વૈશ્વિક સ્તરે વધી રહેલા રાજકીય તણાવ અને આર્થિક અનિશ્ચિતતા વચ્ચે ભારત પોતાની વૈશ્વિક સ્થિતિ વધુ મજબૂત બનાવવાના પ્રયાસમાં છે. વડાપ્રધાન નરેન્દ્ર મોદી આગામી શુક્રવારથી 6 દિવસના મહત્વપૂર્ણ વિદેશ પ્રવાસે જઈ રહ્યા છે, જેમાં તેઓ કુલ 5 દેશોની મુલાકાત લેશે. આ પ્રવાસ દરમિયાન ઊર્જા, ટેકનોલોજી, સંરક્ષણ, વેપાર અને રોકાણ જેવા અનેક મહત્વપૂર્ણ મુદ્દાઓ પર ચર્ચા થશે. આ પ્રવાસને ભારતની વૈશ્વિક રાજદ્વારી અને આર્થિક વ્યૂહરચનાના દ્રષ્ટિકોણથી ખૂબ જ મહત્વપૂર્ણ માનવામાં આવી રહ્યો છે.
પ્રવાસની શરૂઆત યુનાઇટેડ આરબ એમિરેટ્સ (UAE)થી થશે. અહીં વડાપ્રધાન મોદી UAEના પ્રમુખ શેખ મોહમ્મદ બિન જાયદ અલ નાહયાન સાથે મુલાકાત કરશે. બંને દેશો વચ્ચે છેલ્લા કેટલાક વર્ષોમાં વેપાર અને રોકાણના સંબંધો ખૂબ મજબૂત બન્યા છે. UAE ભારતનું ત્રીજું સૌથી મોટું વેપારી ભાગીદાર દેશ છે. ઉપરાંત, ત્યાં લગભગ 45 લાખ ભારતીયો વસવાટ કરે છે. આ મુલાકાત દરમિયાન પશ્ચિમ એશિયામાં ચાલી રહેલા સંઘર્ષ, વેપાર વધારવા અને ભારતીય નાગરિકોના કલ્યાણ જેવા મુદ્દાઓ પર ચર્ચા થવાની શક્યતા છે. બંને દેશો વચ્ચે નવી રોકાણ યોજનાઓ અને ઊર્જા ક્ષેત્રે સહયોગ અંગે પણ મહત્વપૂર્ણ જાહેરાતો થઈ શકે છે.
UAE બાદ PM મોદી નેધરલેન્ડ જશે. 15થી 17 મે દરમિયાન યોજાનારી આ મુલાકાત દરમિયાન તેઓ નેધરલેન્ડના રાજા વિલેમ-એલેક્ઝાન્ડર અને વડાપ્રધાન રોબ જેટન સાથે મુલાકાત કરશે. અહીં ભારત અને નેધરલેન્ડ વચ્ચે ગ્રીન હાઇડ્રોજન, સેમિકન્ડક્ટર, ઈનોવેશન અને સંરક્ષણ ક્ષેત્રે સહકાર વધારવા અંગે ચર્ચા થશે. વિશ્વભરમાં ટેકનોલોજી અને ચિપ મેન્યુફેક્ચરિંગની વધતી માંગ વચ્ચે આ મુલાકાત ખૂબ મહત્વપૂર્ણ ગણાઈ રહી છે. ત્યારબાદ વડાપ્રધાન મોદી સ્વીડનની મુલાકાત લેશે. અહીં તેઓ સ્વીડનના વડાપ્રધાન ઉલ્ફ ક્રિસ્ટરસન સાથે બેઠક કરશે. આ મુલાકાત દરમિયાન AI, સ્પેસ ટેકનોલોજી, ગ્રીન એનર્જી અને ડિજિટલ ટ્રાન્સફોર્મેશન જેવા ભવિષ્યના ક્ષેત્રોમાં ભાગીદારી મજબૂત બનાવવા પર ભાર મુકવામાં આવશે. ભારત અને સ્વીડન વચ્ચે ટેકનોલોજી અને સ્ટાર્ટઅપ ક્ષેત્રે સહયોગ વધારવા માટે પણ ચર્ચા થવાની શક્યતા છે.
પ્રવાસનો સૌથી ખાસ તબક્કો નોર્વેની મુલાકાત માનવામાં આવી રહ્યો છે. 43 વર્ષ બાદ કોઈ ભારતીય વડાપ્રધાન નોર્વેની સત્તાવાર મુલાકાતે જઈ રહ્યા છે. PM મોદી અહીં યોજાનારી ત્રીજી ‘ઈન્ડિયા-નોર્ડિક સમિટ’માં ભાગ લેશે. આ સમિટમાં નોર્વે ઉપરાંત ડેનમાર્ક, ફિનલેન્ડ, આઇસલેન્ડ અને સ્વીડનના નેતાઓ પણ હાજર રહેશે. સમિટ દરમિયાન બ્લુ ઈકોનોમી, ગ્રીન ટેકનોલોજી, ક્લાઈમેટ ચેન્જ અને સ્વચ્છ ઊર્જા જેવા મુદ્દાઓ પર ચર્ચા થશે. નોર્ડિક દેશો ટેકનોલોજી અને પર્યાવરણ ક્ષેત્રે વિશ્વમાં અગ્રણી ગણાય છે, તેથી ભારત માટે આ ભાગીદારી ભવિષ્યમાં ખૂબ લાભદાયી બની શકે છે.
પ્રવાસના અંતિમ તબક્કામાં વડાપ્રધાન મોદી ઈટાલીની મુલાકાત લેશે. તેઓ ઈટાલીના વડાપ્રધાન જ્યોર્જિયા મેલોનીના આમંત્રણ પર ત્યાં જઈ રહ્યા છે. 19થી 20 મે દરમિયાન યોજાનારી આ મુલાકાતમાં બંને દેશો વચ્ચે ‘જોઈન્ટ સ્ટ્રેટેજિક એક્શન પ્લાન 2025-2029’ પર ચર્ચા થશે. રોકાણ, સ્વચ્છ ઊર્જા, વિજ્ઞાન, ટેકનોલોજી અને ઈન્ફ્રાસ્ટ્રક્ચર ક્ષેત્રે સહકાર વધારવા પર ખાસ ભાર મૂકવામાં આવશે. યુરોપ સાથે ભારતના વ્યાપારિક સંબંધોને વધુ મજબૂત બનાવવાના દ્રષ્ટિકોણથી આ મુલાકાત મહત્વપૂર્ણ માનવામાં આવી રહી છે. આ સમગ્ર પ્રવાસ દરમિયાન ભારતનો મુખ્ય ફોકસ વૈશ્વિક રોકાણ આકર્ષિત કરવાનો, ટેકનોલોજી ક્ષેત્રે નવી ભાગીદારી ઉભી કરવાનો અને વ્યૂહાત્મક સંબંધોને વધુ મજબૂત બનાવવાનો રહેશે. વૈશ્વિક સ્તરે બદલાતા રાજકીય અને આર્થિક સમીકરણો વચ્ચે PM મોદીનો આ પ્રવાસ ભારત માટે મહત્વપૂર્ણ સાબિત થઈ શકે છે.
