મહારાષ્ટ્રના થાણેમાં સ્થિર કારમાં એરબેગ અચાનક ખુલી જતાં 25 વર્ષીય વ્યક્તિનું મોત થયું હતું. મોહિત સોની તરીકે ઓળખાતો આ વ્યક્તિ કાર ડીલર હતો. તે 15 વર્ષ જૂની કારમાં બેઠો હતો ત્યારે વાહનની સલામતી વ્યવસ્થા અચાનક સક્રિય થઈ ગઈ હતી અને એરબેગ ખુલી ગઈ હતી.
એરબેગ એટલી જોરથી ખુલી કે તેને ટક્કરને કારણે ગંભીર ઈજાઓ થઈ હતી. તબીબી સહાય મળે તે પહેલાં જ તેનું વધુ પડતું લોહી વહી જવાથી મૃત્યુ થયું હતુ. તેની ઇજાઓના ચોક્કસ સ્થાન અંગે હજુ સુધી વિગતો જાહેર કરવામાં આવી નથી. આ ઘટના બુધવારે થાણેના કાશીમીરા વિસ્તારમાં બની હતી અને પોલીસે શનિવારે માહિતી જાહેર કરી હતી.
પોલીસે અકસ્માત મૃત્યુનો કેસ નોંધ્યો
થાણે પોલીસના જણાવ્યા અનુસાર પ્રાથમિક તપાસમાં જાણવા મળ્યું છે કે કાર જૂની હોવા છતાં સરકારી રેકોર્ડ મુજબ તેનું માન્ય ફિટનેસ પ્રમાણપત્ર હતું. પોલીસે અકસ્માત મૃત્યુનો કેસ નોંધ્યો છે અને તપાસના ભાગ રૂપે ઓટોમોબાઈલ નિષ્ણાતોની સલાહ લઈ રહી છે.
એરબેગ્સ 200 થી 300 કિમી/કલાકની ઝડપે કામ કરી શકે છે જેના પરિણામે એક શક્તિશાળી આંચકો આવે છે. આ અસરને ઓછી કરવા માટે સીટબેલ્ટ પહેરવો જરૂરી છે. આમ ન કરવાથી ગંભીર ઈજા થઈ શકે છે અથવા તો મૃત્યુ પણ થઈ શકે છે.
એરબેગ શું છે?
એરબેગ એ કારમાં એક સલામતી ઉપકરણ છે. તેમાં સિલિકોન કોટિંગવાળી ફુગ્ગા જેવી કોટનની થેલી હોય છે. સંભવિત અથડામણની જાણ થતાં તે તરત જ સક્રિય થઈ જાય છે જેથી વાહનચાલકના માથા અને છાતીને સ્ટીયરિંગ વ્હીલ, ડેશબોર્ડ અથવા દરવાજા સાથે અથડાવાથી બચાવી શકાય. ડિપ્લોયમેન્ટ પ્રક્રિયા મિલિસેકન્ડમાં થાય છે.
સલામતી માટે એરબેગથી 10 ઇંચનું અંતર જાળવવું મહત્વપૂર્ણ
વૈશ્વિક ઓટોમોટિવ સલામતી માર્ગદર્શિકા અનુસાર ડ્રાઇવરની છાતી અને સ્ટીયરિંગ વ્હીલ વચ્ચે ઓછામાં ઓછું 10 ઇંચનું અંતર હોવું જોઈએ. કારની સીટને પાછળની તરફ ગોઠવો જેથી તમારા પગ સરળતાથી એક્સિલરેટર, બ્રેક અને ક્લચ પેડલ્સ સુધી પહોંચી શકે, જ્યારે તમારી છાતી સ્ટીયરિંગ વ્હીલથી સુરક્ષિત અંતરે રહે. જો સ્ટીયરીંગ વ્હીલ એડજસ્ટેબલ હોય તો તેને નીચે તરફ નમાવો જેથી એરબેગ તમારા ચહેરાને બદલે તમારી છાતી તરફ ફેલાય. આગળની સીટ પર બેઠેલા મુસાફરો ઘણીવાર મુસાફરી દરમિયાન ડેશબોર્ડ પર પગ રાખે છે. આ અત્યંત ખતરનાક છે. જો એરબેગ આ સ્થિતિમાં ફેલાય, તો તેના પરિણામે પગ તૂટી શકે છે અથવા કરોડરજ્જુમાં ઈજા પણ થઈ શકે છે.
