દિલ્હી યુનિવર્સિટીના દક્ષિણ કેમ્પસ નજીક આવેલા સત્ય નિકેતનમાં ઇમારત ધરાશાયી થવાની ઘટના અંગે મુખ્યમંત્રી રેખા ગુપ્તાએ નિર્ણાયક કાર્યવાહી કરી છે. આ ઘટના બાદ બેદરકારી બદલ MCDના પાંચ અધિકારીઓને સસ્પેન્ડ કરવામાં આવ્યા છે. સસ્પેન્ડ કરાયેલા અધિકારીઓમાં MCD ડેપ્યુટી કમિશનર, એક્ઝિક્યુટિવ એન્જિનિયર, સુપરિન્ટેન્ડિંગ એન્જિનિયર, આસિસ્ટન્ટ એન્જિનિયર અને જુનિયર એન્જિનિયરનો સમાવેશ થાય છે.
સસ્પેન્શનનો સામનો કરી રહેલા અધિકારીઓ
રાકેશ કુમાર – ડેપ્યુટી કમિશનર (દક્ષિણ ઝોન); રણવીર સિંહ – સુપરિન્ટેન્ડિંગ એન્જિનિયર (દક્ષિણ ઝોન); લલિત કુમાર ગોયલ – એક્ઝિક્યુટિવ એન્જિનિયર (દક્ષિણ ઝોન); સુનિલ ચૌહાણ – આસિસ્ટન્ટ એન્જિનિયર (દક્ષિણ ઝોન); આશિષ કુમાર – જુનિયર એન્જિનિયર.
ઇમારત માલિકની બેદરકારીને કારણે બની ઘટના: મુખ્યમંત્રી
રાહત અને બચાવ કામગીરીનો તાગ મેળવવા માટે મુખ્યમંત્રી રેખા ગુપ્તાએ સોમવારે સતત બીજા દિવસે સ્થળની મુલાકાત લીધી હતી. દરમિયાન દિલ્હી પોલીસે ઇમારતના માલિક હરિ રામ સામે લુકઆઉટ નોટિસ જારી કરી છે. સીએમ રેખા ગુપ્તાએ જણાવ્યું હતું કે “આ ઘટના બિલ્ડિંગના માલિકની બેદરકારીને કારણે બની હતી. તે ખૂબ જ જૂની ઇમારત હતી. ભોંયરામાં પાણી ભરાઈ જવાથી થાંભલા તૂટી પડ્યા હતા, જેના કારણે આખું માળખું ધરાશાયી થયું હતું.”
દિલ્હીના મુખ્યમંત્રી રેખા ગુપ્તાએ X પર એક પોસ્ટમાં જણાવ્યું હતું કે સત્ય નિકેતનમાં બનેલી દુ:ખદ ઘટના બાદ MCDના ડેપ્યુટી કમિશનર, એક્ઝિક્યુટિવ એન્જિનિયર, સુપરિન્ટેન્ડિંગ એન્જિનિયર, આસિસ્ટન્ટ એન્જિનિયર અને જુનિયર એન્જિનિયરને તાત્કાલિક અસરથી સસ્પેન્ડ કરવામાં આવ્યા છે. બિલ્ડિંગ માલિકની ધરપકડ કરવામાં આવી છે. દિલ્હીમાં અનધિકૃત પાંચમા માળ ધરાવતી ઇમારતોને તાત્કાલિક સીલ કરવાનો આદેશ આપવામાં આવ્યો છે. નજીકના પીજી અને ઇમારતોનું પણ સંપૂર્ણ નિરીક્ષણ કરવામાં આવી રહ્યું છે. નિયમોના કોઈપણ ઉલ્લંઘન સામે સીલ કરવા સહિત કડક કાર્યવાહી કરવામાં આવશે. દિલ્હી સરકારે આ બાબતને ખૂબ જ ગંભીરતાથી લીધી છે. દોષિત કે જવાબદાર કોઈપણ વ્યક્તિને બક્ષવામાં આવશે નહીં.
રવિવારે બપોરે 1:30 વાગ્યાની આસપાસ સમારકામ દરમિયાન ઇમારત ધરાશાયી થઈ હતી. તેમાં પુરુષો માટે ‘પેઇંગ ગેસ્ટ’ (PG) રહેઠાણ હતું. પાંચ માળની ઇમારત ધરાશાયી થયા બાદ અત્યાર સુધીમાં સાત લોકોના મોત થયા છે. યુદ્ધના ધોરણે શોધ અને બચાવ કામગીરી હાથ ધરવામાં આવી રહી છે. દિલ્હી પોલીસ, દિલ્હી ફાયર સર્વિસ, NDRF અને DDMA ની ટીમો કાટમાળમાં ફસાયેલા લોકોને શોધવા માટે સતત બચાવ કામગીરી ચલાવી રહી છે. NDRFના IG નરેન્દ્ર બુંદેલાએ જણાવ્યું હતું કે કાટમાળમાં ફસાયેલા લોકોની ચોક્કસ સંખ્યા હાલમાં અજાણ છે અને બચાવ કામગીરી મોડી રાત સુધી ચાલુ રહી શકે છે.
AIIMS અનુસાર ઘટના બાદ 11 લોકોને જય પ્રકાશ નારાયણ એપેક્સ ટ્રોમા સેન્ટરમાં લાવવામાં આવ્યા હતા. તેમાંથી પાંચના મોત થયા હતા, જ્યારે એક ગંભીર રીતે ઘાયલ વ્યક્તિનું સારવાર દરમિયાન મૃત્યુ થયું હતું. હોસ્પિટલમાં ત્રણ લોકોની સારવાર ચાલી રહી છે. ઘાયલોમાંથી એકના અંગ પર સર્જરી કરવામાં આવી હતી જ્યારે નાની ઇજાઓ ધરાવતા એક વ્યક્તિને સારવાર બાદ રજા આપવામાં આવી હતી.
