Latest News

રૂ.બે લાખ સ્વીકારતા ઝડપાયેલા સાજીદ સૈયદને
રિમાન્ડ પૂર્ણ થયા બાદ જ્યુડિશિયલ કસ્ટડીમાં મોકલાયો

આરોપી પીઆઈ ચારણના કેસની તપાસ કરીને રિપોર્ટ ડીજી ઓફિસે કરાયો

વડોદરા તા.18
વડોદરા જિલ્લાના પાદરા પોલીસ સ્ટેશનના પીઆઈ વી.એ. ચારણ દ્વારા લવ જેહાદના કેસમાં કાર્યવાહી નહીં કરવા બદલ બે લાખ રૂપિયાની લાંચ માંગવાનો મામલો બહાર આવતા એસીબીએ ટ્રેપ ગોઠવી તેના સાગરીતને રંગેહાથ ઝડપી લીધો છે. જોકે આ કેસનો મુખ્ય આરોપી પીઆઈ ચારણ જાણે ભૂગર્ભમાં ઉતરી ગયા હોય પકડમાં આવતા નથી.
પાદરા પોલીસ સ્ટેશનના પીઆઈ વી.એ. ચારણ દ્વારા એક કેસમાં કાર્યવાહી ટાળવા માટે અરજદાર પાસે રૂ. 2 લાખની લાંચ માંગવામાં આવી હતી. આ રકમ મેળવવા માટે તેના સાગરીત સાજીદ સૈયદ દ્વારા અરજદાર પર વારંવાર દબાણ કરવામાં આવતું હતું.
આથી કંટાળેલા અરજદારે વડોદરા ગ્રામ્ય એસીબીનો સંપર્ક કર્યો હતો. ફરિયાદના આધારે એસીબીની ટીમે અક્ષર ચોક વિસ્તારમાં ટ્રેપ ગોઠવ્યો હતો. ટ્રેપ દરમિયાન પીઆઈ ચારણ વતી લાંચના રૂપિયા સ્વીકારતા સાજીદ સૈયદને રંગેહાથ ઝડપી પાડવામાં આવ્યો હતો.
પકડાયા બાદ એસીબીએ સાજીદ સૈયદની વધુ પૂછપરછ માટે એક દિવસના રિમાન્ડ મેળવ્યા હતા. રિમાન્ડ દરમિયાન તેના નિવાસસ્થાને તપાસ કરવામાં આવી હતી. સાથે જ પીઆઈ ચારણના પાદરા રોડ પર આવેલા મકાન તેમજ તેમના વતન મહેમદાબાદ ખાતે આવેલા મકાને પણ તપાસ હાથ ધરાઈ હતી પરંતુ મુખ્ય આરોપી ત્યાં મળી આવ્યો ન હતો.
હાલ સ્થિતિ એવી છે કે જાણે લાંચકાંડનો મુખ્ય આરોપી પીઆઈ ચારણ ગાયબ થઈને ભૂગર્ભમાં ઊતરી ગયો હોય તેમ તે હજુ સુધી એસીબીના હાથમાં આવ્યો નથી.
રિમાન્ડ પૂર્ણ થતાં એસીબીના તપાસ અધિકારી પીઆઈ વસાવા દ્વારા સાજીદ સૈયદને કોર્ટમાં રજૂ કરવામાં આવ્યો હતો.જ્યાં મેજિસ્ટ્રેટે તેને જ્યુડિશિયલ કસ્ટડીમાં મોકલવાનો હુકમ કર્યો હતો.
બીજી તરફ, એસીબી હવે પીઆઈ વી.એ. ચારણ દ્વારા આવી રીતે અન્ય લોકો પાસેથી લાંચ લઈ કેટલી અપ્રમાણસર મિલકત એકત્રિત કરવામાં આવી છે તેની પણ તપાસ કરવા માટે મંજૂરી માંગવાની તૈયારીમાં છે. ગ્રામ્ય પોલીસ વિભાગમાં ફરજ બજાવતા ખાખીને બદનામ કરનાર ચારણ વિરુદ્ધ પોલીસ અધિક્ષક દ્વારા તપાસ કરીને રિપોર્ટ ડીજી ઓફિસમા કરવામાં આવ્યો છે ત્યારે આગામી દિવસોમાં ઉચ્ચ અધિકારી દ્વારા પીઆઈ ચારણ વિરુદ્ધ એક્શન લેવામાં આવશે.