હરણી રોડ વિસ્તારમાં હજારો લીટર શુદ્ધ પાણી રસ્તાઓ પર વહીને બગડી રહ્યું છે.
વડોદરા: સ્માર્ટ સિટી તરીકે ઓળખાતા વડોદરામાં પાણી વિતરણ અને જળ વ્યવસ્થાપનની ચિંતાજનક સ્થિતિ સામે આવી છે. પૂર્વ ઝોનના વોર્ડ નંબર-4માં એક તરફ અનેક સોસાયટીઓમાં પીવાના પાણીની ભારે અછત છે, તો બીજી તરફ હરણી રોડ વિસ્તારમાં હજારો લીટર શુદ્ધ પાણી રસ્તાઓ પર વહીને બગડી રહ્યું છે. તંત્રની આ વિરોધાભાસી અને બેદરકાર કામગીરીને કારણે સ્થાનિક નાગરિકોમાં ભારે રોષ ફાટી નીકળ્યો છે.
મળતી માહિતી મુજબ, કલ્પના નગર સહિત પૂર્વ ઝોનની 10થી વધુ સોસાયટીઓમાં છેલ્લા ઘણા સમયથી પાણી પૂરતા પ્રમાણમાં કે પૂરતા પ્રેશરથી મળતું નથી. ઉનાળાની કાળઝાળ ગરમીમાં પણ રહીશોને પાણી માટે ભારે હાલાકી ભોગવવી પડી રહી છે. વારંવાર રજૂઆતો છતાં સમસ્યાનો કોઈ કાયમી ઉકેલ ન આવતા લોકોમાં અસંતોષ વધી રહ્યો છે.
બીજી તરફ હરણી રોડ પર આવેલી શ્રીવિજય નગર સોસાયટીમાં પીવાના પાણીની લાઈનમાંથી લાંબા સમયથી પાણીનો સતત વેડફાટ થઈ રહ્યો હોવાનું સામે આવ્યું છે. ભંગાણ કે અન્ય કોઈ ટેકનિકલ ખામીના કારણે રસ્તા પર વહી જતું પાણી પાલિકાના જળ વ્યવસ્થાપનના દાવાઓની પોલ ખોલી રહ્યું છે. જ્યારે શહેરનો એક વર્ગ પાણી માટે તરસી રહ્યો છે ત્યારે બીજી તરફ આ રીતે શુદ્ધ પાણીનો બગાડ થવો અનેક પ્રશ્નો ઊભા કરી રહ્યો છે.
સ્થાનિક રહીશોનો આક્ષેપ છે કે આ અંગે પૂર્વ ઝોનના અધિકારીઓ તેમજ વિસ્તારના ચૂંટાયેલા પ્રતિનિધિઓને અનેક વખત મૌખિક અને લેખિત રજૂઆતો કરવામાં આવી છે, છતાં સમસ્યાના નિરાકરણ માટે કોઈ અસરકારક કાર્યવાહી કરવામાં આવી નથી. તંત્રની આ ઉદાસીનતા સામે હવે લોકોમાં ભારે નારાજગી જોવા મળી રહી છે.
સ્થાનિકોમાં એવી પણ ચર્ચા શરૂ થઈ છે કે શું પાણીની કૃત્રિમ અછત ઊભી કરીને ‘ટેન્કર રાજ’ને પ્રોત્સાહન આપવામાં આવી રહ્યું છે? જોકે આ અંગે કોઈ સત્તાવાર પુષ્ટિ નથી, પરંતુ પાણીના અસમાન વિતરણ અને સતત બગાડને કારણે લોકોના મનમાં અનેક શંકાઓ જન્મી રહી છે.
પૂર્વ ઝોનની જનતાએ ચેતવણી આપી છે કે જો હરણી રોડ પર પાણીનો બગાડ તાત્કાલિક બંધ નહીં કરવામાં આવે અને કલ્પના નગર સહિતની સોસાયટીઓમાં નિયમિત તથા પૂરતા દબાણથી પાણી પુરવઠો શરૂ નહીં કરવામાં આવે, તો પાલિકા કચેરીએ ઉગ્ર વિરોધ પ્રદર્શન, માટલા ફોડ કાર્યક્રમ અને આંદોલન શરૂ કરવામાં આવશે. હવે સૌની નજર તંત્રની આગામી કાર્યવાહી પર મંડાઈ છે.
