દરેકના અલગ અલગ શોખ હોય છે અને એ શોખને ફેશનમાં કેવી રીતે પરિવર્તિત કરવા એ પણ લોકો શોધી જ લેતા હોય છે ત્યારે ફિંગર રિંગ લવર માટે આજે એવી રિંગ ડીમાંડમાં છે જેનાથી તેમનો રિંગ પહેરવાનો શોખ પણ જળવાય રહે છે અને સાથે સાથે સમય જોવા માટે પણ આ રિંગ ઉપયોગી બને છે. આજકાલ માર્કેટમાં એવી ફિંગર રિંગનો ટ્રેન્ડ જોવા મળી રહ્યો છે જેમાં વોચનો પણ સમાવેશ થઈ જાય છે. પહેલા લોકો સમય જોવા માટે ખાસ ઘડિયાળ પહેરતા હતા પણ હવે મોબાઈલ હાથવગો હોવાને કારણે કેટલાક લોકો ઘડિયાળ પહેરવાનું ટાળે છે પણ અવનવા કલર અને ડિઝાઇનમાં મળતી આકર્ષક વોચ વિથ રિંગ યંગસ્ટર્સમાં ફેવરિટ બની છે.
અલગ અલગ મટીરિયલમાં ઉપલબ્ધ
વોચ વિથ રિંગ અલગ અલગ મટીરિયલમાં અને ખાસ યુવા પેઢીને આકર્ષે એવા રંગોમાં ઉપલબ્ધ હોવાથી તેનું ખાસ આકર્ષણ રહે છે. એટલું જ નહીં એની કિંમત પણ દરેક વર્ગને અનુલક્ષીને રાખવામાં આવી હોવાથી કોઈ પણ વર્ગ પોતાનો શોખ પૂરો કરી શકે છે. જો કે કિંમત પ્રમાણે વસ્તુનું મટીરિયલ નક્કી થતું હોવાથી એની વેલિડિટીનો આધાર એના પર રહેલો છે પણ એ વાત તો છે કે ફેશનમાં રહેવા લોકો એક વાર તો ટ્રાય કરવાનું પસંદ કરશે જ.
