અયોધ્યામાં ભવ્ય રામ મંદિરના નિર્માણ બાદ હવે શ્રી રામ જન્મભૂમિ તીર્થ ક્ષેત્ર ટ્રસ્ટમાં મુખ્ય કાર્યકારી અધિકારી (CEO)ના પદને લઈને દેશભરના ભક્તો અને વિવિધ ક્ષેત્રોના અનુભવી લોકોમાં ભારે ઉત્સાહ જોવા મળી રહ્યો છે. ટ્રસ્ટના CEO પદ માટે 1000થી વધુ અરજીઓ પ્રાપ્ત થતાં આ પદને લઈને દેશવ્યાપી રસ જોવા મળ્યો છે.માહિતી મુજબ, ટ્રસ્ટ દ્વારા CEOની નિમણૂક માટે અરજી પ્રક્રિયા હાથ ધરવામાં આવી હતી.
આ પદ માટે નિવૃત્ત વરિષ્ઠ સરકારી અધિકારીઓ, વહીવટી અનુભવ ધરાવતા લોકો, કોર્પોરેટ મેનેજમેન્ટ ક્ષેત્રના નિષ્ણાતો તેમજ ધાર્મિક સંસ્થાઓના સંચાલનમાં અનુભવ ધરાવતા ઉમેદવારોએ પણ અરજી કરી છે. મોટી સંખ્યામાં અરજીઓ મળતા પસંદગી પ્રક્રિયા વધુ સ્પર્ધાત્મક બની ગઈ છે. શ્રી રામ જન્મભૂમિ તીર્થ ક્ષેત્ર ટ્રસ્ટ દેશના સૌથી મહત્વપૂર્ણ ધાર્મિક ટ્રસ્ટોમાંનું એક માનવામાં આવે છે. અયોધ્યામાં દરરોજ હજારો અને ખાસ પ્રસંગોએ લાખો શ્રદ્ધાળુઓ દર્શન માટે પહોંચે છે. જો કે આવી સ્થિતિમાં મંદિરના વહીવટ, ભક્તોની સુવિધાઓ, સુરક્ષા, દાન વ્યવસ્થા, વિકાસ કાર્યો અને વિવિધ વિભાગો વચ્ચે સુમેળ જાળવવાની જવાબદારી CEO પર રહેશે.
CEOની ભૂમિકામાં મંદિર પરિસરની કામગીરીનું સંકલન, ભક્તોને સુવિધાઓ ઉપલબ્ધ કરાવવી, ટ્રસ્ટની વિવિધ યોજનાઓને અમલમાં મૂકવી, નાણાકીય અને વહીવટી વ્યવસ્થાને પારદર્શક રીતે સંચાલિત કરવી તેમજ સરકાર અને અન્ય એજન્સીઓ સાથે જરૂરી સંકલન જાળવવું જેવા મહત્વપૂર્ણ કાર્યોનો સમાવેશ થાય છે. ટ્રસ્ટને મળતી દાનની રકમ, મંદિરના વિસ્તરણ, યાત્રાધામ વિકાસ, આધુનિક સુવિધાઓ, પાર્કિંગ, ભક્ત નિવાસ, ડિજિટલ સેવાઓ અને ભવિષ્યના વિકાસ પ્રોજેક્ટોને ધ્યાનમાં લેતા આ પદનું મહત્વ ઘણું વધી ગયું છે. તેથી જ આ જવાબદારી માટે અનુભવી અને કુશળ વ્યક્તિની પસંદગી કરવામાં આવશે.
સૂત્રોના જણાવ્યા અનુસાર, અરજદારોની લાયકાત, વહીવટી અનુભવ, નેતૃત્વ ક્ષમતા અને મોટા સંગઠનનું સંચાલન કરવાની કાબેલિયતના આધારે ચકાસણી કરવામાં આવશે. ત્યારબાદ યોગ્ય ઉમેદવારોને આગળની પસંદગી પ્રક્રિયામાં સામેલ કરવામાં આવશે. અયોધ્યા આજે દેશના સૌથી મોટા ધાર્મિક અને આધ્યાત્મિક કેન્દ્રોમાંનું એક બની રહ્યું છે. રામ મંદિરના લોકાર્પણ બાદ અહીં ભક્તોની સંખ્યામાં સતત વધારો થયો છે. પરિણામે ટ્રસ્ટ માટે વ્યાવસાયિક અને અસરકારક વહીવટની જરૂરિયાત પણ વધી છે.
વિશેષજ્ઞોનું માનવું છે કે આગામી વર્ષોમાં અયોધ્યામાં દેશ-વિદેશથી આવનારા શ્રદ્ધાળુઓની સંખ્યા વધુ વધશે. તેથી આધુનિક મેનેજમેન્ટ, ટેક્નોલોજી આધારિત સેવાઓ, સુરક્ષા વ્યવસ્થા અને યાત્રાળુઓને સરળ સુવિધાઓ ઉપલબ્ધ કરાવવી ટ્રસ્ટની પ્રાથમિકતા રહેશે. આ તમામ કામગીરીમાં CEOની ભૂમિકા નિર્ણાયક રહેશે. 1000થી વધુ અરજીઓ મળવી એ દર્શાવે છે કે દેશભરમાં આ પદ પ્રત્યે ભારે આકર્ષણ છે. હવે ટ્રસ્ટ દ્વારા પારદર્શક અને ગુણવત્તા આધારિત પસંદગી પ્રક્રિયા પૂર્ણ કર્યા બાદ નવા CEOની જાહેરાત કરવામાં આવશે. સમગ્ર દેશના ભક્તોની નજર હવે મહત્વપૂર્ણ નિમણૂક પર ટકેલી છે.
