સહયોગી પાર્ટી પ્રથમ જ દિવસે નારાજ, સરકારમાં તણાવના સંકેત
તમિલનાડુના નવા મુખ્યમંત્રી બનેલા C. Joseph Vijay માટે સત્તાની શરૂઆત જ રાજકીય પડકારોથી થઈ છે. શપથગ્રહણના પહેલા જ દિવસે તેમની ગઠબંધન સરકારમાં અસંતોષ અને મતભેદોની ચર્ચા શરૂ થઈ ગઈ છે. ખાસ કરીને કોંગ્રેસ અને કેટલાક બહારથી ટેકો આપતા સાથીદારો સરકારના કેટલાક નિર્ણયો અને પ્રોટોકોલ મુદ્દે નારાજ હોવાનું રાજકીય વર્તુળોમાં ચર્ચાઈ રહ્યું છે.
તાજેતરમાં થયેલી તમિલનાડુ વિધાનસભા ચૂંટણીમાં વિજયની પાર્ટી TVK (Tamilaga Vettri Kazhagam) સૌથી મોટી પાર્ટી બની હતી. પાર્ટીને 108 બેઠકો મળી હતી, પરંતુ સ્પષ્ટ બહુમતીથી થોડી દૂર રહી હતી. ત્યારબાદ કોંગ્રેસ સહિત કેટલાક નાના પક્ષો અને ડાબેરી દળોના બહારથી ટેકાના આધારે વિજય સરકારે બહુમતીનો આંકડો પાર કર્યો હતો.
શા માટે નારાજ થઈ સહયોગી પાર્ટી?
અહેવાલો મુજબ સરકાર રચાયા પછી મંત્રિમંડળમાં પ્રતિનિધિત્વ અને કેટલાક રાજકીય નિર્ણયોને લઈને સહયોગી પક્ષોમાં અસંતુષ્ટિ જોવા મળી રહી છે. કોંગ્રેસના કેટલાક નેતાઓ માનતા હતા કે ગઠબંધનમાં તેમના યોગદાન પ્રમાણે વધુ મહત્વ આપવામાં આવવું જોઈએ. બીજી તરફ બહારથી ટેકો આપતા કેટલાક દળોએ પણ સરકાર સાથે ચર્ચા કર્યા વગર લેવાયેલા નિર્ણયોને લઈને અસંતોષ વ્યક્ત કર્યો હોવાનું કહેવાય છે. રાજકીય સૂત્રોનું કહેવું છે કે પ્રો-ટેમ સ્પીકરની નિમણૂક અને કેટલાક પ્રશાસનિક નિર્ણયો અંગે ગઠબંધન સાથીઓ સાથે પૂરતી ચર્ચા ન થવાને કારણે મતભેદ ઊભા થયા છે. વિજયે પૂર્વ DMK MLAને પ્રો-ટેમ સ્પીકર બનાવતાં રાજકીય ચર્ચાઓ વધુ તેજ બની હતી.
શપથગ્રહણમાં પણ થયો વિવાદ
વિજયના શપથગ્રહણ સમારોહ દરમિયાન એક અન્ય વિવાદ પણ સામે આવ્યો હતો. સમારોહમાં “તમિલ થાઈ વાઝ્થુ” ગીતને રાષ્ટ્રીય ગીત અને રાષ્ટ્રીય ગાન પછી વગાડવામાં આવ્યું હતું, જેને લઈને કેટલાક રાજકીય પક્ષો અને તમિલ સંગઠનોએ વિરોધ નોંધાવ્યો હતો. તમિલ સંસ્કૃતિને મહત્વ આપતા વર્ગોમાં આ મુદ્દે ભારે ચર્ચા ચાલી રહી છે.
કોંગ્રેસ-ટીવિકે ગઠબંધન પર પહેલાથી જ સવાલ
ચૂંટણી પછી કોંગ્રેસે DMKનો સાથ છોડીને વિજયની TVKને ટેકો આપતા જ તમિલનાડુની રાજનીતિમાં મોટો હલચલ મચી ગયો હતો. DMK સમર્થકો કોંગ્રેસ પર “પીઠમાં છરો ઘોંપવાનો” આરોપ મૂકી રહ્યા હતા. આ કારણે ગઠબંધનની અંદર વિશ્વાસનો અભાવ હોવાની ચર્ચાઓ પહેલાથી ચાલી રહી હતી.
CM વિજય એક્શન મોડમાં
સત્તા સંભાળતા જ વિજયે અનેક મહત્વપૂર્ણ જાહેરાતો પણ કરી છે. તેમણે 200 યુનિટ મફત વીજળી, મહિલાઓની સુરક્ષા માટે ખાસ ટાસ્ક ફોર્સ અને નશાખોરી વિરોધી અભિયાન જેવી યોજનાઓ જાહેર કરી છે. ઉપરાંત, મુખ્યમંત્રી કાર્યાલયમાં બે વરિષ્ઠ IAS અધિકારીઓની નિમણૂક કરીને પ્રશાસન પર મજબૂત પકડ બનાવવાનો પ્રયાસ કર્યો છે.વિજયે પોતાના પ્રથમ ભાષણમાં “વાસ્તવિક અને ધર્મનિરપેક્ષ સામાજિક ન્યાયના નવા યુગ”ની શરૂઆત કરવાનો દાવો કર્યો હતો. તેમણે પારદર્શક અને લોકો કેન્દ્રિત શાસન આપવાનું વચન આપ્યું હતું.
રાજકીય નિષ્ણાતો શું કહે છે?
રાજકીય વિશ્લેષકોનું માનવું છે કે વિજય માટે સૌથી મોટો પડકાર હવે ગઠબંધનને એકજૂટ રાખવાનો રહેશે. TVK પાસે પોતે સંપૂર્ણ બહુમતી નથી, તેથી કોંગ્રેસ અને અન્ય ટેકો આપતા પક્ષોનું સમર્થન જાળવવું અત્યંત જરૂરી રહેશે. જો શરૂઆતના દિવસોમાં જ મતભેદો વધી જશે તો સરકાર માટે મુશ્કેલીઓ ઊભી થઈ શકે છે. તમિલનાડુમાં દાયકાઓ પછી કોઈ ગેર-દ્રવિડિયન પાર્ટી સત્તામાં આવી છે. તેથી સમગ્ર દેશની નજર હવે વિજય સરકારના આગામી પગલાં પર ટકેલી છે.
