Latest News

બાઈક રીક્ષા સાથે અથડાયાં બાદ રોડની સાઈડમાં બાંકડા ઉપર બેઠેલાં બે બાળકો ઉપર ફરી વળ્યુ


પેટલાદ તાલુકાના અગાસ ગામમાં આવેલ હનુમાનજી મંદિરના બાંકડા ઉપર બે બાળકો બેસીને વાતો કરી રહ્યાં હતાં. તે વખતે માર્ગ પરથી પુરપાટ ઝડપે પસાર થતું એક બાઈક સામેથી આવતી રીક્ષા સાથે અથડાયા બાદ મંદિરના બાંકડા ઉપર બેઠેલાં બંને બાળકો ઉપર ફરી વળ્યું હતું. જેમાં એક બાળકને સામાન્ય ઈજાઓ પહોંચી હતી. જ્યારે, ગંભીર રીતે ઘવાયેલા બીજા બાળકનું સારવાર દરમિયાન મોત નિપજ્યું છે. આ અંગે પેટલાદ રૂરલ પોલીસે બાઈક ચાલક વિરૂદ્ધ ગુનો નોંધી કાર્યવાહી હાથ ધરી છે.

પેટલાદ તાલુકાના અગાસ ગામમાં આવેલ ઈન્દિરાનગરી વિસ્તારમાં કલ્પેશભાઇ કાન્તીભાઇ સોલંકી રહે છે. આ કલ્પેશભાઈનો ભત્રીજો અક્ષયકુમાર અલ્પેશભાઈ સોલંકી (ઉં.વ 11) અને દશરથ બપોરના સમયે જમી પરવારીને ગામમાં આવેલ હનુમાનજી મંદીરના બાંકડા ઉપર બેઠાં હતાં. તે વખતે માર્ગ પર પુરપાટ ઝડપે આવતું બાઈક નંબર GJ 07 EE 8525 પહેલાં સામેથી આવતી સી.એન.જી રીક્ષા નંબર GJ 23 AU 4767 અથડાયું હતું અને ત્યારબાદ રોડની સાઈડમાં મંદિરના બાંકડા ઉપર બેઠેલાં અક્ષય અને દશરથને અડફેટે લીધાં હતાં.
આ અકસ્માતમાં દશરથને નાકના ભાગે સામાન્ય ઈજાઓ પહોંચી હતી. જ્યારે અક્ષયને માથાના ભાગે ગંભીર ઈજાઓ પહોંચી હતી. જેથી તેને તાત્કાલિક સારવાર અર્થે કરમસદની હોસ્પિટલમાં લઈ જવાયો હતો. જ્યાં સારવાર દરમિયાન અક્ષયકુમાર અલ્પેશભાઈ સોલંકીનું મોત નિપજ્યું છે.
આ બનાવ અંગે કલ્પેશભાઇ કાન્તીભાઇ સોલંકીની ફરીયાદને આધારે પેટલાદ રૂરલ પોલીસે બાઈકચાલક વિરૂદ્ધ ગુનો નોંધી કાયદેસરની કાર્યવાહી હાથ ધરી છે.