વાઇબ્રન્ટ ગુજરાતમાં ગુજરાતને ગૌરવ અપાવતી સિદ્ધિ
માત્ર 11 દિવસમાં 350 કંપનીઓને બિઝનેસ એક્સ્પોઝિશન સાથે જોડવાનો વિશ્વવિક્રમ
વડોદરા, તા. 29:
વડોદરામાં યોજાયેલી વાઇબ્રન્ટ ગુજરાત પ્રાદેશિક પરિષદ દરમિયાન ગુજરાત સરકારની સત્તાવાર રોકાણ પ્રોત્સાહન સંસ્થા iNDEXTbને ગિનેસ વર્લ્ડ રેકોર્ડનું પ્રમાણપત્ર એનાયત કરવામાં આવ્યું હતું. મુખ્યમંત્રી ભૂપેન્દ્રભાઈ પટેલે સંસ્થાને આ પ્રતિષ્ઠિત સન્માન અર્પણ કરી રાજ્ય માટે ગૌરવની ક્ષણ સર્જી હતી.
11 દિવસમાં 350 પ્રદર્શકો જોડાવાનો વિશ્વવિક્રમ
iNDEXTbએ K and D Communication Limited સાથે મળીને 2 મે, 2026ના રોજ સુરતમાં યોજાયેલા બિઝનેસ એક્સ્પોઝિશન માટે માત્ર 11 દિવસમાં 350 કંપનીઓ/પ્રદર્શકોને જોડીને વિશ્વવિક્રમ સર્જ્યો હતો. આ અનોખી સિદ્ધિને માન્યતા આપતાં Guinness World Records દ્વારા પ્રમાણપત્ર એનાયત કરવામાં આવ્યું, જે મુખ્યમંત્રીના હસ્તે સંસ્થાને અર્પણ કરાયું.
રોકાણ પ્રોત્સાહનમાં iNDEXTbની મહત્વપૂર્ણ ભૂમિકા
ગુજરાત સરકારની સત્તાવાર રોકાણ પ્રોત્સાહન સંસ્થા તરીકે iNDEXTb રાજ્યમાં રોકાણકારો માટે સિંગલ પોઇન્ટ ઓફ કોન્ટેક્ટ તરીકે કાર્ય કરે છે. રોકાણ પ્રક્રિયાને સરળ બનાવવી, નીતિ આધાર, માર્ગદર્શન અને જરૂરી સુવિધાઓ ઉપલબ્ધ કરાવી રાજ્યના ઔદ્યોગિક તથા સામાજિક-આર્થિક વિકાસને વેગ આપવાનું મહત્વપૂર્ણ કાર્ય સંસ્થા દ્વારા કરવામાં આવી રહ્યું છે.
આ પ્રસંગે ઉપસ્થિત મહાનુભાવોએ iNDEXTbની આ ઐતિહાસિક સિદ્ધિને ગુજરાતની રોકાણમૈત્રી નીતિઓનું પ્રતિબિંબ ગણાવી સંસ્થાને અભિનંદન પાઠવ્યા હતા.
