ધીમીધારે વરસેલા વરસાદથી ખેડૂતોમાં ખુશી, ગરમી અને ઉકળાટમાંથી મળી રાહત
◼️ કાળા ડિબાંગ વાદળોથી આકાશ છવાયું, અનેક ગામોમાં વરસાદી માહોલ
◼️ વાવેતર અને ઉભા પાકને મળશે જીવદોરી, સતત વરસાદની ખેડૂતોની પ્રાર્થના
શિનોર:
વડોદરા જિલ્લાના શિનોર તાલુકામાં લાંબા વિરામ બાદ મેઘરાજાએ ફરી એન્ટ્રી કરતાં સમગ્ર પંથકમાં ખુશીનો માહોલ છવાઈ ગયો છે. હવામાન વિભાગની આગાહી વચ્ચે શિનોર, સાધલી સહિત આસપાસના અનેક ગામોમાં ધીમીધારે વરસાદ શરૂ થતાં આકાશ કાળા ડિબાંગ વાદળોથી ઘેરાઈ ગયું હતું અને વાતાવરણમાં ઠંડક પ્રસરી ગઈ હતી.
ખેડૂતો માટે વરસાદ બન્યો આશાનું કિરણ
છેલ્લા કેટલાક દિવસોથી વરસાદ ખેંચાતા ખેડૂતો ચિંતિત બન્યા હતા. વાવેતર બાદ ઉભા પાક માટે પાણીની અછત સર્જાવાની ભીતિ વચ્ચે વરસેલા આ વરસાદે ખેડૂતોમાં નવી આશા જગાવી છે. ખેડૂતોનું માનવું છે કે આ વરસાદથી વાવેતર તેમજ ઉભા પાકને પૂરતો ફાયદો થશે અને ખેતીને નવજીવન મળશે.
ગરમીથી રાહત, સતત વરસાદની અપેક્ષા
વરસાદ શરૂ થતાં લોકોને અસહ્ય ગરમી અને ઉકળાટમાંથી રાહત મળી છે. વરસાદી માહોલને કારણે વાતાવરણ ખુશનુમા બન્યું છે. ખેડૂતો હવે આગામી દિવસોમાં પણ સારો અને સતત વરસાદ વરસે તેવી આશા વ્યક્ત કરી રહ્યા છે, જેથી ચોમાસાની સિઝન દરમિયાન ખેતી માટે પૂરતું પાણી મળી રહે અને સારો પાક મેળવી શકાય.
