સુરત: (Surat) ડોનેટ લાઇફ દ્વારા વધુ એક યુવાનના અંગદાનોને મુંબઇ અને અમદાવાદમાં દાખલ વ્યક્તિઓના શરીરમાં ટ્રાન્સપ્લાન્ટ (Transplant) કરવામાં આવ્યા હતા. ડોક્ટરોની મદદ અને પોલીસના ગ્રીન કોરીડોરની મદદથી માત્ર 92 મીનીટમાં જ મરોલમાં રહેતા જૈન સમાજના અગ્રણીના હૃદયને (Heart) મુંબઇમાં રહેતા યુવકને ટ્રાન્સપ્લાન્ટ કરાયુ હતુ. જ્યારે બંને કિડની અમદાવાદમાં ટ્રાન્સપ્લાન્ટ કરવામાં આવી હતી.
પ્રાપ્ત વિગતો મુજબ મરોલીના રેલવે સ્ટેશનની સામે રહેતા દિનેશ મોહનલાલ છાજેડ (45 વર્ષ) પાલમાં જીનાગ એલ્યુમિનીયમના નામથી સ્લાઇડીંગ દરવાજા અને ગ્લાસ ફિટીંગનો વ્યવસાય કરે છે. તેઓને તા. 11મી જૂનના રોજ રાત્રે સાડા આઠ વાગ્યે બ્લડપ્રેશર વધી જતા તાત્કાલીક નવસારીની પ્રાઇવેટ હોસ્પિટલમાં દાખલ કરાયા હતા. તેમની તબિયત વધારે લથડતા દિનેશભાઇને સુરતની એપલ હોસ્પિટલમાં દાખલ કરાયા હતા. ત્રણ દિવસની સારવાર બાદ તા. 14મી જૂનના રોજ દિનેશભાઇનું મોત થયુ હતું અને ડોક્ટરોએ બ્રેઇનડેડ જાહેર કર્યા હતા. ત્યારબાદ દિનેશભાઇના અંગોનું દાન કરવા માટે તેમના પરિવારને સમજ આપવામાં આવી હતી.
દિનેશભાઇના પત્ની કે જેઓ એલઆઇસીમાં ફરજ બજાવે છે તેઓએ કહ્યું હતું કે, તેઓ જીવનમાં હંમેશા એવું માનતા હતા કે આપણે બીજાને મદદરૂપ થવું જોઈએ. આથી જયારે મારા પતિ બ્રેઈનડેડ છે અને તેમનું મૃત્યુ નિશ્ચિત જ છે ત્યારે શરીર તો બળીને રાખ થઇ જવાનું છે, ત્યારે મારા બ્રેઇનડેડ પતિના અંગોના દાન થકી ઓર્ગન નિષ્ફળતાના દર્દીઓને નવજીવન મળતું હોય તો અંગદાન માટે આપ આગળ વધવુ જોઈએ.
આ અંગે માહિતી આપતા ડોનેટ લાઇફના રાજેશ જૈનએ જણાવ્યું હતું કે, જયાબેનની મંજૂરી બાદ દિનેશભાઇની કિડની અને લિવરનું અમદાવાદની ઝાયડસ હોસ્પિટલમાં 43 વર્ષિય મહિલાને જ્યારે બીજી કિડની આઇકેડીઆરસી હોસ્પિટલમાં 17 વર્ષિય યુવકને ટ્રાન્સપ્લાન્ટ કરાયુ હતુ. જ્યારે હૃદયને સુરતની એપલ હોસ્પિટલથી મુંબઇનું 300 કિલોમીટરનું અંતર માત્ર 92 મીનીટમાં ચાર્ટર પ્લેન મારફતે મુંબઇના 30 વર્ષિય યુવકમાં ટ્રાન્સપ્લાન્ટ કરાયુ હતુ. સુરત અને દક્ષિણ ગુજરાતમાંથી ડોનેટ લાઈફ દ્વારા 386 કિડની, 159 લિવર, 8 પેન્ક્રીઆસ, 33 હૃદય, 14 ફેફસાં અને 290 ચક્ષુઓ કુલ 888 અંગો અને ટીસ્યુઓનું દાન મેળવીને 816 વ્યક્તિઓને નવુંજીવન અને નવી દ્રષ્ટી બક્ષવામાં સફળતા મળી છે.
