લોકસભા સ્પીકર પદ માટે સત્તાધારી NDA અને વિપક્ષી ગઠબંધન વચ્ચે કોઈ સમજૂતી થઈ નથી અને હવે સ્પીકર પદ માટે ચૂંટણી થશે. એનડીએ તરફથી ઓમ બિરલા અને વિપક્ષી ગઠબંધન તરફથી કે સુરેશ લોકસભા સ્પીકર પદના ઉમેદવાર હશે. ભારતીય લોકશાહીના ઈતિહાસમાં આ બીજી વખત બનશે જ્યારે સ્પીકર પદ માટે ચૂંટણી યોજાશે. ચૂંટણી આવતીકાલે એટલેકે બુધવારે યોજાશે.
કોંગ્રેસે લોકસભામાં તેની પાર્ટીના સાંસદોને ત્રણ લીટીનો વ્હીપ જારી કરીને આવતીકાલે એટલે કે 26 જૂને ગૃહમાં હાજર રહેવા જણાવ્યું હતું. પત્રમાં કહેવામાં આવ્યું છે કે આવતીકાલે લોકસભામાં એક ખૂબ જ મહત્વપૂર્ણ મુદ્દો ઉઠાવવામાં આવશે. લોકસભામાં કોંગ્રેસ પાર્ટીના તમામ સભ્યોને વિનંતી કરવામાં આવે છે કે તેઓ સવારે 11 વાગ્યાથી ગૃહ સ્થગિત થાય ત્યાં સુધી ગૃહમાં હાજર રહે. આ સંદેશ ખૂબ જ મહત્વપૂર્ણ ગણવામાં આવે.
બીજી તરફ લોકસભાના ઉભાધ્યક્ષ પદ માટે કોંગ્રેસ દ્વારા પોતાના ઉમેદવારનું નામ જાહેર કરવા પર ટીએમસી નારાજ થઈ છે. કોંગ્રેસના સાંસદ કે. સુરેશના દાવા પર તૃણમૂલ કોંગ્રેસ (TMC)એ નારાજગી વ્યક્ત કરી છે. પાર્ટીના સાંસદ અભિષેક બેનર્જીએ કહ્યું કે આ અંગે અમારી સાથે કોઈ ચર્ચા થઈ નથી. કમનસીબે આ એકતરફી નિર્ણય છે. અભિષેકના નિવેદન પર રાહુલે કહ્યું- જય સંવિધાન.
લોકસભા અધ્યક્ષની ચૂંટણી 26 જૂને યોજાવાની છે. નિષ્ણાતોના મતે જો વિપક્ષ આ ચૂંટણી દરમિયાન મતોના વિભાજનનો આગ્રહ રાખે છે તો પેપર સ્લિપ દ્વારા મતદાન કરવામાં આવશે, કારણ કે નવા ગૃહમાં સભ્યોને હજુ સુધી બેઠકો ફાળવવામાં આવી નથી. આવી સ્થિતિમાં, ઇલેક્ટ્રોનિક ડિસ્પ્લે સિસ્ટમનો ઉપયોગ કરી શકાતો નથી. એનડીએ તરફથી ઓમ બિરલા ઉમેદવાર છે, જ્યારે વિપક્ષી ગઠબંધન ઈન્ડિયા બ્લોકે કોડીકુનીલ સુરેશને મેદાનમાં ઉતાર્યા છે. બંધારણીય નિષ્ણાત અને લોકસભાના ભૂતપૂર્વ મહાસચિવ પીડીટી આચાર્યએ પીટીઆઈને જણાવ્યું હતું કે દરખાસ્તો જે ક્રમમાં પ્રાપ્ત થઈ છે તે પ્રમાણે એક પછી એક મૂકવામાં આવશે. જો જરૂરી હોય તો, આનો નિર્ણય મતોના વિભાજન દ્વારા લેવામાં આવશે.
તેમણે કહ્યું- જો ગૃહમાં ધ્વનિ મત દ્વારા સ્પીકરના નામનો પ્રસ્તાવ સ્વીકારવામાં આવે છે, તો અધ્યક્ષતા કરનાર ઓફિસર જાહેર કરશે કે કયા સભ્ય ગૃહના અધ્યક્ષ તરીકે ચૂંટાયા છે. તે પછીની દરખાસ્તને મતદાન માટે મૂકશે નહીં. પરંતુ જો વિપક્ષ મતોના વિભાજનની માંગ કરે છે, તો ગૃહનો સ્ટાફ સાંસદોને સ્લિપનું વિતરણ કરશે અને આ સ્લિપ દ્વારા મતદાન કરવામાં આવશે. નિષ્ણાતે કહ્યું કે 18મી લોકસભાના સભ્યોને નવી સંસદમાં બેઠકો ફાળવવામાં આવી નથી, તેથી ઇલેક્ટ્રોનિક ડિસ્પ્લે સિસ્ટમનો ઉપયોગ કરી શકાતો નથી. પેપર સ્લિપના ઉપયોગને કારણે પરિણામ આવવામાં થોડો સમય લાગશે.
જો બિરલા જીતશે તો તેઓ ફરીથી સ્પીકર બનનાર પ્રથમ બીજેપી સાંસદ હશે
એનડીએ તરફથી ઓમ બિરલા ફરી સ્પીકર ઉમેદવાર છે. રાજસ્થાનના કોટાના સાંસદ ઓમ બિરલા 2019 થી 2024 સુધી સ્પીકર રહ્યા છે. જો તેઓ જીતી જાય છે, તો તેઓ સતત બીજી વખત લોકસભા અધ્યક્ષનું પદ સંભાળનાર પ્રથમ બીજેપી સાંસદ હશે. જો તેઓ તેમનો કાર્યકાળ પૂર્ણ કરશે તો તેઓ કોંગ્રેસના બલરામ જાખડના રેકોર્ડની બરાબરી કરશે.
