દેશભરમાં જન્માષ્ટમીના પર્વની ભવ્ય ઉજવણી કરવામાં આવી રહી છે. કૃષ્ણ મંદિરોમાં વિશેષ પૂજા, અભિષેક અને શણગારના કાર્યક્રમો યોજાઈ રહ્યા છે. ત્યારે મધ્ય પ્રદેશના ગ્વાલિયરના ઐતિહાસિક ગોપાલ મંદિરમાં જન્માષ્ટમી નિમિત્તે ભગવાન રાધા-કૃષ્ણનો એવો ભવ્ય શણગાર કરવામાં આવ્યો છે, જેને જોવા માટે મોટી સંખ્યામાં ભક્તો ઉમટી રહ્યા છે. ભગવાન રાધા-કૃષ્ણને અંદાજે ₹120 કરોડથી વધુ કિંમતના કિંમતી આભૂષણો અને રત્નોથી શણગારવામાં આવ્યા છે.ગોપાલ મંદિરમાં જન્માષ્ટમીના દિવસે ભગવાનના દર્શન માટે ખાસ વ્યવસ્થા કરવામાં આવે છે. આ પ્રસંગે વર્ષોથી સાચવી રાખવામાં આવેલા કિંમતી અને ઐતિહાસિક આભૂષણોને બહાર કાઢીને ભગવાનને ધારણ કરાવવામાં આવે છે. આભૂષણોમાં સોનું, ચાંદી ઉપરાંત હીરા, મોતી, પન્ના, માણિક અને પોખરાજ જેવા કિંમતી રત્નોનો સમાવેશ થાય છે.
₹25 કરોડનો રત્નજડિત મુખ્ય મુકુટ
આ શણગારમાં સૌથી વધુ આકર્ષણનું કેન્દ્ર ભગવાન શ્રીકૃષ્ણનો રત્નજડિત મુખ્ય મુકુટ રહ્યો છે. અહેવાલ અનુસાર આ મુકુટની અંદાજિત કિંમત આશરે ₹25 કરોડ છે. આ ઉપરાંત ભગવાનને લગભગ ₹1.25 કરોડની કિંમતનો સોનાનો અન્ય મુકુટ પણ ધારણ કરાવવામાં આવ્યો છે.રાધારાણીના શણગારમાં પણ અનેક કિંમતી આભૂષણોનો સમાવેશ કરવામાં આવ્યો છે. તેમનો રત્નજડિત મુકુટ ત્રણ તોલાથી વધુ વજનનો હોવાનું જણાવવામાં આવ્યું છે. રાધારાણીને પહેરાવવામાં આવેલા વિશેષ સાત લડીવાળા હારમાં 62 અસલી મોતી અને 55 પન્ના જડવામાં આવ્યા છે. આ એકલા હારની કિંમત આશરે ₹35 કરોડ હોવાનું જણાવવામાં આવ્યું છે.
ભગવાનના ભોગ માટેના વાસણ પણ ખાસ
ગોપાલ મંદિરમાં માત્ર ભગવાનના આભૂષણો જ નહીં, પરંતુ તેમની સેવા અને ભોગ માટે ઉપયોગમાં લેવાતા વાસણો પણ વિશેષ હોવાનું સામે આવ્યું છે. અહેવાલ પ્રમાણે કાન્હાને ભોગ ધરાવવા માટે ઉપયોગમાં લેવાતા એક ખાસ વાસણની કિંમત આશરે ₹30 લાખ છે.આ કિંમતી આભૂષણોનું ઐતિહાસિક મહત્વ પણ છે. અહેવાલ અનુસાર આ આભૂષણો સિંધિયા રાજવંશના સમય સાથે જોડાયેલા હોવાનું જણાવાય છે અને વર્ષ દરમિયાન તેમને બેંકના લોકરમાં સુરક્ષિત રાખવામાં આવે છે. જન્માષ્ટમીના અવસર પર જ આ આભૂષણોને બહાર કાઢીને ભગવાનના શણગારમાં ઉપયોગમાં લેવામાં આવે છે.
કડક સુરક્ષા વચ્ચે મંદિરે પહોંચાડાયા આભૂષણો
કરોડો રૂપિયાની કિંમત ધરાવતા આ ઐતિહાસિક આભૂષણોને ખાસ સુરક્ષા વ્યવસ્થા વચ્ચે મંદિર સુધી લાવવામાં આવ્યા હતા. નગર નિગમની વિશેષ સમિતિની દેખરેખ હેઠળ આ સમગ્ર પ્રક્રિયા હાથ ધરવામાં આવી હતી. જન્માષ્ટમીનો કાર્યક્રમ પૂર્ણ થયા બાદ આ તમામ કિંમતી આભૂષણોને ફરીથી બેંક લોકરમાં સુરક્ષિત રાખવામાં આવશે.આ અનોખા અને દુર્લભ શણગારના દર્શન માટે મંદિર પરિસરમાં ત્રણ સ્તરની સુરક્ષા વ્યવસ્થા ગોઠવવામાં આવી છે. આ પ્રસંગે અંદાજે દોઢ લાખથી વધુ શ્રદ્ધાળુઓ મંદિર પહોંચે તેવી શક્યતા વ્યક્ત કરવામાં આવી છે.જન્માષ્ટમીના પવિત્ર પર્વે ગ્વાલિયરના ગોપાલ મંદિરમાં રાધા-કૃષ્ણના આ રાજસી શણગારે ભક્તોમાં વિશેષ આકર્ષણ ઊભું કર્યું છે. કિંમતી રત્નો અને ઐતિહાસિક આભૂષણોથી સજ્જ ભગવાનના અલૌકિક સ્વરૂપના દર્શન માટે ભક્તોમાં ભારે ઉત્સાહ જોવા મળી રહ્યો છે.
