પ્રધાનમંત્રી નરેન્દ્ર મોદીને ઉઝબેકિસ્તાનનું સર્વોચ્ચ સન્માન એનાયત કરવામાં આવ્યું. રાષ્ટ્રપતિ શૌકત મિર્ઝીયોયેવે એક સમારોહ દરમિયાન પીએમ મોદીને આ સર્વોચ્ચ પુરસ્કાર અર્પણ કર્યો. આ પહેલા રાષ્ટ્રપતિ મિર્ઝીયોયેવે તાશ્કંદમાં દ્વિપક્ષીય વાટાઘાટો કરી હતી જેમાં બંને રાષ્ટ્રના વડાઓ પોતપોતાના પ્રતિનિધિમંડળનું નેતૃત્વ કરી રહ્યા હતા. બંને નેતાઓ વચ્ચેની ચર્ચામાં દ્વિપક્ષીય આર્થિક સહયોગ, ટેકનોલોજી, ઉર્જા, વેપાર અને વ્યૂહાત્મક ભાગીદારીને મજબૂત બનાવવા પર ભાર મૂકવામાં આવ્યો હતો. એવી પણ જાહેરાત કરવામાં આવી હતી કે ભારત-ઉઝબેકિસ્તાન સંબંધોને વ્યાપક વ્યૂહાત્મક ભાગીદારીના દરજ્જા સુધી પહોંચાડવા માટે પગલાં લેવામાં આવશે.
બંને રાષ્ટ્રો દ્વારા લેવામાં આવેલા મુખ્ય નિર્ણયો
દ્વિપક્ષીય વાટાઘાટો પછી પીએમ મોદીએ જણાવ્યું હતું કે ઘણા મહત્વપૂર્ણ નિર્ણયો લેવામાં આવ્યા છે જેમાં બંને પક્ષોની ટીમો સંમત છે. તેમણે પરસ્પર સહયોગના તમામ પાસાઓ માટે દિશા નિર્દેશ આપવા માટે વિદેશ મંત્રી સ્તરે એક સંકલન પરિષદની રચનાની જાહેરાત કરી. વધુમાં બંને દેશો વચ્ચે સંયુક્ત કમિશનને સચિવ સ્તરથી મંત્રી સ્તર સુધી અપગ્રેડ કરવાનો નિર્ણય લેવામાં આવ્યો હતો.
બિઝનેસ સમિટનું આયોજન
પીએમ મોદીએ કહ્યું, “અમે અમારા પરસ્પર સહયોગના તમામ પાસાઓને માર્ગદર્શન આપવા માટે વિદેશ મંત્રી સ્તરે એક સંકલન પરિષદની રચના કરીશું. અમે અમારા સંયુક્ત કમિશનને સચિવ સ્તરથી મંત્રી સ્તર સુધી ઉન્નત કરીશું. બંને પક્ષો સંયુક્ત રીતે બંને દેશોના વ્યાપાર નેતાઓ સાથે એક વ્યાપાર સમિટનું આયોજન કરશે. અમે યુરેનિયમ પુરવઠા માટે લાંબા ગાળાની વ્યવસ્થા સ્થાપિત કરીશું. આજે અમે ત્રણ ‘સિસ્ટર-સિટી’ અને ‘સિસ્ટર-સ્ટેટ’ કરારોમાં પ્રવેશ કરી રહ્યા છીએ; આપણે તેમની ક્ષમતાને સંપૂર્ણ રીતે સાકાર કરવા માટે એક રોડમેપ બનાવવો જોઈએ. તમારા દેશમાં ‘ન્યૂ તાશ્કંદ’ જેવા મેગા-પ્રોજેક્ટ્સ ચાલી રહ્યા છે જ્યારે ભારતમાં અમે ગુજરાતમાં GIFT સિટી વિકસાવ્યું છે. ત્યાં ટેકનોલોજીના ઉપયોગનો અભ્યાસ કરવા માટે તમારા દેશના પ્રતિનિધિમંડળનું સ્વાગત કરવામાં અમને આનંદ થશે.”
મિર્ઝિયોયેવે ભારતની પ્રગતિની પ્રશંસા કરી
રાષ્ટ્રપતિ શૌકત મિર્ઝિયોયેવે કહ્યું, “પ્રધાનમંત્રી મોદી, હું માનું છું કે તમારા નેતૃત્વ હેઠળ, ભારત તમામ ક્ષેત્રોમાં નોંધપાત્ર પરિણામો પ્રાપ્ત કરી રહ્યું છે, આર્થિક વિકાસનો ઉચ્ચ દર જાળવી રહ્યું છે અને મોટા પ્રોજેક્ટ્સ અમલમાં મૂકી રહ્યું છે. ભારત ડિજિટલાઇઝેશન, માહિતી ટેકનોલોજી, કૃત્રિમ બુદ્ધિમત્તા, અવકાશ સંશોધન અને અન્ય ઘણા ક્ષેત્રોમાં ખરેખર અસાધારણ પ્રગતિ કરી રહ્યું છે. વૈશ્વિક બાબતોમાં નવી દિલ્હીનો અવાજ અને પ્રભાવ વધુ મજબૂત બન્યો છે. નજીકના મિત્રો તરીકે અમે ચોક્કસપણે આ બધી સિદ્ધિઓ જોઈને ખૂબ ખુશ છીએ.”
આ પહેલા બે દિવસની મુલાકાત માટે ઉઝબેકિસ્તાનમાં પહોંચ્યા બાદ પીએમ મોદીનું ભવ્ય સ્વાગત કરવામાં આવ્યું હતું. મુલાકાત દરમિયાન વડા પ્રધાન નરેન્દ્ર મોદીએ બંને દેશો વચ્ચે વ્યૂહાત્મક ભાગીદારીને વધુ મજબૂત બનાવવા માટે રાષ્ટ્રપતિ મિર્ઝિયોયેવ સાથે પ્રતિનિધિમંડળ-સ્તરની વાટાઘાટો કરી હતી.
