મોંઘીદાટ કારમાંથી બિયરના ટીન મળતા સ્થાનિકોએ દબોચ્યો; ગોત્રી પોલીસે ગુનો નોંધી તપાસ હાથ ધરી
વડોદરા: સંસ્કારી નગરી વડોદરામાં છેલ્લા કેટલાક સમયથી નશામાં ધૂત નબીરાઓ બેફામ બન્યા હોય તેવી ઘટનાઓ સામે આવી રહી છે, જે અંતર્ગત શહેરના પોશ ગણાતા ગોત્રી વિસ્તારમાં વધુ એક આવી જ ઘટના પ્રકાશમાં આવી છે. ગોત્રીના નીલાંબર સર્કલ પાસે મોડી રાત્રે એક યુવક નશાની હાલતમાં બિનવારસી અને બેફામ રીતે ફરતો સ્થાનિકોના ધ્યાને આવ્યો હતો. આ યુવકની શંકાસ્પદ હિલચાલ અને વર્તનને કારણે આસપાસના લોકો એકઠા થઈ ગયા હતા.
સ્થાનિક નાગરિકોએ સતર્કતા દાખવીને નશામાં ધૂત આ યુવકને ઘટનાસ્થળે જ અટકાવ્યો હતો. ત્યારબાદ જ્યારે લોકો દ્વારા તેની મોંઘીદાટ લક્ઝુરિયસ કારની તપાસ કરવામાં આવી, ત્યારે કારની અંદરથી બિયરના ટીન (કેન) મળી આવ્યા હતા, જેને પગલે યુવક દારૂના નશામાં હોવાની વાતને વધુ બળ મળ્યું હતું. સ્થાનિકોએ આ અંગેની તાત્કાલિક જાણ પોલીસને કરી હતી અને નશાખોર નબીરાને પકડીને ગોત્રી પોલીસ સ્ટેશનના હવાલે કર્યો હતો.
બનાવની જાણ થતાં જ ગોત્રી પોલીસે ઘટનાસ્થળે અને પોલીસ સ્ટેશને જરૂરી કાર્યવાહી શરૂ કરી દીધી હતી. હાલ પોલીસ દ્વારા આ મામલે યુવકની પ્રાથમિક પૂછપરછ અને તબીબી તપાસ સહિતની પ્રાથમિક કાર્યવાહી હાથ ધરવામાં આવી છે. આ પ્રાથમિક તપાસ પૂર્ણ થયા બાદ પોલીસ દ્વારા આ નબીરા વિરુદ્ધ પ્રોહિબિશન એક્ટ તેમજ અન્ય સંબંધિત કલમો હેઠળ કાયદેસરનો ગુનો નોંધીને આગળની કડક કાર્યવાહી કરવામાં આવશે તેવું જાણવા મળ્યું છે. શહેરમાં કાયદો અને વ્યવસ્થા જળવાઈ રહે તે માટે પોલીસ આવા તત્વો સામે કડક વલણ અપનાવે તેવી સ્થાનિકો માંગ કરી રહ્યા છે.
