Latest News

સુરતઃ થોડા દિવસ અગાઉ સુરતમાં બોગસ તબીબો અને બુટલેગરો દ્વારા હોસ્પિટલ શરૂ કરી દેવાનો મામલો પ્રકાશમાં આવ્યો હતો. હવે સુરતમાં નકલી નર્સિંગ ઈન્સ્ટિટ્યુટનો પર્દાફાશ થયો છે.

નકલી ફૂડ, નકલી પોલીસ, નકલી ડોક્ટર અને હવે નકલી શૈક્ષણિક સંસ્થા. સુરતમાં એક બાદ એક નકલી વસ્તુઓનો પર્દાફાશ થઈ રહ્યો છે. નકલી હોસ્પિટલ બાદ હવે નકલી નર્સિંગ ઈન્સ્ટિટ્યુટનો ખુલાસો થયો છે. મેડિકલ ઈન્સ્ટિટ્યુટ પણ બોગસ હોવાનો આક્ષેપ એનએસયુઆઈ અને યુથ કોંગ્રેસ દ્વારા કરાયો છે. આ મામલે એનએસયુઆઈ દ્વારા એક સ્ટિંગ પણ કરાયુ હતું, જેમાં એક શોપિંગ કોમ્પલેક્સની નાની દુકાનમાં બોગસ ઈન્સ્ટિટ્યુટ ચલાવાતું હતું.

પુણા પાટિયા ખાતે આવેલા લા સીટાડેલ કોમર્શિયલ કોમ્પ્લેક્સમાં બોગસ મેડિકલ ઇન્સ્ટિટ્યૂટ ચાલી રહ્યું છે. જીવનદીપ મેડિકલ ઇન્સ્ટિટ્યૂટના નામથી નર્સિંગ સહિતના પાંચ કોર્સ ચલાવાઇ રહ્યા છે. 10 બાય 20ની દુકાનની અંદર પાંચ પ્રકારના મેડિકલ કોર્સ ચલાવાઈ રહ્યા છે. અહીં વિદ્યાર્થીઓ પાસેથી મોટી ફી લેવાની સાથે ડોક્યુમેન્ટ લઈ લેવાતા હતાં.

ઈન્સ્ટિટ્યુટ પરની મહિલા કર્મચારીએ એનએસયુઆઈને કહ્યું કે, અમે માત્ર એડમિશન જ અહીં કરીએ છીએ. અભ્યાસ બેંગ્લોર થાય છે. દરમિયાન ત્રણ વિદ્યાર્થીનીઓ આવી હતી. તે જી.એન.એમ એટલે કે નર્સિંગનો કોર્સ કરતી હોવાનું જણાવ્યું હતું.

યુથ કોંગ્રેસના મહામંત્રી રવિ પૂછડિયાએ કહ્યું કે, અહીં માત્ર 10 બાય 20ની દુકાન છે. જેમાં એક નાની ઓફિસ બનાવી દેવામાં આવી છે. પાછળના ભાગમાં બેંચ ગોઠવી દેવામાં આવી છે. અહીં કરાવવામાં આવતા કોર્સની 80,000 સુધીની ફી છે. અહીં જે અભ્યાસ કરી રહ્યા છે તેમના સર્ટિફિકેટ પણ કોઈ ભરતીમાં માન્ય ન હોય તેવું પણ જાણવા મળ્યું છે. જેથી અહીં વિદ્યાર્થીઓના ભવિષ્યને અંધકારમય બનાવવામાં આવી રહ્યું હોય તેવું અમને લાગી રહ્યું છે.

ગુજરાત નર્સિંગ કાઉન્સિલના ઉપપ્રમુખ ઇકબાલ કડીવાલાએ કહ્યું કે, જીવનદીપ મેડિકલ ઇન્સ્ટિટયૂટ નામનું કોઈપણ ઇન્સ્ટિટયૂટ નર્સિંગ કાઉન્સિલમાં નોંધાયેલું નથી. આ એકદમ બોગસ છે. આવા ઇન્સ્ટિટયૂટ સામે પગલાં લેવાવા જોઈએ અને પોલીસ કાર્યવાહી થવી જોઈએ.