નવી દિલ્હીઃ ભારતીય ક્રિકેટ ટીમે ઓસ્ટ્રેલિયા સામે પર્થ ટેસ્ટમાં 295 રનથી રેકોર્ડબ્રેક જીત હાંસલ કરી હતી. ઓસ્ટ્રેલિયાની ધરતી પર ભારતીય ટીમની આ સૌથી મોટી ટેસ્ટ જીત હતી. આ જીત સાથે ભારતીય ટીમે પાંચ મેચની ટેસ્ટ સિરિઝમાં 1-0ની લીડ મેળવી લીધી છે. હવે બંને ટીમો વચ્ચે બીજી ટેસ્ટ 6 ડિસેમ્બરથી એડિલેડ ઓવલ ખાતે રમાશે.
છેલ્લી ટેસ્ટ મેચ પિંક બોલથી રમાવાની હોવાથી ભારતીય ટીમ પિંક બોલથી જોરશોરથી પ્રેક્ટિસ કરી રહી છે. આ સિરિઝમાં ભારતીય ટીમ 30 જાન્યુઆરીથી મનુકા ઓવલ ખાતે PM ઇલેવન સામે પિંક બોલથી બે દિવસીય પ્રેક્ટિસ મેચ પણ રમશે. બીજી તરફ બીજી ટેસ્ટ પહેલા ભારતીય ટીમ માટે એક મોટા સમાચાર સામે આવ્યા છે.
પર્થ ટેસ્ટમાંથી બહાર થયેલા સ્ટાર બેટ્સમેન શુભમન ગિલે પ્રેક્ટિસ શરૂ કરી દીધી છે. પર્થ ટેસ્ટ પહેલા ઈન્ડિયા A સામેની પ્રેક્ટિસ મેચ દરમિયાન શુભમનને ડાબા હાથના અંગૂઠામાં ઈજા થઈ હતી. શુભમને આજે 29 નવેમ્બરે મનુકા ઓવલ ખાતે વરસાદ વચ્ચે પ્રેક્ટિસ કરી હતી. તેણે પહેલા થ્રો-ડાઉનનો સામનો કર્યો. લગભગ અડધા કલાક પછી તેણે નેટમાં પ્રસિદ્ધ કૃષ્ણ, આકાશ દીપ અને યશ દયાલનો સામનો કર્યો હતો.
હવે એવી પૂરી આશા છે કે શુભમન ગિલ બીજી ટેસ્ટમાં પસંદગી માટે ઉપલબ્ધ રહેશે. જો ગિલ બીજી ટેસ્ટમાં રમે છે તો કેએલ રાહુલે લોઅર મિડલ ઓર્ડરમાં બેટિંગ કરવી પડશે. રાહુલે પર્થ ટેસ્ટમાં ઓપનિંગ કર્યું હતું પરંતુ રોહિત શર્માની વાપસી બાદ હવે તેના માટે ઓપનિંગ સ્લોટ ઉપલબ્ધ નથી.
29 નવેમ્બરે ભારતીય કેપ્ટન રોહિત શર્માએ પણ નેટ્સમાં પ્રેક્ટિસ કરી હતી. રોહિત અંગત કારણોસર પ્રથમ ટેસ્ટમાંથી બહાર થઈ ગયો હતો. રોહિત મનુકા ઓવલ ખાતે પહેલા નેટ સુધી પહોંચ્યો હતો. ત્યાર બાદ યશસ્વી જયસ્વાલ અને વિરાટ કોહલી પણ આવ્યા હતા. જોકે, જસપ્રિત બુમરાહ, મોહમ્મદ સિરાજ અને હર્ષિત રાણા નેટ્સમાં બોલિંગ કરી શક્યા ન હતા.
ઓસ્ટ્રેલિયા પ્રવાસ માટેની ભારતીય ટીમઃ રોહિત શર્મા (કેપ્ટન), જસપ્રિત બુમરાહ (વાઈસ-કેપ્ટન), યશસ્વી જયસ્વાલ, અભિમન્યુ ઈશ્વરન, શુભમન ગિલ, વિરાટ કોહલી, કેએલ રાહુલ, ઋષભ પંત (વિકેટકીપર), સરફરાઝ ખાન, ધ્રુવ જુરેલ (વિકેટકીપર) , રવિચંદ્રન અશ્વિન , રવિન્દ્ર જાડેજા , મોહમ્મદ સિરાજ , આકાશ દીપ , પ્રસિદ્ધ કૃષ્ણ , હર્ષિત રાણા , નીતિશ કુમાર રેડ્ડી , વોશિંગ્ટન સુંદર, દેવદત્ત પડિકલ.
બીજી ટેસ્ટ માટે ઓસ્ટ્રેલિયાની ટીમઃ પેટ કમિન્સ (કેપ્ટન), સ્કોટ બોલેન્ડ, એલેક્સ કેરી, જોશ હેઝલવૂડ, ટ્રેવિસ હેડ, જોશ ઈંગ્લિસ, ઉસ્માન ખ્વાજા, માર્નસ લાબુશેન, નાથન લિયોન, મિશેલ માર્શ, નાથન મેકસ્વીની, સ્ટીવ સ્મિથ, મિશેલ સ્ટાર્ક, બેઉ વેબસ્ટર.
