નવી દિલ્હીઃ દેશમાં ટૂંક સમયમાં જ લોકસભાની ચૂંટણી (Lok Sabha elections) યોજાવા જઈ રહી છે. દરમિયાન, વરિષ્ઠ વકીલ હરીશ સાલ્વે અને પિંકી આનંદ સહિત દેશના 600 થી વધુ વકીલોએ (Lawyers) સુપ્રીમ કોર્ટના ચીફ જસ્ટિસ (CJI) ડીવાય ચંદ્રચુડને પત્ર લખ્યો છે. તેમણે આ પત્રમાં કહ્યું છે કે એક વિશેષ જૂથ દેશમાં ન્યાયતંત્રને નબળું કરવાના પ્રયાસો કરી રહ્યું છે.
આ વકીલોએ પત્રમાં લખ્યું છે કે આ વિશેષ જૂથનું કામ કોર્ટના નિર્ણયોને પ્રભાવિત કરવા માટે દબાણ લાવવાનું છે, ખાસ કરીને એવા કેસોમાં કે જેમાં ક્યાં તો રાજકારણીઓ સામેલ હોય અથવા ભ્રષ્ટાચારના આરોપો હોય. પત્રમાં કહેવામાં આવ્યું છે કે તેમની પ્રવૃત્તિઓ દેશના લોકતાંત્રિક બંધારણ અને ન્યાયિક પ્રક્રિયામાં વિશ્વાસ માટે ખતરો છે.
પત્ર લખનાર 600 થી વધુ વકીલોમાં વરિષ્ઠ વકીલ હરીશ સાલ્વે, ચેતન મિત્તલ, પિંકી આનંદ, હિતેશ જૈન, મનન કુમાર મિશ્રા, આદિશ અગ્રવાલ, ઉજ્જવલા પવાર, ઉદય હોલ્લા અને સ્વરૂપમા ચતુર્વેદીનો સમાવેશ થાય છે.
પત્રમાં કહેવામાં આવ્યું છે કે આ જૂથો આવા નિવેદનો આપે છે જે સાચા નથી અને તેઓ રાજકીય લાભ માટે આવું કરે છે. તેમના પત્રમાં વકીલોએ ન્યાયતંત્રના કહેવાતા ‘સુવર્ણ યુગ’ વિશે ખોટી વાતોના પ્રચાર સહિત આવી અનેક પ્રથાઓ પર પ્રકાશ પાડ્યો છે.
આ સાથે જ વકીલોએ પત્રમાં કહ્યું, આ જૂથ તેના રાજકીય એજન્ડાના આધારે કોર્ટના નિર્ણયોની પ્રશંસા અથવા ટીકા કરે છે. વાસ્તવમાં આ જૂથ ‘મારો માર્ગ કે રાજમાર્ગ’ના સિદ્ધાંતમાં માને છે. આ ઉપરાંત બેન્ચ ફિક્સિંગની થિયરી પણ તેમના દ્વારા બનાવવામાં આવી હતી.
વકીલોનો આરોપ છે કે નેતાઓ કોઈ પણ વ્યક્તિ ઉપર ભ્રષ્ટાચારનો આરોપ લગાવે છે અને પછી કોર્ટમાં તેમનો બચાવ કરે છે. આવી સ્થિતિમાં જો કોર્ટનો નિર્ણય તેમની ઈચ્છા મુજબ ન આવે તો તેઓ કોર્ટની અંદર અથવા મીડિયા દ્વારા કોર્ટની ટીકા કરવાનું શરૂ કરી દે છે.
પત્રમાં કહેવામાં આવ્યું છે કે કેટલાક તત્વો ન્યાયાધીશોને પ્રભાવિત કરવાનો પ્રયાસ કરી રહ્યા છે અથવા કેટલાક પસંદગીના કેસોમાં તેમના પક્ષમાં નિર્ણય આપવા માટે ન્યાયાધીશો પર દબાણ લાવી રહ્યા છે. અને આ સોશિયલ મીડિયા પર જુઠ્ઠાણા ફેલાવીને કરવામાં આવી રહ્યું છે. તેમના આ પ્રયાસો વ્યક્તિગત અથવા રાજકીય કારણોસર અદાલતોને પ્રભાવિત કરવાના પ્રયાસો છે, જેને કોઈપણ સંજોગોમાં સહન કરી શકાય નહીં.
વકીલોએ CJIને અપીલ કરી
આ વકીલોનો આરોપ છે કે ચૂંટણીના વાતાવરણમાં આ ખાસ જૂથોની ગતિવિધિઓ વધુ સક્રિય થઈ જાય છે. 2019ની લોકસભા ચૂંટણીમાં પણ આવું જ જોવા મળ્યું હતું. અમે સુપ્રીમ કોર્ટને વિનંતી કરીએ છીએ કે અમારી અદાલતોને આવા હુમલાઓથી બચાવવા માટે કડક અને નક્કર પગલાં ભરે. પત્રમાં વકીલોએ ન્યાયતંત્રને લોકશાહીનો મજબૂત આધારસ્તંભ બની રહે તે માટે ન્યાયતંત્રના સમર્થનમાં એકજૂથ થવાનું આહ્વાન કર્યું છે.
