Latest News

અપક્ષ અને કોંગ્રેસ ઉમેદવારી નોંધાવતાં જિલ્લા ભાજપ પ્રમુખનો કડક નિર્ણય
પક્ષ શિસ્ત અંગે કાર્યકરોને સ્પષ્ટ સંદેશ: પાર્ટી લાઇન વિરુદ્ધ પગલાં સહન નહીં
સાવલી ::સાવલી નગરપાલિકાની ચૂંટણીમાં ભાજપના મેન્ડેટ સામે ઉમેદવારી નોંધાવનાર અને પક્ષવિરોધી પ્રવૃત્તિમાં સંકળાયેલા બે યુવા હોદ્દેદારોને જિલ્લા ભાજપ પ્રમુખ દ્વારા પાંચ વર્ષ માટે સસ્પેન્ડ કરવામાં આવ્યા છે. આ નિર્ણયને પગલે સ્થાનિક રાજકીય વર્તુળોમાં ચર્ચા તેજ બની છે.
મળતી માહિતી મુજબ, સાવલી નગરના યુવા મોરચાના ઉપપ્રમુખ આકાશ પટેલે વોર્ડ નં. 6માંથી અપક્ષ ઉમેદવારી નોંધાવી હતી. બીજી તરફ, નગર યુવા મોરચાના કારોબારી સભ્ય નિલેશ પરમારના માતા કૈલાસબેન પરમારે વોર્ડ નં. 2માંથી કોંગ્રેસ પક્ષ તરફથી ઉમેદવારી નોંધાવી હતી. આ પગલાંને પક્ષ શિસ્તના ભંગ તરીકે ગણાવી બંને સામે કાર્યવાહી કરવામાં આવી છે.
જિલ્લા ભાજપ પ્રમુખ દ્વારા જાહેર કરાયેલા સત્તાવાર પત્રમાં બંને હોદ્દેદારોને પાંચ વર્ષ માટે પક્ષમાંથી સસ્પેન્ડ કરવાની જાહેરાત કરવામાં આવી હતી. આ નિર્ણય બાદ સાવલી સહિત સમગ્ર જિલ્લામાં રાજકીય ચર્ચાઓ જાગી છે.
પક્ષના સૂત્રો મુજબ, આ કાર્યવાહી દ્વારા પક્ષ લાઇનથી વિરુદ્ધ જતાં કાર્યકરો માટે કડક સંદેશ આપવામાં આવ્યો છે કે સંગઠનના નિયમોનું ઉલ્લંઘન સહન કરવામાં નહીં આવે. ભાજપના આ નિર્ણયને સ્થાનિક ચૂંટણીના રાજકીય સમીકરણોમાં મહત્વપૂર્ણ પગલું માનવામાં આવી રહ્યું છે.

રિપોર્ટર: વિમલ પટેલ