નેપાળની (Nepal) મુલાકાતે પહોંચેલા ભારતના ધર્મગુરુ ધીરેન્દ્રકૃષ્ણ શાસ્ત્રી (Dhirendra Shastri) ઉર્ફે બાબા બાગેશ્વરનું એક તરફ નેપાળમાં ઉષ્માભર્યું સ્વાગત કરવામાં આવી રહ્યું છે. તો બીજી તરફ નેપાળના વડાપ્રધાન અને રાષ્ટ્રપતિ બાબા બાગેશ્વરથી નારાજ છે. તેમણે બાબા બાગેશ્વરને મળવાનો ઇનકાર કરી દીધો છે. જણાવી દઈએ કે બાબા બાગેશ્વરે નેપાળ હિન્દુ રાષ્ટ્ર બને તેવી ઈચ્છા વ્યક્ત કરી છે. તેમણે કહ્યું કે નેપાળમાં સનાતન ધર્મની પ્રગતિ થવી જોઈએ. આ દરમિયાન નેપાળના વડાપ્રધાન પુષ્પ કમલ દહલ પ્રચંડ અને રાષ્ટ્રપતિ (President) રામચંદ્ર પૌડેલે બાબા બાગેશ્વરને મળવાની ના પાડી દીધી છે.
બાબા બાગેશ્વર આ દિવસોમાં નેપાળના પ્રવાસે છે જ્યાં તેઓ પોતાના નિવેદનોને કારણે ચર્ચામાં છે. બાબા બાગેશ્વરે કહ્યું છે કે નેપાળ હિંદુ રાષ્ટ્ર રહે અને સનાતન ધર્મની ક્રાંતિ અહીં ખીલતી રહે. તેણે કહ્યું કે ખરાબ ન લગાડતાં, હું કોઈની વિરુદ્ધ નથી પરંતુ સનાતન ધર્મના પક્ષમાં છું. બાબા બાગેશ્વરે કહ્યું કે નેપાળ આપણી આત્મા છે. તેમણે કહ્યું કે એક દિવસ નેપાળ આખી દુનિયામાં પોતાનો ડંકો વગાડશે.
બાબા બાગેશ્વર નેપાળમાં હિન્દુ ધર્મનો પ્રચાર કરી રહ્યા છે ત્યારે ત્યાંની સામ્યવાદી સરકાર તેમનાથી નારાજ છે. નેપાળના વડાપ્રધાન પ્રચંડ અને રાષ્ટ્રપતિ રામચંદ્ર પૌડેલે બાબા બાગેશ્વરને મળવાની ના પાડી દીધી છે. પ્રચંડ શનિવારે સવારે બાબા બાગેશ્વરને મળવાના હતા પરંતુ પાછળથી તેમના વ્યસ્ત શિડ્યૂલને કારણે ના પાડી દીધી હતી.
આ પહેલા બાબા બાગેશ્વરે નેપાળના રાષ્ટ્રપતિ રામચંદ્ર પૌડેલને મળવાની ઈચ્છા વ્યક્ત કરી હતી. આના પર રામચંદ્ર પૌડેલે ‘સ્વાસ્થ્ય’નું કારણ આપીને મળવાનો ઇનકાર કર્યો હતો. નેપાળમાં બાબા બાગેશ્વરને લઈને નેપાળના રાજકારણીઓમાં ભારે ખચકાટ જોવા મળી રહ્યો છે. તે પણ ત્યારે જ્યારે મોટી સંખ્યામાં નેપાળી હિન્દુઓ તેમનું સ્વાગત કરી રહ્યા છે. બાબા બાગેશ્વરની મુલાકાતમાં પ્રચંડ અને રાષ્ટ્રપતિ બંનેની ગેરહાજરીને કારણે લોકોની અટકળો વધી ગઈ છે.
બાબા બાગેશ્વર હાલમાં નેપાળમાં શાશ્વત ધામમાં પ્રવચન આપી રહ્યા છે જે ખૂબ જ પવિત્ર સ્થળ માનવામાં આવે છે. જોકે પ્રચંડના બાગેશ્વર ધામને ન મળવાના કારણને લઈને પ્રશ્નોનું બજાર ગરમાયું છે. વિશ્લેષકોનું કહેવું છે કે તેની પાછળ પીએમ પ્રચંડનો છુપાયેલ ઈરાદો છે જેઓ સામ્યવાદી રાજકારણને લઈને પૂર્વ વડાપ્રધાન કેપી ઓલી સાથે સ્પર્ધા કરી રહ્યા છે. બીજી તરફ પ્રચંડ અને પૌડેલના આ નિર્ણયથી લોકો આશ્ચર્યમાં છે.
નેપાળના ચૌધરી ગ્રુપ દ્વારા બાબા બાગેશ્વરધામને બોલાવવામાં આવ્યા છે. બાબા બાગેશ્વરની આ મુલાકાતને માત્ર ભક્તો જ નહીં પણ નેપાળના રાજકીય વિશ્લેષકો પણ નજીકથી જોઈ રહ્યા છે. આ પહેલા પ્રચંડે તેમની ભારત મુલાકાત દરમિયાન ઉજ્જૈનમાં મહાકાલની મુલાકાત લીધી હતી અને આ અંગે નેપાળમાં સામ્યવાદીઓમાં ઘણી પ્રતિક્રિયા જોવા મળી હતી. આ મુલાકાતને લઈને ચીનના સમર્થક ઓલીએ પ્રચંડને ઘેર્યા હતા.
