બોલિવુડમાં સુપરહિટ ફિલ્મ ‘લગાન’ આપનાર આમિર ખાન અને ડિરેક્ટર આશુતોષ ગોવારીકર ફરી એકવાર સાથે કામ કરવા જઈ રહ્યા છે. લગભગ 25 વર્ષ બાદ બંને ક્રિકેટ પર આધારિત નવી ફિલ્મ માટે હાથ મિલાવી રહ્યા છે. આ વખતે તેઓ ભારતીય ક્રિકેટના દિગ્ગજ ખેલાડી લાલા અમરનાથના જીવન પર ફિલ્મ બનાવશે. લાલા અમરનાથ ભારતીય ક્રિકેટ ઇતિહાસનું એક ખૂબ મોટું નામ છે. તેઓ ભારત તરફથી ટેસ્ટ ક્રિકેટમાં સદી ફટકારનાર પ્રથમ ભારતીય ક્રિકેટર હતા. તેમણે 1933માં આ ઐતિહાસિક સિદ્ધિ મેળવી હતી. એટલું જ નહીં, સ્વતંત્ર ભારતની ક્રિકેટ ટીમના પ્રથમ કેપ્ટન બનવાનો ગૌરવ પણ તેમને મળ્યો હતો. આ ફિલ્મ માત્ર ક્રિકેટ પૂરતી સીમિત નહીં રહે, પરંતુ તેમાં દેશના વિભાજનના સમયની પરિસ્થિતિઓ અને તે સમયની સામાજિક લાગણીઓ પણ બતાવવામાં આવશે. ફિલ્મની કહાની 1947ના ભારત-પાકિસ્તાન વિભાજનની પૃષ્ઠભૂમિ પર આધારિત હોવાનું કહેવાઈ રહ્યું છે.
અહેવાલો મુજબ આમિર ખાન અને આશુતોષ ગોવારીકર આ ફિલ્મને ક્રિકેટ અને ઈમોશનલ ડ્રામાનો મોટો મિશ્રણ બનાવવા માગે છે. ફિલ્મમાં ક્રિકેટ મેદાનની બહારની લાલા અમરનાથની વ્યક્તિગત અને રાષ્ટ્રીય સફર પણ દર્શાવવામાં આવશે. ફિલ્મની સ્ક્રિપ્ટ માટે બોલિવુડના જાણીતા ફિલ્મમેકર રાજકુમાર હિરાણી અને લેખક અભિજાત જોશીનું પણ સર્જનાત્મક યોગદાન લેવામાં આવી રહ્યું છે. બંને અગાઉ અનેક સફળ ફિલ્મોમાં સાથે કામ કરી ચૂક્યા છે, તેથી ફિલ્મને લઈને ચાહકોમાં ઉત્સુકતા વધી ગઈ છે. અહેવાલો મુજબ ફિલ્મનું શૂટિંગ સપ્ટેમ્બર 2026થી શરૂ થવાની યોજના છે. જોકે, ફિલ્મના અન્ય સ્ટારકાસ્ટ અંગે હજુ સત્તાવાર જાહેરાત કરવામાં આવી નથી.
લાલા અમરનાથની ભૂમિકા માટે શાહરૂખ ખાનનું નામ ચર્ચામાં હોવાનું પણ કહેવાઈ રહ્યું છે. જોકે, અત્યાર સુધી આ અંગે કોઈ સત્તાવાર પુષ્ટિ થઈ નથી. જો શાહરૂખ ખાન આ પ્રોજેક્ટ સાથે જોડાય તો આ ફિલ્મ વધુ મોટી બની શકે છે. આમિર ખાન છેલ્લે 2025માં આવેલી ફિલ્મ ‘સિતારે જમીં પર’માં જોવા મળ્યો હતો. બીજી તરફ આશુતોષ ગોવારીકરની છેલ્લી ફિલ્મ ‘મોહેં જો ડેરો’ હતી. હવે લાંબા સમય બાદ બંને ફરી સાથે આવી રહ્યા હોવાથી ફિલ્મપ્રેમીઓમાં ભારે ઉત્સાહ જોવા મળી રહ્યો છે. ‘લગાન’ જેવી ફિલ્મે ક્રિકેટ અને દેશભક્તિને અનોખી રીતે રજૂ કરી હતી. હવે ચાહકોને આશા છે કે લાલા અમરનાથની બાયોપિક પણ તેવી જ પ્રભાવશાળી અને યાદગાર સાબિત થશે.
