હથોડા : સુરતમાંથી પસાર થતાં નેશનલ હાઈવે 48 પર ટ્રાફિક જામની વિકરાળ સમસ્યા ઊભી થવા પામી છે. ગત રોજ કામરેજના આંબોલી-ખોલવડ હાઈવે પર તાપી નદીનો બ્રિજ બંધ કરી દેવાતા નવી પારડી પાસે વાહનોની લાંબી કતારો લાગી હતી જ્યારે આજે પણ આવી જ ટ્રાફિક જામની વિકરાળ સમસ્યાએ વાહનચાલકોનો પરસેવો કાઢી નાંખ્યો હતો.
- એક્સપ્રેસ વે શરૂ થતાં જ કોસંબા હાઇવે પર 10 કિમી લાંબી વાહનોની કતાર લાગી
- વાહનચાલકો ત્રાહિમામ, પોલીસ તંત્રને પણ પરસેવો પડી ગયો
- હાઇવેનો ટ્રાફિક જામ જોઈને સુરત જિલ્લા ટ્રાફિક પોલીસ બોખલાઈ ગઈ, વાહન ચાલકો સાથે પણ તું.. તું.. મે.. મે.. કરતી જોવા મળી
- કોસંબા ફાટકથી કઠવાડા, હથોડા થઈને મોટી નરોલી હાઇવે પર પહોંચવા વાહનોમાં ધસારો જોવા મળ્યો
સુરત જિલ્લામાંથી પસાર થતાં મોટી નરોલી નજીકના એક્સપ્રેસ વે ની શરૂઆત કરવાની સાથે જ મહુવેજથી લઈને છેક પીપોદરા સુધી 10 થી 15 કિલોમીટર હાઇવે પર વાહનોની કતાર લાગી જવા પામી હતી. ટ્રાફિક જામની સમસ્યા સર્જાતા લોકો ત્રાહિમામ પોકારી ઊઠ્યા હતા. ટ્રાફિક સમસ્યાને લઈ લોકલ વાહન ચાલકો પણ પરેશાનીનો સામનો કરી રહ્યા છે. જ્યારે ટ્રાફિક સમસ્યા હળવી કરવા માટે નીકળેલી સુરત જિલ્લા ટ્રાફિક પોલીસે વાહન ચાલકો સાથે તું.. તું.. મે.. મે.. પર ઉતરી પડીને અવ્યવહાર કરતા વાહન ચાલકોમાં પણ રોષ જોવા મળ્યો હતો.
મોટી નરોલી નજીક એક્સપ્રેસ વે શરૂ કરાયો પરંતુ એક્સપ્રેસ વે ની પહોળાઈ નાની હોવાથી વાહનો ઉપર ચડતા હાઇવેનો ટ્રાફિક કાચબા ગતિએ ચાલતો હોવાથી ટ્રાફિકનું ભારણ વધી જાય છે. અને ટ્રાફિક સમસ્યા સર્જાઇ રહી છે. કોસંબા અને પાલોદ પોલીસ ટ્રાફિક સમસ્યા હલ કરવામાં પરસેવો પાડી રહી છે.
ત્યારે કોસંબાના સાવા પાટિયા સુધી આવી ચઢેલી સુરત જિલ્લા ટ્રાફિક પોલીસ હાઇવે પર જાણે લટાર મારવા નીકળી હોય તેમ ટ્રાફિકમાં ફસાયેલા વાહન ચાલકો સાથે સારો અભિગમ દાખવવાને બદલે ટ્રાફિક પોલીસને કામગીરી કરવામાં જોર પડતા કલાકોના કલાકો સુધી ટ્રાફિકમાં ફસાયેલા અને પરેશાન થયેલા વાહન ચાલકોને રીતસરનો દમ મારીને તું તું મેં મેં કરતા અકળાયેલા વાહન ચાલકોએ પણ સુરત જિલ્લા ટ્રાફિક પોલીસ પર રોષ ઠાલવતાં જિલ્લા ટ્રાફિક પોલીસ કોસંબાના સાવા પાટીયા નજીકથી છૂમંતર થઈ ગઈ હતી.
કોસંબા ફાટક નજીક ટ્રાફિક સમસ્યા હલ કરવા મથામણ કરી રહેલી કોસંબા પોલીસ કર્મચારી સાથે પણ જિલ્લા ટ્રાફિક પોલીસે થોડો રૂવાબ દેખાડવાનો પ્રયાસ કર્યો હતો. પરંતુ કર્મચારીઓએ બંધબેસતો જવાબ આપતા ટ્રાફિક પોલીસ નમતું જોખીને રવાના થઈ હતી.
પરિસ્થિતિ વણસે તે પહેલા સુરત જિલ્લા પોલીસ વડા અલગથી પોલીસ ટૂકડી ફાળવે એ જરૂરી
હથોડા : કીમ મોટી નરોલી નજીકથી એક્સપ્રેસ વે શરૂ કરાતા કોસંબા હદ વિસ્તારમાં જે ટ્રાફિક સમસ્યા સર્જાઇ રહી છે. તેના પગલે વાહન ચાલકો તોબા પોકારી રહ્યા છે. અને કોસંબા ફાટકે કઠવાડા હથોડા પંથકના સિંગલ માર્ગે વાહન વ્યવહાર ડાયવર્ટ થતાં ગ્રામ્ય વિસ્તારની જનતાની સલામતી સામે પણ પ્રશ્નાર્થ ઊભો થયો છે.
ટ્રાફિક સમસ્યા હલ કરવા માટે ટ્રાફિક પોલીસનો પનો ટૂંકો પડી રહ્યો છે. પરિસ્થિતિ વધુ વણસે તે પહેલા સુરત જિલ્લા પોલીસ વડાએ કોસંબા પંથકના હાઇવે પર ટ્રાફિક સમસ્યા હલ કરવા વધારાની અલગથી પોલીસ ટુકડી તાત્કાલિક ધોરણે ફાળવી દેવી જોઈએ. જેથી વાહન ચાલકોની સમસ્યા હલ થાય. તેવી વિસ્તારની જનતાની માંગ છે.
