છેલ્લા કેટલાક દિવસોથી દેશમાં અલગ- અલગ જગ્યાઓએ બોમ્બ મૂકાયાના ધમકીભર્યા મેઇલ અને કોલ આવ્યાના વાવડ સતત આવી રહ્યા છે. આવી જ ધમકી વારાણસી, અલીગઢ, મેરઠ, અમરોહા અને આઝમગઢ એમ પાંચ જિલ્લા કોર્ટને આજે મળી હતી. બધી કોર્ટોને એકસરખા પ્રકારની ધમકીભર્યો ઇ-મેઇલ પ્રાપ્ત થયો હતો. આ ધમકી મળતા વહીવટીતંત્રમાં ખળભળાટ મચી ગયો હતો. ઇ-મેઇલમાં કોર્ટ પરિસરમાં વિસ્ફોટક સામગ્રી રાખવામાં આવી હોવાનો ઉલ્લેખ કરવામાં આવ્યો હતો, જેના કારણે તાત્કાલિક સુરક્ષા ચક્ર સક્રિય કરવામાં આવ્યું હતું. સાવચેતીના પગલા તરીકે, તમામ સંબંધિત કોર્ટ પરિસર ખાલી કરાવવામાં આવ્યા હતા અને સઘન સર્ચ ઓપરેશન શરૂ કરવામાં આવ્યું હતું. ધમકી મળ્યા બાદ કોર્ટમાં ચાલી રહેલી તમામ સુનાવણીઓ રોકી દેવામાં આવી અને ન્યાયાધીશો, વકીલો, કર્મચારીઓ તેમજ હાજર નાગરિકોને સલામત સ્થળે ખસેડવામાં આવ્યા હતા. પોલીસ દ્વારા સમગ્ર કોર્ટ પરિસરની સઘન તપાસ હાથ ધરાઈ હતી. બોમ્બ નિરોધક દળ, ડૉગ સ્ક્વૉડ અને ફોરેન્સિક ટીમોને પણ તપાસ માટે બોલાવવામાં આવી હતી. જેમાં દરેક કોર્ટ પરિસરમાં દરેક રૂમમાં ચકાસણી કરવામાં આવી હતી, પાર્કિંગ વિસ્તારો અને આસપાસના સંવેદનશીલ સ્થળોની પણ તપાસ કરવામાં આવી હતી.
તપાસ દરમિયાન અત્યાર સુધી કોઈ વિસ્ફોટક સામગ્રી કે શંકાસ્પદ વસ્તુ મળી આવી નથી. તેમ છતાં સુરક્ષા તંત્ર દ્વારા મામલાને ખૂબ જ ગંભીરતાથી લેવામાં આવી રહ્યો છે. કોર્ટ પરિસરો તેમ જ આસપાસના વિસ્તારોમાં વધારાની પોલીસ ફોર્સ તૈનાત કરવામાં આવી છે. રાજ્યના અન્ય જિલ્લાઓમાં પણ સાવચેતીરૂપે સુરક્ષા વધારી દેવામાં આવી છે.આ કેસમાં પોલીસ અને સાઇબર સેલે સંયુક્ત રીતે તપાસ શરૂ કરી હતી. ઇ-મેઇલ કયા આઈપી એડ્રેસ પરથી મોકલવામાં આવી, કયા સર્વરનો ઉપયોગ થયો અને તેનો સ્ત્રોત ક્યાં સુધી પહોંચે છે તે અંગે ટેક્નિકલ વિશ્લેષણ કરવામાં આવી રહ્યું છે. પ્રાથમિક તપાસના આધારે શોધખોળ દરમિયાન, પરિસરમાં ફરતા ત્રણ શંકાસ્પદોની અટકાયત કરવામાં આવી હતી અને તેમને પોલીસ સ્ટેશન લઈ જવામાં આવ્યા હતા. પોલીસે ત્રણ સંશયિતોને અટકાયત કરી છે. તેમની પાસેથી પૂછપરછ ચાલી રહી છે અને ધમકી પાછળ કોઈ સંગઠિત જૂથ છે કે નહીં તે અંગે પણ તપાસ કરવામાં આવી રહી છે. અધિકારીઓએ જણાવ્યું છે કે આ પ્રકારની ખોટી ધમકીઓથી કાયદા-વ્યવસ્થા ખલેલ પહોંચાડવાનો પ્રયાસ કરવામાં આવે છે, પરંતુ સુરક્ષા તંત્ર સંપૂર્ણ સતર્ક છે. રાજ્યભરમાં હાઈ અલર્ટ જાહેર કરાયું છે અને તમામ મહત્વના સરકારી મકાનો, કોર્ટો અને જાહેર સ્થળોએ ચુસ્ત બંદોબસ્ત ગોઠવાયો છે.
