ભારતીય જનતા પાર્ટીની કેન્દ્રીય ચૂંટણી સમિતિએ મધ્ય પ્રદેશમાં રાજ્યસભાની પેટાચૂંટણી માટે હરદીપ સિંહ પુરીને પોતાના ઉમેદવાર તરીકે જાહેર કર્યા છે. હરદીપ સિંહ પુરી વડાપ્રધાન નરેન્દ્ર મોદીના મંત્રીમંડળના સભ્ય છે અને હાલમાં પેટ્રોલિયમ અને કુદરતી ગેસ મંત્રાલયનો હવાલો સંભાળી રહ્યા છે. ભાજપના નેતા એલ. મુરુગનના રાજીનામા બાદ આ બેઠક ખાલી પડી હતી. રાજ્યસભા અને મંત્રીમંડળમાંથી તેમના જવાથી NDA નેતૃત્વવાળી કેન્દ્ર સરકારમાં સંભવિત ફેરફાર (reshuffle) અંગે પણ ચર્ચાઓ શરૂ થઈ છે.
12 નવેમ્બરે પેટાચૂંટણી
ભૂતપૂર્વ કેન્દ્રીય મંત્રી એલ. મુરુગનના રાજીનામાથી ખાલી પડેલી બેઠક ભરવા માટે ૧૨ નવેમ્બરે પેટાચૂંટણી યોજાનાર છે. પેટાચૂંટણી પહેલાં મધ્ય પ્રદેશ ભાજપ એકમ દ્વારા સંભવિત ઉમેદવારોની યાદીમાં હરદીપ સિંહ પુરીનું નામ પણ વિચારણા હેઠળ હતું.
પુરીનો વર્તમાન કાર્યકાળ 25 નવેમ્બરે પૂર્ણ થાય છે
ભાજપની રાજ્ય કોર કમિટીએ અંતિમ નિર્ણય માટે કેન્દ્રીય નેતૃત્વને ૪-૫ નામોની પેનલ મોકલવાનો નિર્ણય કર્યો હતો. હરદીપ સિંહ પુરીનો રાજ્યસભાનો વર્તમાન કાર્યકાળ જેમાં તેઓ ઉત્તર પ્રદેશનું પ્રતિનિધિત્વ કરે છે. તે ૨૫ નવેમ્બરે પૂર્ણ થઈ રહ્યો છે. તાજેતરમાં યોજાયેલી રાજ્યસભાની ચૂંટણીઓમાં ઉત્તર પ્રદેશથી તેમને ફરીથી નામાંકિત કરવામાં આવ્યા ન હતા, જેના કારણે ઉપલા ગૃહમાં તેમની હાજરી અનિશ્ચિત બની ગઈ હતી.
સંયુક્ત રાષ્ટ્રમાં ભારતનું પ્રતિનિધિત્વ કર્યું
હરદીપ સિંહ પુરી ભારતીય રાજકારણમાં એક જાણીતું નામ છે. તેમણે પોતાની કારકિર્દીની શરૂઆત ભારતીય વિદેશ સેવા (IFS) ના અધિકારી તરીકે કરી હતી અને ત્યારબાદ તેઓ રાજકારણમાં આવ્યા. તેમણે સંયુક્ત રાષ્ટ્રમાં ભારતનું પ્રતિનિધિત્વ કર્યું છે અને અનેક મહત્વપૂર્ણ રાજદ્વારી જવાબદારીઓ સંભાળી છે. વડાપ્રધાન નરેન્દ્ર મોદીના નેતૃત્વમાં તેમણે વિવિધ મંત્રી પદો પર સેવા આપી છે. તેઓ એક ભૂતપૂર્વ રાજદ્વારી તરીકેની તેમની પૃષ્ઠભૂમિ અને હાલમાં કેન્દ્રીય મંત્રી તરીકેના તેમના હોદ્દા માટે જાણીતા છે.
હરદીપ સિંહ પુરી ૨૦૧૪માં ભાજપમાં જોડાયા બાદ સક્રિય રાજકારણમાં આવ્યા હતા. સપ્ટેમ્બર ૨૦૧૭માં તેમને કેન્દ્ર સરકારમાં આવાસ અને શહેરી બાબતોના મંત્રાલયનો સ્વતંત્ર હવાલો સોંપવામાં આવ્યો હતો. જુલાઈ ૨૦૨૧માં તેઓ પેટ્રોલિયમ અને કુદરતી ગેસ મંત્રાલયના કેન્દ્રીય મંત્રી બન્યા. હાલમાં પણ તેઓ આ મંત્રાલયનો કાર્યભાર સંભાળી રહ્યા છે.
