APK ફાઈલ અને સ્ક્રીન શેરિંગથી એકાઉન્ટ હેકનો કિસ્સો, ભેજાબાજોએ FD તોડી નાખ્યા બાદ ખાતામાંથી રૂપિયા ટ્રાન્સફર કરી લીધા
વડોદરા, તા. 12
શહેરના સુસેન-તરસાલી રિંગ રોડ વિસ્તારમાં રહેતા નિવૃત્ત બેંક મેનેજર સાથે રૂ.10 લાખની ઠગાઈ કરાઈ છે. બીઓબી લાઈફ સર્ટિફિકેટ અપડેટ કરવાની પ્રક્રિયા દરમિયાન ઠગોએ વિડિયો કોલ દ્વારા સ્ક્રીન શેરિંગ કરાવી અને APK ફાઈલ ડાઉનલોડ કરાવી તેમના બેંક ખાતામાંથી રકમ ટ્રાન્સફર કરી લીધી હતી. ઠગાઈ થઈ હોવાનો અહેસાસ થતાં નિવૃત્ત મેનેજરે છેતરપિંડીની ફરિયાદ નોંધાવી છે.
વડોદરા શહેરના સુસેન તરસાલી રિંગ રોડ ઉપર આવેલી મહાવીર પાર્ક સોસાયટીમાં પરેશ નરહરિપ્રસાદ પંડયા (ઉ.વ. 65) વર્ષ 2020માં બેંક ઓફ બરોડામાંથી સિનિયર મેનેજરની પોસ્ટ પરથી નિવૃત્ત થયા હતા. તા. 8 નવેમ્બર 2025ના રોજ તેમણે બેંક ઓફ બરોડાની વેબસાઈટ પર પેન્શનર લાઈફ સર્ટિફિકેટ માટે ઓનલાઈન માહિતી અપલોડ કરી હતી.
આ પ્રક્રિયા કર્યાના બાદ થોડા જ સમયમાં અજાણ્યા નંબર પરથી કોલ આવ્યો હતો અને લાઈફ સર્ટિફિકેટ વેરિફિકેશન માટે વોટ્સએપ પર વિડિયો કોલ આવશે તેવી માહિતી આપવામાં આવી હતી. ત્યારબાદ બીજા નંબર પરથી વિડિયો કોલ કરીને સ્ક્રીન શેર કરવા જણાવાયું હતું.
સ્ક્રીન શેરિંગ દરમિયાન “BOB Life Certificate Update.apk” નામની ફાઈલ ડાઉનલોડ કરાવવામાં આવી હતી અને અંદાજે 38 મિનિટ સુધી સ્ક્રીન શેર ચાલુ રાખવામાં આવ્યું હતું. આ દરમિયાન ઠગોએ નિવૃત બેંક કર્મચારીના
બેંક ખાતામાં સેવિંગ અને સેલરી બંને એકાઉન્ટમાંથી રૂપિયા 5-5 લાખ મળી રૂ.10 લાખ “Slice Small Finance Bank” ના એકાઉન્ટમાં ટ્રાન્સફર કરી લીધા હતા. જેમાં એક ટ્રાન્ઝેક્શન માટે FD પણ તોડી નાખીને કરવામાં આવ્યો હતો.
ઘટનાની જાણ થતાં જ વૃદ્ધે તમામ બેંક એકાઉન્ટ ફ્રીઝ કરાવ્યા હતા તેમજ જીમેલ પાસવર્ડ બદલ્યો હતો. ઉપરાંત અજાણ્યા ડિવાઈસમાંથી લોગ આઉટ કરીને ડેબિટ કાર્ડ, GPay અને નેટ બેંકિંગ જેવી ડિજીટલ સેવાઓ બંધ કરાવી હતી.
આ બનાવ અંગે વૃદ્ધે મોબાઈલ નંબરના ઉપયોગ કરનાર, APK ફાઈલ બનાવનાર અને પૈસા ટ્રાન્સફર કરનાર તમામ આરોપીઓ વિરુદ્ધ પોલીસ ફરિયાદ નોંધાવી છે.
