બોલિવુડ અભિનેતા સલમાન ખાનનો એક વીડિયો સોશિયલ મીડિયા પર વાયરલ થઈ રહ્યો છે, જેમાં તે પોતાના ડ્રાઈવર પર નારાજગી વ્યક્ત કરતો જોવા મળી રહ્યો છે. સલમાન ખાન બાંદ્રામાં ગણપતિદર્શન માટે એક સ્થળે પહોંચ્યો હતો. આ દરમિયાન તેને જોવા માટે મોટી સંખ્યામાં ચાહકો એકઠા થઈ ગયા હતા. ભીડ એટલી વધી ગઈ હતી કે સલમાનને પોતાની કાર સુધી પહોંચવામાં પણ મુશ્કેલી પડી હતી. સલમાન ખાન જ્યારે સ્થળ પરથી બહાર નીકળતો હતો ત્યારે ચાહકોએ તેને ચારે તરફથી ઘેરી લીધો હતો. સલમાને હાથ જોડીને લોકોને રસ્તો આપવા અને તેને જવા દેવાની વિનંતી કરી હતી. જોકે, મોટી સંખ્યામાં લોકો તેની આસપાસ હોવાથી તરત રસ્તો ખાલી થઈ શક્યો નહોતો.
આ દરમિયાન સલમાનનો ડ્રાઈવર ભીડમાંથી કાર બહાર કાઢવાનો પ્રયાસ કરી રહ્યો હતો. કાર આગળ વધતી વખતે એક ચાહકનો પગ કારના ટાયર નીચે આવી ગયો હતો. આ ઘટનાને કારણે આસપાસના લોકોમાં દેકારો મચી ગયો હતો અને ભીડમાં અફરાતફરી જેવી સ્થિતિ સર્જાઈ હતી. ચાહકનો પગ કાર નીચે આવતા સલમાન ખાન પણ ડ્રાઈવર પર નારાજ થયો હતો અને તેને ઠપકો આપ્યો હતો. સમગ્ર ઘટના કેમેરામાં કેદ થઈ ગઈ હતી અને તેનો વીડિયો હવે સોશિયલ મીડિયા પર વાયરલ થઈ રહ્યો છે. વીડિયોમાં સલમાનની આસપાસ મોટી સંખ્યામાં લોકો જોવા મળે છે અને તે ભીડને દૂર રહેવા માટે ઈશારો કરતો પણ જોવા મળે છે.
આ જ ભીડમાં એક નાનું બાળક પણ સલમાન ખાનને મળવા માટે આગળ આવ્યું હતું. બાળક સલમાન સાથે હાથ મિલાવવા માંગતું હતું. સુરક્ષાકર્મીઓ તેને રોકવાનો પ્રયાસ કરી રહ્યા હતા, પરંતુ સલમાને બાળકને રોકવાને બદલે તેની સાથે હાથ મિલાવ્યો હતો. બાળક સાથે હાથ મિલાવ્યા બાદ સલમાને પોતાની સુરક્ષા ટીમને તેને ભીડમાંથી સુરક્ષિત રીતે બહાર કાઢવાની સૂચના આપી હતી. સુરક્ષાકર્મીઓએ બાળકને ભીડમાંથી બહાર કાઢ્યું અને તે સુરક્ષિત રીતે બહાર નીકળ્યા બાદ સલમાન ખાન પોતાની કારમાં બેસીને ત્યાંથી રવાના થયો હતો. આ સમગ્ર ઘટનામાં એક તરફ ચાહકોની ભારે ભીડને કારણે સલમાનને મુશ્કેલીનો સામનો કરવો પડ્યો હતો, તો બીજી તરફ કાર આગળ વધતી વખતે ચાહકનો પગ ટાયર નીચે આવતા મામલો વધુ ગંભીર બન્યો હતો. ઘટનાનો વીડિયો સામે આવ્યા બાદ સોશિયલ મીડિયા પર તેની ચર્ચા થઈ રહી છે.
