઈરાનની સૌથી શક્તિશાળી લશ્કરી પાંખ.
અમેરિકાની ભૂમિકા અને વધતો ખતરો
અમેરિકા સતત ઈઝરાયેલને સંયમ રાખવાની સલાહ આપી રહ્યું છે, પરંતુ ઈઝરાયેલના વડાપ્રધાન બેન્જામિન નેતન્યાહુએ સ્પષ્ટ કરી દીધું છે કે તેઓ પોતાના દેશની સુરક્ષા માટે કોઈ પણ હદ સુધી જઈ શકે છે. ઈરાકમાં હાજર અમેરિકી દળોને પણ ડર છે કે ઈઝરાયેલના પગલાને કારણે ઈરાન સમર્થિત જૂથો તેમના પર હુમલા તેજ કરી શકે છે.
શું મધ્ય-પૂર્વમાં ત્રીજું વિશ્વયુદ્ધ શરૂ થશે?
સંરક્ષણ નિષ્ણાતો માને છે કે જો ઈઝરાયેલ ઈરાકની ધરતી પરથી કોઈ મોટું ઓપરેશન પાર પાડે છે, તો તે સમગ્ર ક્ષેત્રમાં ભડકો કરી શકે છે. લેબનોનમાં હિઝબુલ્લાહ, યમનમાં હુથી અને ગાઝામાં હમાસ પણ આ યુદ્ધમાં સક્રિયપણે જોડાઈ શકે છે. અત્યારે ઈઝરાયેલના જાસૂસી વિમાનો ઈરાક અને ઈરાનની સરહદો પર સતત નજર રાખી રહ્યા છે, વિશ્વની મહાસત્તાઓ અત્યારે ઈઝરાયેલના આગામી કદમ પર નજર રાખીને બેઠી છે. આ ‘સીક્રેટ મિશન’ સફળ રહેશે કે પછી વિનાશક યુદ્ધ નોતરશે, તે આવનારા દિવસોમાં સ્પષ્ટ થઈ જશે.
