ફરી ધમકીભર્યા ઈ-મેઈલ ,પોલીસ, બોમ્બ સ્ક્વોડ અને સાયબર ટીમ એલર્ટ
સુરતના પીપલોદ વિસ્તારમાં આવેલી મુખ્ય પાસપોર્ટ કચેરીને બોમ્બથી ઉડાવી દેવાની ગંભીર ધમકી મળતા વહેલી સવારે જ સરકારી તંત્રમાં ભારે ખળભળાટ મચી ગયો હતો. પાસપોર્ટ ઓફિસના સત્તાવાર ઈ-મેઈલ આઈડી પર અજાણ્યા વ્યક્તિ દ્વારા ધમકીભર્યો મેઈલ મોકલવામાં આવ્યો હતો, જેમાં કચેરીને વિસ્ફોટકોથી ઉડાવી દેવાનો ઉલ્લેખ કરવામાં આવ્યો હતો. મેઈલ મળતા જ સુરક્ષા દ્રષ્ટિએ તાત્કાલિક કાર્યવાહી હાથ ધરવામાં આવી હતી.
ઓફિસમાં હાજર તમામ કર્મચારીઓ તેમજ પાસપોર્ટ માટે આવેલા અરજદારોને તરત જ બહાર કાઢી બિલ્ડિંગ ખાલી કરાવવામાં આવ્યું હતું. આ અચાનક બનાવને કારણે આસપાસના વિસ્તારમાં થોડા સમય માટે ભય અને અફરાતફરીનો માહોલ જોવા મળ્યો હતો.
ઘટનાની જાણ થતાં જ ઉમરા પોલીસ સ્ટેશનનો કાફલો સ્થળ પર દોડી આવ્યો હતો. સાથે જ બોમ્બ ડિસ્પોઝલ સ્ક્વોડ અને ડોગ સ્ક્વોડની ટીમોને પણ તાત્કાલિક બોલાવવામાં આવી હતી. સુરક્ષા દળોએ સમગ્ર બિલ્ડિંગ તથા આસપાસના વિસ્તારનું સઘન સર્ચ ઓપરેશન હાથ ધર્યું હતું. ઓફિસના દરેક રૂમ, પાર્કિંગ અને આસપાસના વિસ્તારમાં સાવચેતીપૂર્વક તપાસ કરવામાં આવી રહી છે, જેથી કોઈ શંકાસ્પદ વસ્તુ હોય તો સમયસર કાર્યવાહી કરી શકાય.
આ દરમિયાન પોલીસને મળેલી માહિતી મુજબ ધમકીભર્યો મેઈલ ગુજરાતી અને અંગ્રેજી બંને ભાષામાં લખાયેલો હતો. જેના કારણે સાયબર ક્રાઈમની ટીમને પણ તપાસમાં જોડવામાં આવી છે. ટેકનિકલ ટીમ દ્વારા મેઈલ મોકલનાર વ્યક્તિને શોધવા માટે આઈપી એડ્રેસ તથા અન્ય ડિજિટલ વિગતોના આધારે તપાસ શરૂ કરવામાં આવી છે. પોલીસ સૂત્રો મુજબ આ મામલે ગંભીરતાપૂર્વક તપાસ ચાલી રહી છે અને ધમકી મોકલનાર શખ્સને ઝડપથી શોધી કાઢવા માટે તમામ દિશામાં તપાસ આગળ ધપાવવામાં આવી રહી છે.
