નવી દિલ્હી: (New Delhi) લોકસભાના સ્પીકર ઓમ બિરલાએ (Speaker Om Birla) ગૃહમાં કોંગ્રેસના (Congress) એક સાંસદની ટિપ્પણી પર વાંધો ઉઠાવ્યો છે. ઓમ બિરલાએ કહ્યું કે જો સભ્યો ગૃહની અંદર જાતિ અને ધર્મના આધારે ચર્ચા કરશે તો અધ્યક્ષે કાર્યવાહી કરવી પડશે. વાસ્તવમાં કોંગ્રેસના સભ્ય રેવન્ત રેડ્ડીએ નાણા મંત્રાલયને (Finance Ministry) લગતા પૂરક પ્રશ્નો પૂછતી વખતે નાણામંત્રી નિર્મલા સીતારમણની ટિપ્પણી અંગે પ્રશ્નકાળ દરમિયાન જાતિના સંદર્ભમાં કંઈક કહ્યું હતું. નિર્મલા સીતારમણે કહ્યું હતું કે, “સભ્યો તેલંગાણાથી આવે છે. તેઓ કહે છે કે તેમની હિન્દી નબળી છે. હું નબળી હિન્દીમાં જ જવાબ આપું છું.” આ પછી રેડ્ડીએ કહ્યું, “મંત્રીએ મારી હિન્દી પર ટિપ્પણી કરી છે. હું…”
- લોકસભામાં જાતિ અને ધર્મના આધારે ચર્ચા થશે તો સાંસદો સામે પગલાં લઈશુંઃ ઓમ બિરલા
- કોંગ્રેસના સભ્ય રેવન્ત રેડ્ડીએ નાણા મંત્રાલયને લગતા પૂરક પ્રશ્નો પૂછતી વખતે નાણામંત્રી નિર્મલા સીતારમણની ટિપ્પણી અંગે પ્રશ્નકાળ દરમિયાન જાતિના સંદર્ભમાં કંઈક કહ્યું હતું
- લોકસભા અધ્યક્ષે કહ્યું, જો તમે વારંવાર ઉભા થશો તો હું તમને બહાર કાઢી નાખીશ
સંસદીય બાબતોના રાજ્યમંત્રી અર્જુન રામ મેઘવાલે કોંગ્રેસના સાંસદની ટિપ્પણી સામે વાંધો ઉઠાવ્યો અને કહ્યું કે સભ્યો આ ગૃહનું વર્ગીકરણ કરી રહ્યા છે. બાદમાં ઓમ બિરલાએ કહ્યું, “સભ્યએ કહ્યું કે હું આ જાતિમાંથી આવું છું. તમે જાતિ અને ધર્મના આધારે ચૂંટાઈને નથી આવતા … આવા શબ્દોનો ઉપયોગ કરશો નહીં, નહીં તો કાર્યવાહી કરવી પડશે. તમારે અહીં ધર્મ અને જાતિના આધારે ચર્ચા ન કરવી જોઈએ.” જ્યારે રેડ્ડીએ કંઈક કહેવાનો પ્રયાસ કર્યો ત્યારે લોકસભા અધ્યક્ષે કહ્યું, “જો તમે વારંવાર ઉભા થશો તો હું તમને બહાર કાઢી નાખીશ.”
અગાઉ જ્યારે રેડ્ડી વડાપ્રધાન નરેન્દ્ર મોદીના એક જૂના નિવેદનનો ઉલ્લેખ કરી રહ્યા હતા ત્યારે બિરલાએ કહ્યું હતું કે તમે પ્રશ્નો પૂછો. તેના પર રેડ્ડીએ કહ્યું કે તમે દખલ ન કરો. લોકસભા અધ્યક્ષે પણ તેમના નિવેદન પર વાંધો ઉઠાવ્યો અને કહ્યું, “તમે (અધિર રંજન ચૌધરી) નેતા છો. તમારે સભ્યોને સમજાવવું જોઈએ કે તેઓ એમ ન કહી શકે કે હું દખલ કરી શકતો નથી. મને હસ્તક્ષેપ કરવાનો અધિકાર છે.” આ અંગે રેડ્ડીએ સ્પષ્ટતા કરતા કહ્યું, “અમે બધા અહીં ચૂંટાઈને આવ્યા છીએ અને આશા રાખીએ છીએ કે તમે અમને રક્ષણ આપશો.” આ પછી પ્રશ્નકાળ ચાલુ થયો હતો.
