IRGC સાથે જોડાયેલા આતંકી પર ગંભીર આરોપ, અમેરિકામાં હાઈ એલર્ટ
અમેરિકાના પૂર્વ રાષ્ટ્રપતિ Donald Trumpના પરિવારને લઈને એક ચોંકાવનારી માહિતી સામે આવી છે. અહેવાલો અનુસાર તેમની દીકરી Ivanka Trumpની હત્યાની સાજિશ રચાઈ હોવાનો ખુલાસો થયો છે. આ સમગ્ર મામલામાં ઈરાનની શક્તિ શાળી સૈન્ય સંસ્થા Islamic Revolutionary Guard Corps (IRGC) સાથે જોડાયેલા એક આતંકી પર ગંભીર આરોપ મૂકવામાં આવ્યા છે.
અહેવાલ મુજબ અમેરિકી તપાસ એજન્સીઓએ એક ઈરાકી નાગરિકની ધરપકડ કરી છે, જે IRGC અને ઈરાન સમર્થિત આતંકી સંગઠન Kata’ib Hezbollah સાથે જોડાયેલો હોવાનું કહેવાઈ રહ્યું છે. આરોપી પર આરોપ છે કે તેણે ઇવાંકા ટ્રમ્પને નિશાન બનાવવાની યોજના તૈયાર કરી હતી. સૂત્રોના જણાવ્યા મુજબ આરોપી પાસે ઇવાંકા ટ્રમ્પના નિવાસસ્થાનના નકશા અને સુરક્ષા સંબંધિત માહિતી મળી આવી હતી. સોશિયલ મીડિયા પર પણ તેણે ધમકીભર્યા સંદેશાઓ પોસ્ટ કર્યા હોવાનું સામે આવ્યું છે. અમેરિકી સુરક્ષા એજન્સીઓનું માનવું છે કે આ આખી સાજિશ 2020માં થયેલા ઈરાનના ટોચના સૈન્ય કમાન્ડર કાસિમ સુલેમાનીના મોતનો બદલો લેવા માટે રચાઈ હતી.
યાદ રહે કે 2020માં અમેરિકાએ બગદાદ એરપોર્ટ નજીક ડ્રોન હુમલો કરીને Iranian Quds Forceના કમાન્ડર Qasem Soleimaniને મારી નાખ્યા હતા. તે સમયે અમેરિકી કાર્યવાહીનો આદેશ ડોનાલ્ડ ટ્રમ્પે આપ્યો હતો. ત્યારથી અમેરિકા અને ઈરાન વચ્ચે તણાવ સતત વધતો રહ્યો છે. તાજેતરના અહેવાલો મુજબ ધરપકડ કરાયેલા આરોપીનું નામ Mohammad Baqer Saad Dawood Al-Saadi હોવાનું કહેવાઈ રહ્યું છે. અમેરિકી એજન્સીઓના દાવા અનુસાર તે IRGC દ્વારા તાલીમ મેળવેલો ઓપરેટિવ હતો અને યુરોપ તથા ઉત્તર અમેરિકામાં અનેક હુમલાઓની યોજના સાથે જોડાયેલો હતો.
માહિતી મુજબ આરોપીને તુર્કીમાં પકડી પાડવામાં આવ્યો હતો અને ત્યારબાદ તેને અમેરિકામાં લાવવામાં આવ્યો છે. હાલમાં તેની સામે આતંકવાદ, હત્યાની સાજિશ અને આંતરરાષ્ટ્રીય સુરક્ષાને ખતરો પહોંચાડવાના આરોપો હેઠળ કાર્યવાહી ચાલી રહી છે. અમેરિકી તપાસ એજન્સીઓ હવે તેની સાથે જોડાયેલા સમગ્ર નેટવર્કની તપાસ કરી રહી છે. અમેરિકામાં આ ખુલાસા બાદ સુરક્ષા એજન્સીઓ હાઈ એલર્ટ પર આવી ગઈ છે. ખાસ કરીને ડોનાલ્ડ ટ્રમ્પ અને તેમના પરિવારની સુરક્ષા વધુ મજબૂત કરવામાં આવી હોવાનું જણાવાયું છે. અગાઉ પણ અમેરિકી ગુપ્તચર એજન્સીઓએ ચેતવણી આપી હતી કે ઈરાન સમર્થિત જૂથો ટ્રમ્પ અને તેમના નજીકના લોકો સામે બદલો લેવા પ્રયત્ન કરી શકે છે.
બીજી તરફ ઈરાને અગાઉ આવા તમામ આરોપોને નકારી કાઢ્યા હતા. ઈરાનના વિદેશ મંત્રાલયે અમેરિકા દ્વારા લગાવવામાં આવતા આરોપોને “રાજકીય પ્રચાર” ગણાવ્યા હતા. રાજકીય વિશ્લેષકોનું માનવું છે કે આ ઘટનાથી અમેરિકા અને ઈરાન વચ્ચેનો તણાવ વધુ વધી શકે છે. ખાસ કરીને મધ્ય પૂર્વમાં ચાલી રહેલા યુદ્ધ જેવી પરિસ્થિતિ અને વૈશ્વિક રાજકીય અસ્થિરતા વચ્ચે આવી ઘટના અત્યંત ગંભીર માનવામાં આવી રહી છે. અમેરિકી સુરક્ષા નિષ્ણાતોનું કહેવું છે કે IRGC સાથે જોડાયેલા જૂથો લાંબા સમયથી અમેરિકન નેતાઓ અને તેમના પરિવારને નિશાન બનાવવાની ધમકીઓ આપતા રહ્યા છે. હવે ઇવાંકા ટ્રમ્પને લઈને સામે આવેલી માહિતી એ ચિંતાને વધુ ગંભીર બનાવે છે.
સોશિયલ મીડિયા પર પણ આ મામલો ભારે ચર્ચામાં રહ્યો છે. ઘણા લોકોએ અમેરિકી સુરક્ષા તંત્રની સતર્કતાની પ્રશંસા કરી છે, જ્યારે કેટલાક લોકોએ આ ઘટનાને અમેરિકા-ઈરાન તણાવનું જોખમી પરિણામ ગણાવ્યું છે. હાલ માટે અમેરિકી તપાસ એજન્સીઓ સમગ્ર કેસની ઊંડાણપૂર્વક તપાસ કરી રહી છે. સાથે જ ઇવાંકા ટ્રમ્પ અને ટ્રમ્પ પરિવારની સુરક્ષા વ્યવસ્થામાં વધુ વધારો કરવામાં આવ્યો હોવાનું જણાવાયું છે. આ ઘટનાએ ફરી એકવાર વૈશ્વિક સ્તરે આતંકવાદ અને રાજકીય બદલોની ચર્ચાને તેજ બનાવી દીધી છે.
