શનિવારે દીપિકા પાદુકોણ અને રણવીર સિંહ બીજી વખત માતા-પિતા બન્યા છે. દીપિકાએ પુત્રીને જન્મ આપ્યો છે. આ દંપતીએ ઈન્સ્ટાગ્રામ પોસ્ટ દ્વારા નવજાત બાળકીના પગની છાપની તસવીર શેર કરી હતી. આ સારા સમાચાર શેર કરતી વખતે તેમણે પોસ્ટમાં ‘નજર ન લાગે’ (evil eye) તેવું સૂચવતું ઈમોજી પણ મૂક્યું હતું.
દંપતીએ 19 એપ્રિલે બીજી ગર્ભાવસ્થાની જાહેરાત કરી હતી. દીપિકા અને રણવીરના ઈન્સ્ટાગ્રામ હેન્ડલ્સ પર તેમની પુત્રી દુઆની એક તસવીર શેર કરવામાં આવી હતી, જેમાં તે પોઝિટિવ પરિણામ દર્શાવતી પ્રેગ્નન્સી ટેસ્ટ કિટ પકડીને જોવા મળી હતી. તસવીરમાં રણવીરે તેની પુત્રીને ખોળામાં પકડી રાખી હતી; જોકે તેનો ચહેરો દેખાતો ન હતો, જ્યારે દુઆનો અડધો ચહેરો જોઈ શકાતો હતો.
પુત્રી દુઆનો જન્મ 2024માં થયો હતો
ઉલ્લેખનીય છે કે દીપિકા અને રણવીરે 8 સપ્ટેમ્બર, 2024ના રોજ તેમની પુત્રી દુઆના જન્મની જાહેરાત કરી હતી. તે સમયે તેમણે લખ્યું હતું, “દીકરીનું સ્વાગત છે. 8 સપ્ટેમ્બર 2024. દીપિકા અને રણવીર.” આ પહેલા, દીપિકાએ ફેબ્રુઆરી 2024માં ગર્ભાવસ્થાની જાહેરાત કરી હતી. તેમની પ્રેમકહાની 2013માં ફિલ્મ ‘ગોલિયોં કી રાસલીલા રામ-લીલા’ના સેટ પર શરૂ થઈ હતી. ઘણા વર્ષો સુધી રિલેશનશિપમાં રહ્યા બાદ બંનેએ 2018માં ઈટાલીમાં લગ્ન કર્યા હતા.
રણવીરે 1,000 છોકરીઓના શિક્ષણમાં મદદ કરવાનો સંકલ્પ લીધો
ગુરુવારે રણવીર સિંહે ગણપતિ બાપ્પાના આશીર્વાદ લેવા માટે મુંબઈના પ્રખ્યાત લાલબાગચા રાજા પંડાલની મુલાકાત લીધી હતી. મુલાકાત દરમિયાન, તેમણે ‘સેવા સંકલ્પ અભિયાન’ના ભાગરૂપે 1,000 છોકરીઓના શિક્ષણમાં મદદ કરવાનો સંકલ્પ લીધો હતો.
લાલબાગચા રાજાની મુલાકાત લીધા પછી રણવીરે કહ્યું, “અહીં આવવું ખૂબ જ અદ્ભુત લાગે છે. બાપ્પાની કૃપાથી વીતેલું વર્ષ મારા અને મારા પરિવાર માટે ખુશીઓથી ભરેલું રહ્યું છે. તેથી, અમે અહીં તેમના દર્શન કરવા, તેમનો આભાર માનવા અને આગળની સફર – જીવનની સફર – માટે તેમના આશીર્વાદ માંગવા આવ્યા છીએ.” તેમણે વધુમાં કહ્યું, “આપણા આદરણીય વડાપ્રધાન શ્રી નરેન્દ્ર મોદીજીના જન્મદિવસ નિમિત્તે હું ‘સેવા સંકલ્પ અભિયાન’માં જોડાઈને એક હજાર દીકરીઓના શિક્ષણમાં સહયોગ આપવાનો સંકલ્પ કરું છું. મને આશા છે કે બાપ્પા આનાથી પ્રસન્ન થશે અને તેમના આશીર્વાદ હંમેશાં આપણી સાથે રહેશે. બસ આટલું જ; આભાર. જય ગણેશ. જય ગણેશ.”
