ઇન્ટરનેશનલ ક્રિકેટ કાઉન્સિલ (ICC) એ મોટો નિર્ણય લીધો છે. ICCએ સ્ટાર ખેલાડી (Player) પર 2 વર્ષનો પ્રતિબંધ લગાવ્યો છે. આ ખેલાડી પર 2023માં ભ્રષ્ટાચાર વિરોધી (Anti-Corruption) સંહિતાનું ઉલ્લંઘન કરવાનો આરોપ હતો, જે હવે સાચો સાબિત થયો છે. આ ખેલાડીએ પોતાના પર લાગેલા આરોપો પણ સ્વીકારી લીધા છે. આ ખેલાડી હવે 7 એપ્રિલ 2025 પહેલા કોઈપણ આંતરરાષ્ટ્રીય ક્રિકેટ મેચ રમી શકશે નહીં.
ઇન્ટરનેશનલ ક્રિકેટ કાઉન્સિલે બાંગ્લાદેશ ટીમના ઓલરાઉન્ડર નાસિર હુસૈન પર 2 વર્ષનો પ્રતિબંધ લગાવી દીધો છે. તેમને 6 મહિના માટે સસ્પેન્ડ પણ કરવામાં આવ્યા છે. તમને જણાવી દઈએ કે નાસિરને કોઈ અજાણ્યા વ્યક્તિએ ગિફ્ટ આપી હતી. આ માટે તેમની પાસે ખાસ માંગણી પણ કરવામાં આવી હતી. હુસૈને આ અંગે ન તો બોર્ડને જાણ કરી કે ન તો ભ્રષ્ટાચાર વિરોધી અધિકારીને જાણ કરી હતી. જેના કારણે તેની સામે કાર્યવાહી કરવામાં આવી છે. આવી સ્થિતિમાં હવે તેના પર 7 એપ્રિલ 2025 સુધી પ્રતિબંધ રહેશે.
આ 3 આરોપોમાં સજા ફટકારવામાં આવી છે
કલમ 2.4.3નું ઉલ્લંઘન – નાસિરને iPhone 12 ના રૂપમાં US$750 થી વધુ કિંમતની ભેટ આપવામાં આવી હતી. પરંતુ તેણે ભ્રષ્ટાચાર વિરોધી અધિકારીને આની જાણ કરી ન હતી અને બાદમાં તે અંગે જાણ કરવામાં નિષ્ફળ ગયો હતો.
કલમ 2.4.4 નું ઉલ્લંઘન – નાસિર હુસૈને કોઈપણ અજાણી વ્યક્તિ દ્વારા સંપર્ક કરવામાં આવ્યો હોવાની માહિતી ભ્રષ્ટાચાર વિરોધી અધિકારીને આપી ન હતી.
કલમ 2.4.6નું ઉલ્લંઘન – નાસિરે કેસની તપાસમાં ભ્રષ્ટાચાર વિરોધી અધિકારીને સહકાર આપ્યો ન હતો. આ ઉપરાંત તે નિષ્ફળ ગયો અથવા તેમને આ સંબંધિત મહત્વપૂર્ણ માહિતી આપવાનો ઇનકાર કર્યો હતો.
નાસિર હુસૈનની આંતરરાષ્ટ્રીય કારકિર્દી
32 વર્ષીય નાસિર હુસૈન, 2011 અને 2018 વચ્ચે તમામ ફોર્મેટમાં બાંગ્લાદેશ માટે 115 મેચ રમ્યા, જેમાં 2695 રન બનાવ્યા અને 39 વિકેટ લીધી. નાસિર હુસૈને બાંગ્લાદેશ માટે 19 ટેસ્ટ, 65 વનડે અને 31 ટી-20 મેચ રમી હતી. તે ઢાકા પ્રીમિયર ડિવિઝન ક્રિકેટ લીગમાં પ્રાઇમ બેંક ક્રિકેટ ક્લબ માટે સ્થાનિક રીતે રમે છે.
