મિડલ ઇસ્ટમાં વધતા તણાવની અસર ભારતના શેરબજારમાં પણ સ્પષ્ટ જોવા મળી રહી છે. શુક્રવારના ટ્રેડિંગ સત્ર દરમિયાન સેન્સેક્સ અને નિફ્ટી બંનેમાં ભારે ઘટાડો નોંધાયો હતો. વેચવાલીના દબાણ વચ્ચે નિફ્ટી 50 લગભગ 1.79% ઘટીને 23,216.65ના ઇન્ટ્રાડે નીચા સ્તરે પહોંચ્યો છે, જ્યારે સેન્સેક્સ 1493 પોઇન્ટથી વધુ તૂટીને 74,541.41 સુધી સરકી ગયો હતો. આ અઠવાડિયામાં નિફ્ટી 500ની બજાર મૂડીમાં અંદાજે 17.3 લાખ કરોડનો ઘટાડો નોંધાયો છે. માત્ર શુક્રવારે જ નિફ્ટી 50ની બજાર મૂડીમાં લગભગ 3.3 લાખ કરોડનો ઘટાડો થયો હતો, જ્યારે નિફ્ટી 500માં અંદાજે 8.1 લાખ કરોડનું નુકસાન નોંધાયું. વૈશ્વિક અનિશ્ચિતતા અને વધતા જીઓપોલિટિકલ તણાવને કારણે રોકાણકારો વચ્ચે સાવચેત ભાવના જોવા મળી રહી છે.
બજારમાં ઘટાડાનું એક મુખ્ય કારણ રૂપિયાની પીછેહઠ પણ રહ્યું હતું. શુક્રવારે ડોલર સામે ભારતીય રૂપિયા 92.39ના નવા રેકોર્ડ નીચા સ્તરે પહોંચ્યો છે. મજબૂત ડોલર, નબળા ઇક્વિટી બજારો અને વધતા ક્રૂડ ઓઇલના ભાવને કારણે રૂપિયા પર દબાણ વધતા ડોલર ઇન્ડેક્સ પણ લગભગ ત્રણ મહિનાની ઊંચી સપાટી 92.85 સુધી પહોંચ્યો. વિદેશી સંસ્થાકીય રોકાણકારો (FII) દ્વારા સતત વેચવાલી પણ બજાર પર ભાર બની રહી છે. વૈશ્વિક અનિશ્ચિતતા વધતા ઘણા વિદેશી રોકાણકારો ભારતીય બજારમાંથી પૈસા કાઢી રહ્યા છે. જોકે સ્થાનિક સંસ્થાકીય રોકાણકારો (DII) દ્વારા થતી ખરીદીના કારણે બજારને થોડું સમર્થન મળી રહ્યું છે. કાચા તેલના વધતા ભાવ પણ બજાર માટે ચિંતાનો વિષય બન્યા છે. મધ્ય પૂર્વમાં વધતા સંઘર્ષ અને પુરવઠા શૃંખલા પર સંભવિત અસરના ભયને કારણે બ્રેન્ટ ક્રૂડ ઓઇલનો ભાવ ફરી $100 પ્રતિ બેરલને પાર ગયો છે. તેલના વધતા ભાવ ભારત જેવા આયાત આધારિત દેશો માટે મોંઘવારી અને આર્થિક દબાણ વધારવાની શક્યતા ઊભી કરે છે, જેના કારણે રોકાણકારો સાવચેત બન્યા છે.
