સતત ભારે વરસાદ અને ખાડીમાં આવેલા પૂર બાદ હવે સુરત શહેર ધીમે ધીમે સામાન્ય સ્થિતિ તરફ આગળ વધી રહ્યું છે. સુરતમાંથી પસાર થતી તમામ મુખ્ય ખાડીઓનું જળસ્તર જોખમી સપાટીથી નીચે આવી જતાં મ્યુનિસિપલ તંત્ર અને સ્થાનિક રહીશોએ રાહતનો શ્વાસ લીધો છે. પાણી ઓસરતાં જ સુરત મહાનગરપાલિકાએ કાદવ-કચરો દૂર કરવા, રસ્તા મરામત કરવા અને પૂર બાદ રોગચાળો ફેલાતો અટકાવવા માટે મોટા પાયે અભિયાન શરૂ કર્યું છે.
સફાઈ અને રસ્તા મરામતની યુદ્ધના ધોરણે કામગીરી
ભારે વરસાદના કારણે શહેરના બંધ કરાયેલા માર્ગો અને અસરગ્રસ્ત વિસ્તારોમાં પાલિકાએ ઝડપી કામગીરી હાથ ધરી છે:
- 23 રસ્તાઓ ખુલ્લા કરાયા: વરસાદી પાણીના ભરાવાના કારણે સલામતી અર્થે બંધ કરાયેલા 24 રસ્તાઓમાંથી 23 રસ્તા સફાઈ અને મરામત બાદ શરૂ કરી દેવાયા છે, જ્યારે હાલ માત્ર કોઝવે સર્કલનો માર્ગ બંધ છે.
- અસરગ્રસ્ત વિસ્તારોમાં સફાઈ: સારોલીની ભરત કેન્સર હોસ્પિટલ, સણિયા ગામ, સાકેતધામ અને લિંબાયત ઝોનના મીઠી ખાડી વિસ્તારમાં જેસીબી અને ટ્રેક્ટર દ્વારા કાદવ તથા કચરો દૂર કરવામાં આવી રહ્યો છે.
- વધારાના વાહનોની ફાળવણી: સફાઈ ઝડપી બનાવવા ખાનગી એજન્સીઓ અને અન્ય ઝોનમાંથી મળીને 44 થી વધુ જેસીબી, 46 ટ્રક અને 26 ટ્રેક્ટરો કામગીરીમાં જોડવામાં આવ્યા છે.
- ડી-વોટરિંગ પંપ: શહેરના 63 સ્થળોએ 92 પંપ કાર્યરત કરાયા છે, જેમાં નડિયાદ, ઉકાઈ અને ધરોઈથી મંગાવેલા હાઈ-કેપેસિટી પંપનો પણ સમાવેશ થાય છે.
આરોગ્ય વિભાગ એક્શન મોડમાં: 1050 કિલો દવાનો છંટકાવ
પૂર બાદ મચ્છરજન્ય અને ચેપી રોગચાળો ન ફેલાય તે માટે આરોગ્ય તંત્ર સક્રિય બન્યું છે:
- મેડિકલ સર્વે અને દવા વિતરણ: અંજના યુએચસીની મેડિકલ ટીમો દ્વારા મણિનગર અને કમરૂનગર જેવા વિસ્તારોમાં ઘરોઘર આરોગ્ય સર્વે હાથ ધરીને જરૂરી દવાઓનું વિતરણ કરવામાં આવી રહ્યું છે.
- જંતુનાશક દવાનો છંટકાવ: પૂર અસરગ્રસ્ત વિસ્તારોમાં બેક્ટેરિયા અને મચ્છરોનો ઉપદ્રવ અટકાવવા 1050 કિલોગ્રામ જંતુનાશક દવાનો છંટકાવ કરવામાં આવ્યો છે.
- મ્યુનિસિપલ કમિશનરની મુલાકાત: લિંબાયતના મીઠી ખાડી અને ડુંભાલ વિસ્તારની કમિશનરે રૂબરૂ મુલાકાત લઈ સ્થાનિકોની રજૂઆતો સાંભળી ઝડપી નિકાલની સૂચના આપી છે.
આંતરિક સોસાયટીઓમાં ગંદકી અંગે સ્થાનિકોની ફરિયાદ
મુખ્ય માર્ગો પરથી પાણી અને કાદવ ઝડપથી દૂર કરવામાં આવ્યા છે, પરંતુ આંતરિક સોસાયટીઓ અને ગલીઓમાં હજુ પણ કચરાના ઢગલા અને દુર્ગંધ યથાવત હોવાની ફરિયાદો ઉઠી રહી છે. સ્થાનિકોનું કહેવું છે કે પાલિકાનું ધ્યાન મુખ્ય રસ્તાઓ પર વધુ છે, જેથી શેરીઓમાં સંપૂર્ણ સફાઈ થવામાં હજુ થોડો સમય લાગી શકે છે.
ખાડીનું વર્તમાન જળસ્તર (સવારે 10 વાગ્યાની સ્થિતિ)
| ખાડીનું નામ | ભયજનક સપાટી (મીટરમાં) | હાલની સપાટી (મીટરમાં) |
| ભેદવાડ ખાડી | 7.20 | 5.50 |
| મીઠી ખાડી | 9.35 | 7.75 |
| ભાઠેના ખાડી | 8.25 | 5.30 |
| સીમાડા ખાડી | 4.50 | 3.40 |
| કાંકરા ખાડી | 8.48 | 5.50 |
