વડોદરા: શહેરના ગોત્રી રોડ પર આવેલા ઓસિયા મોલમાં સોમવારે મોડી રાત્રે તસ્કરો ત્રાટક્યા હતા અને મોલમાંથી જુદી જુદી દુકાનોના કેસ કાઉન્ટર તોડી 12.67 લાખની રોકડની ચોરી કરી ફરાર થઇ ગયા હતા. જોકે, એક તસ્કર CCTVમાં કેદ થઇ ગયો હતો. આ બનાવ અંગે ગોત્રી પોલીસે CCTV ફૂટેજના આધારે તપાસ શરૂ કરી છે. શહેરના ગોત્રી રોડ ઉપર ઓસિયા નામનો મોલ આવેલો છે. આ મોલમાં સુખનાથ દ્રાયફ્રૂટ, રિયા બેંગલ્સ અને એમ આર મોબાઈલની દુકાન આવેલ છે. દરમિયાન સોમવારે મોડી રાત્રે 2 વાગ્યાના સુમારે બુકાનીધારી તસ્કરો મોલમાં ત્રાટક્યા હતા.
મોલમાં લગાવેલા મોટાભાગના CCTVના કેબલો કાપીને મોલમાં એક તસ્કર પ્રવેશ્યો હતો અને મોલના અલગ-અલગ કાઉન્ટરમાં પડેલી રૂ. 12.67 લાખ જેટલી રોકડ રકમની ચોરી કરીને ફરાર થઇ ગયો હતો. આ ઉપરાંત તસ્કરે મોલમાંથી એક આઈફોન, એક સ્માર્ટ વોચ, એપલ હેન્ડસિપ્રી, પાવર બેંક અને નેકલેસ હેન્ડસપ્રિની ચોરી કરી હતી. જોકે, મોલના CCTV કેબલો કાપીને મોલમાં પ્રવેશેલ તસ્કરો મોલના ત્રણ CCTVના કેબલો કાપવાના ભૂલી ગયા હતા. જેથી એક તસ્કર તે CCTV કેમેરામાં કેદ થઇ ગયો હતો.
ત્યારબાદ સવારે મોલના સંચાલકો સહિત સ્ટાફ નોકરી ઉપર આવતા તેઓને મોલમાં ચોરી થઇ હોવાની જાણ થઇ હતી. મોલના તમામ કેશ કાઉન્ટરોમાં રોકડ રકમ ન જોતા ચોંકી ઉઠ્યા હતા. દરમિયાન આ બનાવની જાણ મોલના મેનેજર સુરેન્દ્ર જયરામ વિષ્નોઈએ ગોત્રી પોલીસને કરતા પોલીસ સ્થળ પર દોડી ગઇ હતી. પોલીસે ચોરીનો ભેદ ઉકેલવા માટે CCTV ફૂટેજ મેળવ્યા હતા. તે સાથે પોલીસે તસ્કરોનું પગેરું શોધવા માટે ડોગ સ્ક્વોડ અને ફિંગર પ્રિન્ટ નિષ્ણાંતોની મદદ લઇ તપાસ શરૂ કરી હતી.
