Latest News

ગાંધીનગર: ગુજરાતમાં સરકારી સેવાઓ મેળવવા માટે નાગરિકોને વારંવાર જુદાં-જુદાં લખાણવાળા એફિડેવિટ કરાવવાની પડતી મુશ્કેલીઓનો અંત લાવવા માટે ગુજરાત સરકારે એક મહત્વપૂર્ણ નિર્ણય કર્યો છે. કાયદા વિભાગે રાજ્યવ્યાપી સ્વીકાર્ય “યુનિવર્સલ એફિડેવિટ”નું નવું ફોર્મેટ જાહેર કર્યું છે. હવેથી જે સેવાઓમાં કાયદા કે નિયમ મુજબ સોગંદનામું જરૂરી હોય પરંતુ કોઈ ચોક્કસ ફોર્મેટ નક્કી ન હોય, ત્યાં આ એક જ સમાન ફોર્મેટ સમગ્ર રાજ્યમાં માન્ય રાખવામાં આવશે.

આ નવું યુનિવર્સલ એફિડેવિટ તમામ જિલ્લા, તાલુકા, ગ્રામ્ય તેમજ શહેરી સ્તરે કાર્યરત તમામ સરકારી કચેરીઓ, સેવા કેન્દ્રો અને સત્તાધિકારીઓ દ્વારા ફરજિયાતપણે સ્વીકારવામાં આવશે. ડિજિટલ ગુજરાત પોર્ટલ તેમજ તમામ જન સેવા કેન્દ્રો ખાતે પણ આ એફિડેવિટનો સમાન રીતે અમલ શરૂ થશે, જેથી ઓનલાઇન અરજી કરનારાઓને મોટી સુવિધા મળશે.
સરકારે સ્પષ્ટ કર્યું છે કે, જે સેવાઓ માટે કાયદાકીય રીતે એફિડેવિટ કરવાની કોઈ જરૂરિયાત નક્કી થયેલી નથી, તેવી સેવાઓમાં સામાન્ય વહીવટ વિભાગના ઠરાવ મુજબ એફિડેવિટના સ્થાને માત્ર ‘સ્વઘોષણા’ની સરળ પ્રક્રિયા પૂર્વનિર્ધારિત રીતે જ ચાલુ રહેશે. ત્યાં સોગંદનામું ફરજિયાત કરવામાં આવ્યું નથી. કાયદા વિભાગ દ્વારા જારી કરાયેલા આ સત્તાવાર ફોર્મેટને નાગરિકોની સરળતા માટે ગુજરાતી અને અંગ્રેજી બંને ભાષાઓમાં તૈયાર કરવામાં આવ્યું છે.

ગુજરાતમાં નાગરિક સેવાઓ વધુ સરળ બનશે

સમગ્ર રાજ્યમાં હવે એક જ ‘યુનિવર્સલ એફિડેવિટ’ માન્ય, કાયદા વિભાગે નવું ફોર્મેટ જાહેર કર્યું

નાગરિકોને સરકારી સેવાઓ મેળવવામાં સરળતા અને પારદર્શિતા સુનિશ્ચિત કરવા રાજ્ય સરકારે મહત્વપૂર્ણ નિર્ણય લીધો છે. હવે સમગ્ર ગુજરાતમાં એક જ ‘યુનિવર્સલ એફિડેવિટ’ (સોગંદનામું) માન્ય ગણાશે. રાજ્યના કાયદા વિભાગે આ માટે નવું અને એકસમાન ફોર્મેટ જાહેર કર્યું છે, જેનો અમલ રાજ્યની તમામ સરકારી કચેરીઓ અને સેવા કેન્દ્રોમાં કરવામાં આવશે.
નવી વ્યવસ્થા મુજબ આ યુનિવર્સલ એફિડેવિટ તમામ જિલ્લા, તાલુકા, ગ્રામ્ય તેમજ શહેરી સ્તરે કાર્યરત સરકારી કચેરીઓ, જન સેવા કેન્દ્રો અને વિવિધ સત્તાધિકારીઓ દ્વારા ફરજિયાતપણે સ્વીકારવામાં આવશે. જેના કારણે નાગરિકોને અલગ-અલગ વિભાગો માટે જુદા-જુદા ફોર્મેટના સોગંદનામા તૈયાર કરાવવાની મુશ્કેલીમાંથી મુક્તિ મળશે.

રાજ્ય સરકારના જણાવ્યા અનુસાર ડિજિટલ ગુજરાત પોર્ટલ તેમજ રાજ્યના તમામ જન સેવા કેન્દ્રો પર પણ આ નવા યુનિવર્સલ એફિડેવિટનો અમલ શરૂ કરવામાં આવશે. પરિણામે ઓનલાઇન અરજી પ્રક્રિયા વધુ સરળ અને સુવિધાજનક બનશે તેમજ અરજદારોનો સમય અને ખર્ચ બંનેમાં ઘટાડો થશે.

સરકારે સ્પષ્ટતા કરી છે કે જે સેવાઓ માટે કાયદાકીય રીતે એફિડેવિટ રજૂ કરવાની કોઈ ફરજિયાત જોગવાઈ નથી, તેવી સેવાઓ માટે અગાઉની જેમ સામાન્ય વહીવટ વિભાગના ઠરાવ મુજબ માત્ર ‘સ્વઘોષણા’ (Self Declaration)ની સરળ પ્રક્રિયા યથાવત રહેશે. આવા કિસ્સાઓમાં નાગરિકો માટે સોગંદનામું ફરજિયાત બનાવવામાં આવ્યું નથી.

કાયદા વિભાગ દ્વારા તૈયાર કરાયેલું આ સત્તાવાર ફોર્મેટ નાગરિકોની સુવિધાને ધ્યાનમાં રાખીને ગુજરાતી અને અંગ્રેજી બંને ભાષાઓમાં ઉપલબ્ધ કરાવવામાં આવ્યું છે. રાજ્ય સરકારનું માનવું છે કે એકસમાન એફિડેવિટ વ્યવસ્થાથી સરકારી સેવાઓમાં એકરૂપતા આવશે, પ્રક્રિયાઓ વધુ પારદર્શક બનશે અને નાગરિકોને ઝડપી સેવા મળી શકશે.આ નિર્ણયને રાજ્યમાં ઈ-ગવર્નન્સ અને નાગરિક કેન્દ્રિત વહીવટને વધુ મજબૂત બનાવવાના મહત્વપૂર્ણ પગલા તરીકે જોવામાં આવી રહ્યો છે.