પરિવારનો સવાલ ‘મારવો જ હતો તો પગમાં ગોળી કેમ ન મારી?’
હરિયાણાના ગુરુગ્રામના સુશાંત લોક વિસ્તારમાં થયેલા પોલીસ એનકાઉન્ટર બાદ સમગ્ર મામલો હવે નવા વિવાદમાં ઘેરાઈ ગયો છે. પોલીસે દીપક નાંદલ ગેંગ સાથે જોડાયેલા ચાર શૂટરોને ઠાર કર્યા હોવાનો દાવો કર્યો છે, પરંતુ મૃતકોના પરિવારજનો હવે પોલીસની કાર્યવાહી પર ગંભીર પ્રશ્નો ઉઠાવી રહ્યા છે. સૌથી વધુ ચર્ચામાં એ વાત છે કે એનકાઉન્ટરમાં માર્યા ગયેલા ચારમાંથી બે યુવકો સગીર હોવાનું તેમના પરિવારોનું કહેવું છે અને તેમાંનો એક ધોરણ 11માં અભ્યાસ કરતો તેમજ રાજ્ય સ્તરે જેવલિન થ્રો રમતો ખેલાડી હતો. પરિવારે પ્રશ્ન ઉઠાવ્યો છે કે જો પોલીસ તેમને પકડી શકતી હતી તો જીવલેણ ગોળી ચલાવવાની જગ્યાએ પગમાં ગોળી મારીને પણ કાબૂમાં લઈ શકાય તેમ હતું.
પોલીસના જણાવ્યા અનુસાર સુશાંત લોક વિસ્તારમાં એક વેપારીના ઘરની બહાર ગોળીબાર કરવાની ઘટનાની માહિતી મળતાં ક્રાઇમ બ્રાન્ચે કાર્યવાહી શરૂ કરી હતી. શંકાસ્પદ સ્કોર્પિયો વાહનને રોકવાનો પ્રયાસ કરતાં તેમાં સવાર શૂટરોએ પોલીસ પર ગોળીબાર કર્યો હતો. ત્યારબાદ બંને તરફથી ભારે ફાયરિંગ થયું અને ચાર શૂટરો માર્યા ગયા જ્યારે એક આરોપી ઘાયલ હાલતમાં ઝડપાયો. આ અથડામણ દરમિયાન ત્રણ પોલીસકર્મીઓ પણ ઇજાગ્રસ્ત થયા હતા. ઘટના સ્થળેથી પાંચ આધુનિક હથિયારો કબજે કરવામાં આવ્યા હોવાનું પોલીસે જણાવ્યું છે.
પોલીસનું કહેવું છે કે મૃતકો વિદેશમાં બેઠેલા ગેંગસ્ટર દીપક નાંદલના ગેંગ સાથે જોડાયેલા શૂટરો હતા. પ્રાથમિક તપાસમાં સામે આવ્યું છે કે વેપારી પાસેથી ખંડણી વસૂલવાના પ્રયાસના ભાગરૂપે તેના ઘરની બહાર ફાયરિંગ કરવામાં આવ્યું હતું. પોલીસને અગાઉથી ગુપ્ત માહિતી મળતાં ક્રાઇમ બ્રાન્ચની ટીમ સતર્ક બની હતી, આરોપીઓનો પીછો કરતાં અથડામણ સર્જાઈ હતી.એનકાઉન્ટર બાદ મૃતકોની ઓળખ બહાર આવતાં એક ચોંકાવનારી હકીકત સામે આવી. મૃતકોમાં આર્યન નામનો યુવક રોહતક જિલ્લાના બલંદ (બાલોથ) ગામનો રહેવાસી હતો. તપાસમાં જાણવા મળ્યું કે તે ધોરણ 11માં અભ્યાસ કરતો હતો અને જેવલિન થ્રોમાં રાજ્ય સ્તરે ભાગ લઈ ચૂક્યો હતો. સ્થાનિક સ્તરે તે બાઇક મિકેનિક તરીકે પણ કામ કરતો હતો. પોલીસના જણાવ્યા મુજબ છેલ્લા થોડા સમયથી તે ગુનાહિત ગેંગના સંપર્કમાં આવ્યો હતો. અન્ય મૃતક નીતિન પણ એ જ ગામનો રહેવાસી અને આર્યનનો મિત્ર હોવાનું સામે આવ્યું છે.
પરિવારજનોનો દાવો છે કે આર્યન અને નીતિન બંને સગીર હતા. તેમના કહેવા મુજબ પોલીસ તેમને ગુનેગાર ગણાવી રહી છે, પરંતુ તેમની ઉંમર સંબંધિત દસ્તાવેજો સ્પષ્ટ કરશે કે તેઓ 18 વર્ષથી નાના હતા. પોલીસનું કહેવું છે કે ઉંમર અંગેના દસ્તાવેજોની તપાસ ચાલી રહી છે, તમામ માહિતીની ચકાસણી બાદ જ સત્તાવાર નિવેદન આપવામાં આવશે.આર્યનના પરિવારનું કહેવું છે કે તે રમતગમતમાં આગળ વધવા માંગતો હતો અને જેવલિનમાં પોતાની કારકિર્દી બનાવવાના સપના જોતો હતો. પરિવારનો આરોપ છે કે પોલીસે તેને આત્મસમર્પણ કરવાની તક આપી નહોતી. તેમના શબ્દોમાં, જો તે ખરેખર આરોપી હતો તો તેને જીવતો પકડી શકાય તેમ હતો. “જો ગોળી મારવી જ હતી તો પગમાં મારી હોત, સીધું મોતને ઘાટ કેમ ઉતાર્યો?” એવો સવાલ પરિવારજનોએ ઉઠાવ્યો છે.
બીજી તરફ પોલીસનું કહેવું છે કે આરોપીઓએ પહેલો ગોળીબાર કર્યો હતો અને ક્રાઇમ બ્રાન્ચે માત્ર આત્મરક્ષા કાયદેસરની કાર્યવાહી હેઠળ જવાબી ફાયરિંગ કર્યું હતું. અથડામણ દરમિયાન ત્રણ પોલીસકર્મીઓને પણ ગોળી વાગી હતી, જે દર્શાવે છે કે આરોપીઓ ભારે હથિયારોથી સજ્જ હતા અને પોલીસ પર જીવલેણ હુમલો કર્યો હતો. આવી સ્થિતિમાં કાયદા મુજબ જવાબી કાર્યવાહી કરવી ફરજિયાત બની હતી.તપાસ એજન્સીઓ હવે મૃતકોના ગુનાહિત નેટવર્કની પણ તપાસ કરી રહી છે. પોલીસે દાવો કર્યો છે કે દીપક નાંદલ ગેંગ છેલ્લા કેટલાક સમયથી વેપારીઓને ધમકી આપીને ખંડણી વસૂલવાના અનેક પ્રયાસોમાં સામેલ રહ્યો છે. ગુરુગ્રામમાં બનેલી તાજેતરની ઘટનાને પણ આ જ શ્રેણી સાથે જોડવામાં આવી રહી છે.
ફોરેન્સિક નિષ્ણાતો અને ક્રાઇમ સીન ટીમે ઘટનાસ્થળેથી કારતૂસ, હથિયારો અને અન્ય પુરાવા એકત્રિત કર્યા છે. પોલીસે મૃતકોના મોબાઇલ ફોન, વાહન તથા અન્ય ડિજિટલ પુરાવાની પણ તપાસ શરૂ કરી છે, જેથી ગેંગના અન્ય સભ્યો અને તેમની કામગીરી વિશે વધુ માહિતી મળી શકે.
આ ઘટનાએ હરિયાણામાં પોલીસ એનકાઉન્ટરની કાર્યવાહી અંગે ફરી ચર્ચા જગાવી છે. એક તરફ પોલીસનું કહેવું છે કે સંગઠિત ગુનાખોરી સામે કડક કાર્યવાહી જરૂરી છે, તો બીજી તરફ પરિવારજનો નિષ્પક્ષ તપાસની માંગ કરી રહ્યા છે. ખાસ કરીને સગીર હોવાનો દાવો અને એક યુવક રાજ્ય સ્તરીય ખેલાડી હોવાનું સામે આવતા કેસ વધુ સંવેદનશીલ બની ગયો છે.હાલ પોલીસે જણાવ્યું છે કે સમગ્ર ઘટનાની કાયદાકીય પ્રક્રિયા મુજબ તપાસ ચાલી રહી છે. મૃતકોની ઉંમર,ગુનાહિત સંડોવણી, ગેંગ સાથેના સંબંધો અને એનકાઉન્ટરની પરિસ્થિતિ અંગે તમામ પાસાઓની તપાસ બાદ જ અંતિમ ચિત્ર સ્પષ્ટ થશે. બીજી તરફ પરિવારો ન્યાયિક તપાસની માંગ સાથે પોતાના પ્રશ્નો પર અડગ છે.
આ સમગ્ર ઘટનાએ ગુરુગ્રામમાં કાયદો અને વ્યવસ્થા, સંગઠિત ગુનાખોરી અને પોલીસ કાર્યવાહીની પદ્ધતિ અંગે અનેક નવા સવાલો ઉભા કર્યા છે. હવે સૌની નજર તપાસના પરિણામો પર છે, જેનાથી સ્પષ્ટ થશે કે એનકાઉન્ટરની કાર્યવાહી સંપૂર્ણપણે નિયમો અનુસાર હતી કે પરિવારજનો દ્વારા ઉઠાવવામાં આવેલા પ્રશ્નોમાં કોઈ તથ્ય છે.
