બાગી સાંસદોનું પણ ખુલી શકે છે નસીબ: વિધાનસભા ચૂંટણીને ધ્યાનમાં રાખીને કેન્દ્ર સરકારમાં મોટા ફેરફારની ચર્ચા, ઘણા મંત્રીઓના વિભાગ બદલાઈ શકે છે તો કેટલાક નવા ચહેરાઓને મળી શકે છે સ્થાન
કેન્દ્રની પ્રધાનમંત્રી નરેન્દ્ર મોદી સરકારમાં ટૂંક સમયમાં કેબિનેટ વિસ્તરણ અને મંત્રિમંડળમાં મોટા ફેરફારો થવાની ચર્ચાએ રાજકીય માહોલ ગરમાવ્યો છે.રાજકીય સૂત્રો મુજબ આગામી સંસદના ચોમાસુ સત્ર પહેલાં કેન્દ્ર સરકારમાં વ્યાપક ફેરબદલ થઈ શકે છે. જો આ વિસ્તરણ થાય તો ચૂંટણીલક્ષી રાજ્યોને વિશેષ પ્રાધાન્ય આપવામાં આવે તેવી શક્યતા છે. જોકે સરકાર તરફથી હજુ સુધી કોઈ સત્તાવાર જાહેરાત કરવામાં આવી નથી.
સૂત્રોના જણાવ્યા મુજબ ઉત્તર પ્રદેશ, પંજાબ, પશ્ચિમ બંગાળ, બિહાર, ઝારખંડ અને મહારાષ્ટ્ર જેવા રાજકીય રીતે મહત્વના રાજ્યોને ધ્યાનમાં રાખીને નવા ચહેરાઓને કેબિનેટમાં સ્થાન મળી શકે છે. ખાસ કરીને જ્યાં આગામી સમયમાં વિધાનસભા ચૂંટણી યોજાવાની છે, ત્યાંથી વધુ પ્રતિનિધિત્વ આપીને રાજકીય સંદેશ આપવાનો પ્રયાસ થઈ શકે છે.ઉત્તર પ્રદેશ આગામી રાજકીય વ્યૂહરચનાનું કેન્દ્ર માનવામાં આવી રહ્યું છે. રાજ્યમાંથી કેટલાક નવા સાંસદોને મંત્રીપદ મળવાની શક્યતા વ્યક્ત કરવામાં આવી રહી છે. ભાજપનું માનવું છે કે ઉત્તર પ્રદેશમાં સંગઠન અને સરકાર વચ્ચે વધુ સારું સંતુલન ઉભું કરવા માટે કેટલાક નવા ચહેરાઓને જવાબદારી સોંપવી જરૂરી બની શકે છે.
પંજાબને પણ આ વખતે વધુ મહત્વ મળી શકે છે. અત્યાર સુધી મોદી સરકારમાં પંજાબનું પ્રતિનિધિત્વ મર્યાદિત રહ્યું છે. હવે પંજાબમાંથી એકથી વધુ નવા ચહેરાઓને મંત્રીમંડળમાં સામેલ કરવાની ચર્ચા ચાલી રહી છે. આ પગલું રાજ્યમાં ભાજપના રાજકીય આધારને મજબૂત કરવા માટે મહત્વપૂર્ણ માનવામાં આવી રહ્યું છે.રાજકીય વર્તુળોમાં એવી પણ ચર્ચા છે કે છેલ્લા કેટલાક વર્ષોમાં અન્ય પક્ષોમાંથી ભાજપમાં જોડાયેલા અને હાલમાં પક્ષ સાથે સક્રિય રહેલા કેટલાક નેતાઓને પણ કેન્દ્રમાં તક મળી શકે છે. જો આવું થાય તો તે રાજકીય રીતે મોટો સંદેશ માનવામાં આવશે અને આગામી ચૂંટણી પહેલાં ભાજપ પોતાની રાજકીય સ્થિતિ વધુ મજબૂત બનાવવાનો પ્રયાસ કરશે.
મંત્રિમંડળના સંભવિત ફેરફારમાં માત્ર નવા મંત્રીઓની એન્ટ્રી જ નહીં પરંતુ હાલના કેટલાક મંત્રીઓના વિભાગોમાં પણ ફેરફાર થઈ શકે છે. કેટલાક મંત્રીઓને વધુ મહત્વના વિભાગો મળી શકે છે તો કેટલાકને સંગઠનની જવાબદારી સોંપવામાં આવી શકે છે. ભાજપના સંગઠનાત્મક પુનર્ગઠન સાથે કેબિનેટ ફેરબદલને પણ જોડીને જોવામાં આવી રહ્યું છે.ચર્ચા એવી પણ છે કે સરકાર કામગીરીના આધારે મંત્રીઓનું મૂલ્યાંકન કરી રહી છે. જેમનું પ્રદર્શન સારું રહ્યું છે તેમને વધુ મહત્વપૂર્ણ જવાબદારી મળી શકે છે, જ્યારે કેટલાક નવા ચહેરાઓને પ્રથમ વખત કેન્દ્ર સરકારમાં તક મળવાની શક્યતા છે. સરકાર આગામી ચૂંટણીને ધ્યાનમાં રાખીને યુવા અને પ્રાદેશિક સંતુલન બંને જાળવવા માંગે છે.
રાજકીય વિશ્લેષકોનું માનવું છે કે કેબિનેટ વિસ્તરણ માત્ર વહીવટી પ્રક્રિયા નથી પરંતુ ચૂંટણી પૂર્વેનો મહત્વનો રાજકીય સંદેશ પણ હોય છે. જે રાજ્યોમાં ભાજપને સંગઠન મજબૂત કરવાની જરૂર છે, વધુ પ્રતિનિધિત્વ આપીને પક્ષ મતદારોમાં સકારાત્મક સંદેશ પહોંચાડવા માંગે છે.તાજેતરમાં પ્રધાનમંત્રી નરેન્દ્ર મોદીની દ્રૌપદી મુર્મુ સાથે થયેલી મુલાકાત બાદ કેબિનેટ ફેરબદલની અટકળોને વધુ વેગ મળ્યો હતો. જોકે તે મુલાકાત અંગે સરકાર તરફથી કોઈ સત્તાવાર રીતે કેબિનેટ વિસ્તરણ સાથે સંબંધિત માહિતી આપવામાં આવી નહોતી.
મહારાષ્ટ્ર, પશ્ચિમ બંગાળ અને અન્ય રાજ્યોમાંથી પણ કેટલાક નવા નામ ચર્ચામાં હોવાનું કહેવાઈ રહ્યું છે. એનડીએના સહયોગી પક્ષોના કેટલાક સાંસદોને પણ મંત્રીમંડળમાં સ્થાન મળી શકે છે જેથી ગઠબંધન વધુ મજબૂત બને.ભાજપ સંગઠનમાં પણ મોટા ફેરફારોની તૈયારી ચાલી રહી હોવાનું સૂત્રો જણાવી રહ્યા છે. કેટલીક વરિષ્ઠ વ્યક્તિઓને સરકારમાંથી સંગઠનમાં અને સંગઠનમાંથી સરકારમાં લાવવાનો ફોર્મ્યુલા પણ ચર્ચામાં છે. આ રીતે સરકાર અને સંગઠન બંનેમાં નવી ઊર્જા લાવવાનો પ્રયાસ થઈ શકે છે.
સૂત્રોનું કહેવું છે કે આગામી વિધાનસભા ચૂંટણી પહેલાં સામાજિક સમીકરણ, પ્રાદેશિક સંતુલન, યુવા નેતૃત્વ, મહિલા પ્રતિનિધિત્વ અને ગઠબંધનના તમામ પક્ષોને ધ્યાનમાં રાખીને અંતિમ યાદી તૈયાર થઈ શકે છે. આ કારણસર ઉત્તર પ્રદેશથી લઈને પંજાબ સુધીના અનેક સાંસદોની દિલ્હીમાં રાજકીય હલચલ વધી ગઈ છે.જો કે નોંધનીય વાત એ છે કે અત્યાર સુધી કેન્દ્ર સરકાર કે ભાજપ તરફથી કેબિનેટ વિસ્તરણ અંગે કોઈ સત્તાવાર જાહેરાત કરવામાં આવી નથી. હાલ જે નામો અને ચર્ચાઓ ચાલી રહી છે તે રાજકીય સૂત્રો અને અટકળો પર આધારિત છે. અંતિમ નિર્ણય પ્રધાનમંત્રી નરેન્દ્ર મોદી અને ભાજપના ટોચના નેતૃત્વ દ્વારા લેવામાં આવશે.
આગામી દિવસોમાં કેબિનેટ વિસ્તરણ થાય છે કે નહીં અને કયા નવા ચહેરાઓને મંત્રીપદ મળે છે તેના પર સમગ્ર દેશની નજર રહેશે. ખાસ કરીને ઉત્તર પ્રદેશ, પંજાબ અને અન્ય ચૂંટણીલક્ષી રાજ્યો માટે આ ફેરફાર રાજકીય રીતે ખૂબ મહત્વનો સાબિત થઈ શકે છે.
