કંપની ઇન્ડિયા તથા અલગ અલગ દેશમાં ટૂરના પેકેજ આપતા હોવાનું કહી બિઝનેસમેન મહિલા પાસેથી નાણા ખંખેર્યા
મહિલા અમદાવાદ એરપોર્ટ પર ગયા ત્યારે ઠગોએ મોકલેલી ટિકિટ ખોટી હોવાનું જાણવા મળ્યું
વડોદરા: કલાલી વિસ્તારમાં રહેતા અને ટ્રાવેલ્સનો બિઝનેસ કરતા મહિલાને બુકિંગ અને વિયેતનામ નામનું બુકિંગ કરી આપવાના બહાને ઠગોએ રૂપિયા 1.95 કરોડ ઓનલાઇન અલગ બેંક ખાતામાં ટ્રાન્સફર કરાવડાવ્યા હતા. મહિલા અમદાવાદ એરપોર્ટ ખાતે ગયા ત્યારે પ્લેનની ટિકિટ બોગસ હોવાનું જાણવા મળ્યું હતું. જેથી મહિલાએ સાયબર ક્રાઇમ પોલીસ સ્ટેશનમાં ઠગો વિરુદ્ધ ફરિયાદ નોંધાવી છે.
કલાલી વિસ્તારમાં આવેલી વિસેન્ઝા હાઈડેક -2માં રહેતા કવિતાબેન જયદેવ સુરાજ (ઉં.વ.46) piccadilly journeys ના નામથી ટ્રાવેલ્સનો બિઝનેસ કરે છે.
ગત માર્ચ મહિનામાં મહિલાને એક અજાણી આઈડી પરથી મેલ આવ્યો હતો. જેમાં તેઓ STH JOURNEY SOLUTIONS PRIVATE LIMITED કંપનીથી અલગ અલગ પેકેજ આપે છે અને જેઓની ઇન્ડીયામા તથા અલગ અલગ દેશોમાં પણ તેમની ઓફીસ આવેલી છે. જેથી તેઓની સાથે ઇ-મેઇલ ઉપર વાતચીત કરી હતી. તેઓના અલગ અલગ પેકેજ ઈમેલ તથા વોટ્સએપથી કમીશન કઢાવી તેમના ગ્રાહકોને મોકલ્યા હતા.
મહિલાએ તેમની કંપની સાથે કેટલાક વ્યવહારો કરતા સમયસર પેમેન્ટ આવી ગયું હોય તેમના પર વિશ્વાસ આવી ગયો હતો. ત્યારબાદ તેઓની સાથે રૂ.7.73 લાખનું બુકિંગ કરાવ્યું હતું. ગત 5 મેના રોજના મહિલાને દુબઈના પેકેજનો એક ઈમેલ આવ્યો હતો. જેમાં 85 હજારનું પેકેજ હતું. જે ગ્રાહકે રૂપીયા ચૂકવી આપ્યા હતા. શરુઆતમાં તેઓના જૈન યુવા ગ્રુપના 30 લોકો માટેનું પેકેજ બૂક કરાવ્યુ હતું. જે પાછળથી વધારીને 64 લોકો માટે કરાવ્યું હતુ. આ ઉપરાંત તેઓએ વિયેતનામ માટેનું દિવાળીનું પેકેજ ઇમેલથી 17 જૂનના રોજ આપ્યું હતું. આમ તેઓને દુબઈ તેમજ વિયેતનામના પેકેજના રૂપીયા 90.87 લાખ બેંક મારફતે તેમજ રૂ.1.04 કરોડ આંગડીયા મારફતે તેઓને મોકલી આપ્યા હતા. દુબઈના પેકેજ માટેની ફલાઇટ 8 ઓગસ્ટના રોજ હતી. જેના માટે મહિલા અમદાવાદ એરપોર્ટ ખાતે ગયા હતા. સામાવાળાએ મોકલેલી પ્લેનની ટિકિટ ખોટી હોવાનુ એરપોર્ટ ઉપરથી જાણવા મળ્યું હતું અને તેમની સાથે છેતરપીંડી થઇ હોવાની જાણ થઈ હતી.
આ ઉપરાંત મહિલા પાસે 16 જૂનના રોજ 1 લાખની ફલાઈટ ટીકીટ કરાવી, જે તેઓએ બુક કરાવી હતી તે પણ હાલમાં ચેક કરતા કેન્સલ કરાવી દીધી હોવાનું જાણવા મળ્યું હતું. મહિલાએ દુબઇ અને અબુધાબીનું પેકેજ રૂ.3.25 લાખમાં ખરીદ્યું હતું. જે પેકેજમાં દુબઈ જવાની ફ્લાઈટ ટિકિટ તથા હોટેલનુ બૂકિંગ કરાવી આપ્યુ હતું. પરંતુ તેઓની અબુધાબી કોઈ સુવિધા તેમજ રિટર્ન ટિકિટ પણ આપી નથી.
આમ ભેજાબાજોએ દુબઈ અને વિયેતનામ નામના પેકેજ આપવાના મહિલા પાસેથી રૂપિયા 1.95 કરોડ ટ્રાન્સફર કરાવડાવી બુકિંગ નહીં કરી આપીને તેમની સાથે છેતરપિંડી આચરી હોય મહિલાએ સાયબર ક્રાઇમ પોલીસ સ્ટેશનમાં ઠગાઈની ફરિયાદ નોંધાવી છે.
