ચાલતી ટ્રેનમાં પૂજા-પાઠ અને રુદ્રાભિષેકનો વીડિયો સોશિયલ મીડિયા પર વાયરલ થતાં ફરી એકવાર ભારતીય રેલવે ચર્ચાના કેન્દ્રમાં આવી ગયું છે. થોડા દિવસો પહેલાં ટ્રેનના એસી કોચમાં ‘હનીમૂન’ જેવી સજાવટને લઈને વિવાદ થયો હતો, ત્યારે હવે સ્પેશિયલ સેલૂન કોચમાં આયોજિત ધાર્મિક વિધિએ સોશિયલ મીડિયા પર નવી ચર્ચા જગાવી છે. વીડિયો સામે આવ્યા બાદ અનેક લોકોએ સવાલો ઉઠાવ્યા, જ્યારે રેલવે પ્રશાસને સમગ્ર મામલે સ્પષ્ટતા કરીને હકીકત જાહેર કરી છે. વાયરલ વીડિયોમાં ચાલતી ટ્રેનના એક વૈભવી કોચમાં પૂજારી રુદ્રાભિષેક અને પૂજા કરતા જોવા મળે છે. તેમની આસપાસ સફેદ વસ્ત્રોમાં બેઠેલા લોકો ધાર્મિક વિધિમાં જોડાયેલા જોવા મળે છે. આ દૃશ્યો સામે આવતા કેટલાક લોકોએ તેને VIP સુવિધા ગણાવી પ્રશ્નો ઉઠાવ્યા હતા. જોકે ઉત્તર રેલવેએ સ્પષ્ટ કર્યું છે કે આ કોચ કોઈ સરકારી અધિકારી કે VIP માટે ફાળવવામાં આવ્યો નહોતો, પરંતુ ખાનગી પાર્ટીએ નિયમ મુજબ ભાડે લીધો હતો.
રેલવેના જણાવ્યા મુજબ, 8 જુલાઈ 2026ના રોજ એક ખાનગી સંસ્થાએ કોમર્શિયલ ધોરણે સેલૂન કાર બુક કરાવી હતી. આ માટે કુલ 3,08,580 રૂપિયાનું એડવાન્સ ભાડું ચૂકવવામાં આવ્યું હતું. આ સેલૂન કોચને 10 જુલાઈએ નવી દિલ્હીથી મુંબઈ જતી પશ્ચિમ એક્સપ્રેસ (ટ્રેન નંબર 12926) સાથે જોડવામાં આવ્યો હતો. એટલે કે સમગ્ર મુસાફરી દરમિયાન આ કોચ ખાનગી ઉપયોગ માટે આરક્ષિત હતો. રેલવે અધિકારીઓએ જણાવ્યું કે વીડિયોમાં દેખાતી પૂજા તે જ ખાનગી પાર્ટી દ્વારા આયોજિત ધાર્મિક વિધિનો ભાગ હતી. તેમણે સ્પષ્ટ કર્યું કે ભારતીય રેલવેની પ્રાથમિકતા મુસાફરોની સુરક્ષા, સમયપાલન અને ટ્રેનના સરળ સંચાલનની છે. જો કોઈ વ્યક્તિ અથવા સંસ્થા નિયમોનું પાલન કરીને સેલૂન કોચ ભાડે લે છે, તો તે કાયદેસરની પ્રવૃત્તિઓ માટે તેનો ઉપયોગ કરી શકે છે. જોકે દરેક પ્રવૃત્તિ દરમિયાન સુરક્ષા ધોરણો અને રેલવેના તમામ નિયમોનું પાલન કરવું ફરજિયાત રહે છે.
આ વીડિયો વાયરલ થતાં સોશિયલ મીડિયા પર વિવિધ પ્રકારની પ્રતિક્રિયાઓ સામે આવી હતી. કેટલાક યુઝર્સે અગાઉ ટ્રેનમાં નમાજ અને હનીમૂન ડેકોરેશનના વિવાદોની યાદ અપાવીને સવાલ કર્યો હતો કે આવા કિસ્સાઓમાં અલગ-અલગ માપદંડ કેમ અપનાવવામાં આવે છે. એક યુઝરે લખ્યું કે જો અન્ય ધાર્મિક અથવા વ્યક્તિગત પ્રવૃત્તિઓ પર વાંધો ઉઠાવવામાં આવે છે, તો આ મામલે પણ સમાન નિયમો લાગુ થવા જોઈએ. આ પોસ્ટ બાદ ચર્ચા વધુ તેજ બની હતી. વધતા વિવાદ વચ્ચે ઉત્તર રેલવેએ ફરી એકવાર સ્પષ્ટ કર્યું કે સોશિયલ મીડિયા પર તેને VIP સેલૂન તરીકે રજૂ કરવામાં આવી રહ્યો છે, જ્યારે સત્તાવાર રેકોર્ડ પ્રમાણે તે સંપૂર્ણપણે ખાનગી કોમર્શિયલ બુકિંગ હતું. રેલવેના જણાવ્યા મુજબ કોઈ સરકારી વિભાગ, મંત્રી કે અધિકારીને આ કોચ ફાળવવામાં આવ્યો નહોતો. તેથી VIP સુવિધા હોવાના દાવાઓ તથ્યવિહોણા છે.
મીડિયા અહેવાલો અનુસાર, ભારતીય રેલવેના FTR (Full Tariff Rate) નિયમો હેઠળ વ્યક્તિ કે સંસ્થા આખો સેલૂન કોચ ભાડે લઈ શકે છે. જો બુકિંગ કરનાર તમામ નિયમોનું પાલન કરે અને સુરક્ષાને અસર ન થાય તો પોતાની આસ્થા મુજબ ધાર્મિક વિધિ પણ કરી શકે છે. જોકે કોઈપણ કાર્યક્રમથી ટ્રેનના સંચાલનમાં અવરોધ, અન્ય મુસાફરોને અસુવિધા કે સુરક્ષા સાથે બાંધછોડ થવી જોઈએ નહીં. બુકિંગ સમયે સુરક્ષા જમા રકમ અને અન્ય ચાર્જ પણ ચૂકવવા પડે છે.
તાજેતરમાં જ નંદીગ્રામ એક્સપ્રેસમાં ફર્સ્ટ એસી કૂપેને હનીમૂન જેવી સજાવટ કરવામાં આવી હતી. આ મામલે વિવાદ વધતા રેલવે પ્રશાસને સંબંધિત કર્મચારીને સસ્પેન્ડ કર્યો હતો. તપાસમાં સામે આવ્યું હતું કે દંપતીએ ખાનગી ડેકોરેટરને બોલાવ્યો હતો, જેને રેલવેની મંજૂરી વગર કોચમાં પ્રવેશ આપવામાં આવ્યો હતો. રેલવેએ તેને સુરક્ષાની ગંભીર ચૂક ગણાવી હતી. સેલૂન કોચ સામાન્ય ટ્રેનના કોચથી સંપૂર્ણપણે અલગ હોય છે. તેમાં બે બેડરૂમ, જોડાયેલા બાથરૂમ, વિશાળ લિવિંગ રૂમ, ડાઇનિંગ વિસ્તાર અને સંપૂર્ણ સજ્જ રસોડું હોય છે. ઉપરાંત એર કન્ડિશનિંગ, આરામદાયક સોફા, ટીવી, ફ્રિજ, આરઓ પાણી, રસોઈ માટેની તમામ સુવિધાઓ તેમજ એટેન્ડન્ટની વ્યવસ્થા પણ આપવામાં આવે છે. જરૂર પડે તો વધારાના ચાર્જ પર રસોઈયા અને રસોઈની સામગ્રી પણ ઉપલબ્ધ કરાવવામાં આવે છે.
આ પ્રકારના કોચનો ઉપયોગ પરિવાર સાથે ખાનગી પ્રવાસ, નવપરિણિત દંપતીની મુસાફરી, ધાર્મિક યાત્રા, કોર્પોરેટ બેઠક અથવા વિશેષ કાર્યક્રમો માટે કરવામાં આવે છે. સંપૂર્ણ પ્રાઈવસી અને ઘર જેવી સુવિધાઓને કારણે આ સેવા ખાસ લોકપ્રિય માનવામાં આવે છે. ચાલતી ટ્રેનમાં પૂજા-પાઠના વાયરલ વીડિયો બાદ સોશિયલ મીડિયા પર ચર્ચા હજુ પણ ચાલુ છે. જોકે રેલવે પ્રશાસને સ્પષ્ટ કર્યું છે કે આ સમગ્ર પ્રક્રિયા નિયમો અનુસાર ખાનગી બુકિંગ હેઠળ કરવામાં આવી હતી અને તેમાં કોઈ પણ પ્રકારના રેલવે નિયમોનો ભંગ થયો નથી.
