બોલિવુડ સુપરસ્ટાર સલમાન ખાન ફરી એકવાર પોતાની સોશિયલ મીડિયા પોસ્ટને લઈને ચર્ચામાં આવ્યા છે. મોડી રાત્રે તેમણે ઇન્સ્ટાગ્રામ પર બે શર્ટલેસ તસવીરો શેર કરી, જે થોડા જ સમયમાં સોશિયલ મીડિયા પર વાયરલ થઈ ગઈ. તસવીરોમાં સલમાન ખાન જીમમાં વર્કઆઉટ બાદ જોવા મળે છે. તેમના માથા પર ટુવાલ છે અને તેઓ જીમના સાધનો પાસે ઉભા છે. જોકે, તસવીરો કરતાં વધુ તેમના કેપ્શને લોકોનું ધ્યાન ખેંચ્યું. સલમાને પોસ્ટ સાથે લખ્યું, ‘જો ડર ગયા, સમજો મર ગયા.’ આ એક લાઇન બાદ સોશિયલ મીડિયા પર અનેક પ્રકારની ચર્ચાઓ શરૂ થઈ ગઈ છે. ઘણા લોકો આને તેમની આગામી ફિલ્મ અથવા પ્રોજેક્ટ સાથે જોડીને જોઈ રહ્યા છે, જ્યારે કેટલાક લોકોનું માનવું છે કે આ તેમના આત્મવિશ્વાસ અને હિંમતનો સંદેશ હોઈ શકે છે. જોકે, સલમાન ખાને આ પોસ્ટનો અર્થ શું છે તે અંગે કોઈ સ્પષ્ટતા કરી નથી. આ પોસ્ટને શેર થયાના થોડા જ કલાકોમાં 13 લાખથી વધુ લાઈક્સ મળી ગયા હતા. લાખો ચાહકોએ કમેન્ટ કરીને સલમાનના લુક અને ફિટનેસના વખાણ કર્યા હતા. કેટલાક લોકોએ તેમને ‘બોલિવુડનો ટાઈગર’ ગણાવ્યો તો કેટલાકે તેમની ફિટનેસને પ્રેરણાદાયક ગણાવી હતી.
તાજેતરમાં સલમાન ખાન વિદ્યાર્થીઓના આંદોલનને સમર્થન આપીને પણ ચર્ચામાં આવ્યા હતા. તેમણે સોશિયલ મીડિયા પર લાંબી પોસ્ટ શેર કરીને વિદ્યાર્થીઓના શાંતિપૂર્ણ વિરોધની પ્રશંસા કરી હતી અને બાદમાં આંદોલનમાં થયેલી હિંસા અંગે દુઃખ વ્યક્ત કર્યું હતું. તેમણે લખ્યું હતું કે આ શરૂઆતથી એક શાંતિપૂર્ણ આંદોલન હતું અને તેનું હિંસક સ્વરૂપ ધારણ કરવું દુઃખદ છે. આ દરમિયાન ઘાયલ થયેલા વિદ્યાર્થીઓ અને તેમના પરિવારો પ્રત્યે તેમણે સંવેદના વ્યક્ત કરી હતી. સલમાને પોતાના સંદેશમાં પેપર લીક જેવા મુદ્દાને ગંભીર ગણાવ્યો હતો. તેમણે કહ્યું હતું કે લાખો વિદ્યાર્થીઓ પોતાના ભવિષ્ય માટે દિવસ-રાત મહેનત કરે છે અને તેમની મહેનત સાથે કોઈપણ પ્રકારનો અન્યાય થવો યોગ્ય નથી. વિદ્યાર્થીઓ સારી શિક્ષણ વ્યવસ્થાની માંગ સાથે એકજૂટ થયા છે અને તેમના માતા-પિતાએ પણ તેમને સાથ આપ્યો છે, જે પ્રશંસનીય છે. તેમણે વિદ્યાર્થીઓના સમર્પણ, મહેનત અને ઈમાનદારીના વખાણ કરતાં જણાવ્યું હતું કે આજની યુવા પેઢી જ આવનારા ભારતનું ભવિષ્ય છે. શિક્ષણ માટે તેમનો જુસ્સો દેશને વધુ મજબૂત બનાવશે અને વિશ્વમાં ભારતનું નામ ઊંચું કરશે.
સલમાન ખાને પોતાના સંદેશમાં એ પણ સ્પષ્ટ કર્યું હતું કે આ મુદ્દાને રાજકીય રંગ આપવો યોગ્ય નથી. તેમના મત મુજબ આ સમગ્ર મુદ્દો વિદ્યાર્થીઓ અને શિક્ષણ વ્યવસ્થા સાથે જોડાયેલો છે અને તેનો શ્રેય પણ વિદ્યાર્થીઓને જ મળવો જોઈએ. તેમણે વિશ્વાસ વ્યક્ત કર્યો હતો કે સરકાર પણ વિદ્યાર્થીઓની ચિંતાઓને ગંભીરતાથી લેશે અને શિક્ષણ વ્યવસ્થાને વધુ મજબૂત બનાવવા માટે જરૂરી પગલાં ભરશે. પોસ્ટના અંતમાં સલમાને પોતાની એક ખાસ ઈચ્છા પણ વ્યક્ત કરી હતી. તેમણે લખ્યું હતું કે ભવિષ્યમાં શિક્ષણ જ સૌથી મોટો ટ્રેન્ડ અને ફેશન બનવું જોઈએ. ભારત એવી સ્થિતિમાં પહોંચે કે દુનિયાભરના વિદ્યાર્થીઓ અહીં ભણવા માટે આવે અને દેશ વૈશ્વિક શિક્ષણ કેન્દ્ર તરીકે ઓળખાય. ત્યારબાદ તેમણે વધુ એક પોસ્ટ કરીને સોનમ વાંગચુકને ઉપવાસ સમાપ્ત કરવાની અપીલ કરી હતી. તેમણે લખ્યું હતું કે વિદ્યાર્થીઓની સુરક્ષા અને શિક્ષણ દેશની પ્રથમ પ્રાથમિકતા હોવી જોઈએ. તેમણે વિશ્વાસ વ્યક્ત કર્યો હતો કે જવાબદાર લોકો સામે કડક કાર્યવાહી થશે અને વિદ્યાર્થીઓએ હવે પોતાના પરિવાર પાસે પરત ફરીને અભ્યાસ પર ધ્યાન આપવું જોઈએ.
સલમાને સોનમ વાંગચુકને સંબોધતા લખ્યું હતું કે હવે આ મુદ્દે આગળ વધવાની જરૂર નથી અને જો જરૂર પડશે તો ભવિષ્યમાં ફરી અવાજ ઉઠાવી શકાય. સાથે જ તેમણે હળવા અંદાજમાં લખ્યું હતું કે જો જરૂર હોય તો તેઓ પોતાના ઘરેથી જમવાનું પણ મોકલી આપશે. સલમાન ખાનની રહસ્યમય પોસ્ટ અને વિદ્યાર્થીઓના મુદ્દે આપેલા નિવેદનો સોશિયલ મીડિયા પર ચર્ચાનો વિષય બન્યા છે. ચાહકો હવે તેમની પોસ્ટનો સાચો અર્થ જાણવા આતુર છે, જ્યારે ઘણા લોકો તેને તેમના આગામી પ્રોજેક્ટ સાથે પણ જોડીને જોઈ રહ્યા છે.
